Yihutapa Thimaare
38
Leeqidhisana kittatte Yihuta qharumaadhdhepa qasawadhdhe huusuna kalla irrehamipa qhawho piyye Adhulamenna Hira anapayi kula ashshoppa isi naqale qaaka.
2 Yihuta ihaaha qakkana qhawho piyye Keneaanena Shuʼane anapayina shette thuususikki hiʼi,
ise akkuppa naqale rafu.
3 Isekka ishsheeghtipa shampo dhali,
makaxko huusukka Ere anu kodhu.
4 Lankakka sheeghoppa shampo dhali,
makaxko huusukka Onane nu kodhi.
5 Hantukka shampo dhali,
makaxko huusukka Sela nu kodhi.
Ususaasi xayto ana payi Kezepeemi dhalti.
6 Yihuta miʼaye qharito huusu Erenu shette anapayi Thimaaresiki nu akki.
7 Naqharray Ere Waakito miinatte qhawho maghakko qhoti kodhdhi maallay,
Waako fartteakki uso ghondhi.
8 Yihuta qaso Ere Onaanena inna payi:
“Ashshapa naxaye qharunko haahuna xullappa qhamossi aata piyyatte kula qharunko haahunu sanynye ghaqqay.”
9 Onaane kapay miʼayissa dhalanna ho makaxkko huusu hayasna qhamu ye kodhdhussa qhooti ari mallay,
naxaye qharunko huusu qale irrafana miʼayisa dhalanna makaxkko qharunkko husuna qhamu ye haysninu podhaaxoosi kappe kati elisi.
10 Olissa minte Haallikkitona olho magha qhooti kodhi maallay fartetaakki uso ghondhi.
11 Xaysa tupettay Yihuta xaantte shampo huusuna Timaarena inna payi:
“Miʼaye hayyu Shela haki ghohni saasa ashshapa manne pappo haahina xiskaththo tʼirakko nafari kula kodhdhappa qaakkoy” olhu na maallay hasa payi qhamossi qharumadhdhe huusu kulakki yela farri qhooti payipa ghaaponnu.
Timaare qhamossi inna payi kula iʼashshitipa ho pappo hiisina isi qaakay.
12 Xeere kisha tupettay miʼaye Shuʼa,
naxaye Yihuta iffarti.
Yihutakka iʼillme dhikksi tupetty pelho huusu Hira illakki karo xaytosi koro qeemme huusuna ufurkko qhitʼa qaghi kula karo Temina ashshi.
13 Korokka Timaarena inna payi:
“Kulay xaghghito haahi ufurkko qeemmete qhitʼasenukki karo Temina ashshi.”
Isekka ihussaasi apaqtina
14 laalle azanateesi ihhela yukitipa qhamuyye uptamintinu miinte thiisisi shashettay hela shudhippa ashshoy kathamassi Enayime onke karo Themina kula ashanna hinaseete qaghana harreema qakadhi.
Olhunna maallay hasa kottikka Shela ibhahxakka payni paapo huusu qhamu ye ise akkininu qhamu woʼisa qhooti upatti mallay.
15 Minte thiisi shashettay qhamu shudhamtisa ihhiʼina xiskaththo ghuppeʼita tʼiire qale qaaka innu lighti.
16 Xante shampo huusuna qhamu kodhdhitisa qhooti ye upadhu mallay xaytosi ise qaghti kulakki xighghipa:
“Maʼala anhe qale rafa” napayu.
Isekka:
“Ayye qale rafti payni mayye teexti?”
kinna payti.
17 Usokka inna payi:
“Irpante thaayyu na kittatte piqatakko tookko anhe erakni.”
Isekka inna payti:
“Haka ye piqatakko erakinti saasa olho ayye xargheema teexinti moʼo?”
18 Usokka inna payi:
“Emma olho anna kapa he ghapsisini moʼo?”
Isekka inna payti:
“Tʼukitisa maatama naqaghiisi suro illay holuppa tollakkusa adhoqhatiisi ye teex.”
Usokka ollhu kasqatti kaasasi innu teexipa na qale rafu,
issekka sheeghoy.
19 Xaysa tupettay mannesi naqaakti kulakki holltipa shaashesi hela ishghippa qhamo qharro kula laalle azanateesi qadhdhadhi.
20 Yihuta maxxesiisi ishghasenu piqatakkosiisi pelho huusu Adholiawitosa innu eraki,
qhawhosi aerki kapay ise taye ye alkasu.
21 Qhawhosi koro piyyisana hasinna payipa kasqadhu:
“Xiskaththosi ghuppeʼita tʼiire qale qaakaya kathama Enayenna harratte onkatte hinaseete qakkadhayya xakana qaghti?”
Korosikka inna payi:
“Piyyinna xiskaththo tʼiire qale ghuppeʼitha qaakay yeqaghti.”
22 Husa maallay qhawhosi Yihuta kulakki holipa na payu:
“Anu ise taye allkasukka,
koro piyysana an kasadhina:
‹Xiskaththo ghuppeʼita tʼiire qale qaakay piyyinna yeqaghti› kiyyela paye.”
23 Yihutakka ippayi:
“Lammi ghapsisusattay ighghayyti,
hasaki ye kodhdhu payni koro iʼinena kishaqana.
Ahxay piqathakko annu eraki,
naqharay athu ise taye alkasukka.”
24 Leeqo izzex tupettay hasa payipa Yihutanu aqallu:
“Xaante shampo haahuna Timaare ghupoʼithi sheeghti.”
Yihutakka inna payi:
“Lihasapa ahattetta dhilapa fari.”
25 Isekka aghapipa isa lihasana hasi paytipa xaghghito hiisi kula erkasami:
“Ano qhawho annu sheeghi qhawho mahxinna paappo kodhdhinu,
holuppa tʼukitte maathama naqaghi suro illappa tholakusaasi tomooma eemindhapa haaxa qhamu kodhdhisakka upadhanku.”
26 Yihutakka mahxisaasi iʼupadhina ippayi:
“Miʼaye hayyu Shelanu qhoota anu ise akku maallay yela kaanta ise thepare qaghay.”
Xaysa tupettay lanka ise qale ye rafu.
27 Xeere dhalito inna hxafenna sallaaxe qhamu kodhdhesa iʼarame.
28 Idhdhalanna tookko xarghgho illihasi,
kaakasi dhalsadhaka:
“Husikki qharreema lighi” kipaytipa oyxitte idhdhaasi xarghghooma nu shappi:
29 Naqharray xarghghosisi iholsadhina qaso huusu qharitteema dhaladhi,
kaakkasi dhalsadhakka:
“Mala puttipa lighay!”
Kippayti.
Hussa maallay makaxko huusu “Fareseb” anu kodhu.
30 Xaysa tupettay qharunkosi huusu xarghghete oyxitte sheeghaki dhaladhi,
makaxko huusukka Zarahec anu kodhu.