Yoosefepa Naxaye Potʼifaara
39
Xinkisana nakkataadhesi Ismaeelatte Yoosefeesi piyye Kiptʼate kulakki ashshettay,
hahatikka rafisampawhe pogholho Feroonenna kittatte tookko kodhdhi wanitto tiqithampawhatte Potʼifaara ana payi Kiptʼito usundhena pithamu.
2 Haallikko Yoosefe qali qaghi,
qaakokka nu gharu,
usokka qhawhosi uso rafisadha ho Kiptʼitosinna manneti qaaki.
3 Qhawhosikka Haallikko qhamu Yoosefe qale qaghipa kodhmu kodhi kaasasikka nu gharisusa ihhiʼina,
4 Yoosefe usona miinati kaanaste tayadhi.
Isi kodhadhapa Potʼifaarakka manne huususa uso xawwadhu.
Kodhathi sheeghi kaasa sappeemakka waanitto kodhu.
5 Yoosefesi manne Potʼifaarappa kodhate thuusu kaasa sappeema axawwadhinu paayyatti Haaliikko manne Kiptʼitosinna issaki,
sake Haaliikitokka kodhathe manneete qaghapa the mannete seetottay qaghassa ikkodhdhe.
6 Hussa maallay Potʼifaara olhu sheeghi kaasa sappeemi uso xawwadhi,
yiʼo anu teexipa isi yiʼa malettay olho kaasasi Yoosefeemi teexi.
Yoosefe qhawho leghleghkopa xeesampakko.
7 Kuyyaqako tooko naxaye pogholho huusuna Yoosefesi iʼeemtipa ise yookisu:
“Ye qale raf!”
napayi.
8 Uso kapay iʼiishipa hasa payu:
“Pogholho haayyu olho kaasaasi qhooti yeema teexi maallay,
olho manne huusuna kittatte qagha kaasanna olhu ari yeqaghi.
9 Mannina kittate ye male qhawho anu wanuko ghula teexi yeqaghi,
olho uso ye yeesi teexu heesi patta,
hussakka atho qhoota naxaye thuusu kodhdhiti maallay,
emma ano mala maghno hasa ghaqiti konnipa Waakito miinatte cʼuppo kodha?”
10 Olissaasi kuyyaqqe kaasay inna papaytikaki payni Yoosefe kapay ise qale rafte taakkinti isena kanta taayyamesi ye woʼukka.
11 Kuyyaqako tookko Yoosefe kodhmonuki manne kala xullina qhawho toʼokkokka manneete kalla ye qaghi.
12 Kuyyaqakusana naxayessi pogholho huusuna laalle ina ghaptipa napayi:
“Ye qale raf!”
Uso kapay laalle thuusuusi iseemi hela xuripa karo ghintatte lighu.
13 Isekka qhamu laalle thuususi xarghe hiisisa hela hxuripa karo ghintate sorusa ihhiitina,
14 hulthaame hiisisiki oqitipa na payi:
“Haadhi,
Ipritu tʼirakko haayyu piyyisa hxafittay iʼine palamisi ahxay!
Kompossi anna qaghisa ixxulipa ye ghapenu theemmu,
ano kapayi uuma an hela riiri.
15 Qhama riirisa iʼapaqhina laalle thuusuusi yeemi hxuripa manneete kala lighuppa ghinte kata soru.”
16 Rafisampako huusu haki manne kula okayini saasa laallesiisi he kapeemi xawwatti.
17 Rafisampakosi iʼokayina hasi paytipa olho kodhamadhiisi nu thorruyi:
“Hultho Ipritosi atho okasti ine palamisenukki komposi anna qaghisa xulli.
18 Naqharrayy ariirina lalle thuususi yekapeemi hxuripa ghintte kata sorruppa lighuy.”
19 Rafisampakossi huusukka olhosi inna payti “Hulto haahu haadhi hasiye kodhiisi.”
iʼapaqhina uumi miiroodhi.
20 Hussa mallay Yoosefesi ighghapipa hessi manne pogholhitona shappama kula ashshottappa xulleesu.
Naqharay Yoosefe immanne shaappetena qaghana,
21 Haallikko uso qale ikkodhdhipa cʼikno huusu ye oohamiisi nu hiʼaasuppa rafisampakko manne shappetena miinteema kanaste nu teexu.
22 Onke hasa lighattay hayampakkossi manne shappetena Yoosefesi koro shapamapa olho manne shappetena akodhi kaasa sappeema wanitto kodhu.
23 Haaliikko qhooti Yoosefe qale qaghipa olhu kodhi kaasasi isinu gharisa maallay hayampakkossi manne shappeetena olho Yoosefe kodhi kaasay mallay yehe ghadhikka.