Yoosefepa Qhrumaadhdhe Huusu
37
Yaikʼoope piyyessi paappo huusu hayhunkottay na qaaki piyye Keneaanenakki qaaki.
2 Thorre dhalata sanynye Yaikʼoopenna hasi lighe.
Yoosefe ponkora perko hudhdhanpa taxxan ikkodhdhina miʼaadhesi xiske paappo huusu Yaikʼoope Pilhapa Zilpana dhaladhe qharumadhdhe huusu qali qeemmepa talaadhdhe paappo huusuna koshi,
usokka qharumaadhdhe huusu olhu dhappe kaasaasi iqaakapa paapponu isi qalli.
3 Israeele Yoosefeesi qhooti keeshanna kalla dhali maallay dhelle huusu tookkate kaanta uumi ghulasipa isi cʼikadha,
hussa maalay shinshine harghghepa luhhe saasa na hxafasiki nu teeli.
4 Qharummaadhdhesi huusukka paappo huusundhi qhamu usundhena kaanta Yoosefeesi uuma cʼikadhiisi iʼhiʼenna Yoosefeesi ishshikke,
hxasottay na qalladheesikka ye alkasonki.
5 Yoosefekka iʼulseedhipa ulsinke huusuusi qharummaadhdhe huusunu qallunna hossi qharrona kanta ighghulaseppa shikkonki.
6 Usokka hasinna payi:
“Into yela apaqha!
Ulsinke haayyuusi an hune qalla.”
7 Kati ine kaasakki pashito kittatte kasppo ghimapa maranko haayyu haqu kitteema shikkaaruppa marne haahundhi nakapa hollonkippa maranko haayyunu ghulladhonki.”
8 Qharummaadhdhessi huusukka:
“Keenni ine saappeema poghlumenu dhihatti?
Eeppa atho ine rafisna payyo?”
Kinna payeppa qhoota ulsinkesippa qhoota qallitesi thuusu iʼqalladhi maallay hossi qharronna kaanta ghulasonkippa shikkonki.
9 Xaysa tupettay Yoosefe lanki ulseedhipa qharumaadhdhe huusunu qallu:
“Kulay hantukka an ulseedhipa,
kati oqhqhayyepa leeqo pana xuskitte hudhdhanpa toʼonki ye ghulladhi.”
10 Ulsinkisaasi ippaappopa qharumaadhdhe huusunu qallina paappo hasinna payipa qheeru:
“Ata ulsinki he mala ligha?
Ata kati dhukke anopa yaye thaahu pana qharumaadhdhe haahuhki ho ghullana?”
11 Qharumadhdhe huusukka innu yooke,
paappo huusu kapay olhisaasi saqakoomi ghapadhi.
Yoosefeesi Qharummaadhdhe huusu Qhamu Lase
12 Xaysa tupettay qharumadhdhe Yoosefe qeemmepa tale paappo huusundhinakki koshenu karo piyye Sekeme kula yoqhqhe.
13 Israeelekka Yoosefena inna payi:
“Qhama arti kula qharumaadhdhe haahu piyye Sekeme kulakki qholaadhdhe yoqhqhe,
hussa maallay haqama usundhe kulaki anho erakniye.”
Yoosefekka:
“Eʼe,
anna kaleema ashshina.”
kinnapayi.
14 Paappo huusukka inna payi:
“Into thiyyipa qharumaadhdhe haahupa qholaadhdhe qhamu moyto qaghessa eemoppa okaya ye qallay.”
Onke hasa lighattay Yoosefeesi koloʼe Kepronenu karo piyye Sekeme kula eraku.
Yoosefekka ippiyye Sekemenna hxafina,
15 liqaanesi piyyisana qaghanaki usundhe gheghgheqipa qhawho tookko usooma hxafoy,
hasa payuppa uso kasqadhu:
“Ata moʼo aghgheeqti qhari?”
16 Yoosefekka inna payi:
“Qharumaadhdhe haayyusikki angheeqina,
akko thannu qhamu aha kula qemmepa tale huusundhi yoqhqhesa ayye qallinay?”
17 Qhawhossikka inna payi:
“Kulay xaynu iʼssixadhe,
holuppa ‹Karo piyye Dhotane kula sixanni› ippayanakki an apaqhi.”
Nakala Yoosefe qharummaadhdhe huusu gheeqenukki nakaleema ashshi,
piyye Dhotanena kanta usundheema hxafoy.
18 Usundhekka sikapnoomi uso hiʼe,
ye usundhena kanta hxafunna qharaʼitha qhamu poghnenukka suladhonki.
19 Usundhekka Iʼillena payenna:
“Haadhi ulsinkolakkosi ihxhxafi.
20 Okaya poghnipa hxohxnidhinna tookko kitteema kʼurri;
xaysa tupettay an paynaanina:
‹Aghitakko maghakko yiʼiye.›
Into ulsikisa huusu idhdhikadhana anemnaaniye.”
21 Naqharray Roopeele iʼolissaasi apaqhina usundhena xarghgheeti pinise woʼipa napayu:
“Ixarghghe haanittay fare hxura!
22 Kʼeqhte qhawhito olo elise!
Hussana kaanta hxohxnu xayna qaghasa kʼura dhishey olo na xarghgho haqisi.”
Ropeele olhunna maallay hasa payi,
usundhena kalla pehisepa paappo huusu kula laaghghe qhooti woʼinu.
23 Yoosefe qharumaadhdhe huusuna kanta ihxhxafina shinshinesi qadhadhi harghghepa lughgheete na hxafasi inna yuke.
24 Akkonkippa hxohxno kitteema kʼuronki.
Hxohxnusakka ho qandhe yena qaghe.
25 Xaysa tupettay yiʼo yienu qakkadhoki,
iqila payeppa emmadhonkina nakkataadhe Ismaeelatte he piyye keleaadhenu kaaladhe okasasiki sikapnooma hiʼe.
Nakataadhisakka kaalaadhdhe huusundhisa kʼimamaadhdhepa miise oshoqooma pana karpesiki na feʼadheppa isi karo piyye Kiptʼatte kula ashsha.
26 Yihudhakka qharumaadhdhepa qassawhe huusuna hasinna payi:
“Qaso haanisi poghepa fartte thusu bhadheete moʼo anna tayinaani?
27 Hussana kaanta nakkaatadhe Ismaeelattenu lasni,
moʼo kaki kodhdhini payni qaso haani sakanko haani,
hussa maallay xarghghe haaniisi na haqise hxurri.”
Qharumaadhdhepa qassawhe huusukka qallitesisa inna ghare.
28 Nakkataadhesi mitiyaamattekka inna kaanta hxafenna qharummaadhdhe huusu Yoosefeesi hxohxnito kittatte illihaseppa Ismaelaadhdhenu pahunte lakkisaa lasonki,
usundhekka Yoosefeesi karo piyye Kiptʼate kula ashshokittay.
29 Ropele ihholipa karo hxohxnossi kula emmadhunna Yoosefeesi qhooti dhapi maallay iʼazanipa laalle thuusuusi hela kaaqu.
30 Qassawhe huusu kulakka holuppa napayu:
“Kulay miʼayessi hxoxhnito kittate ye qaghina,
akko,
ano aha kulakka an ashshini!”
31 Xaysa tupettay talte tootessiki saqheppa shinshinesi Yoosefeesi kʼeeqhtettay shiinonki,
32 karo paappo huusundhi kula ashonkittappa hasana payonki:
“Haadhi shinshiniisi kappate an tayniye qhamu the miʼaye haahuna kodhdhitipa ye kodhdhusa into eema.”
33 Usokka shinshinesiisi iʼupadhipa hasa payu:
“Shinshini karay the miʼaye haayyuna!
Dhuke aghitakko maghako yiʼi,
dhuke Yoosefesi aghitakko memeeqi.”
34 Xaysay tupettay Yaikʼoope laalle thuususikki hela kaaqipa the ooyeete qadhdhadhuppa kuyaqqe kisha qhoota miʼaye huusu maallay ooyoy.
35 Ponkorepa ihaadhdhe huusu kaasay uso dhiktisenukki na kula okaye,
uso naqharray dhuupadhe ye alkasu maallay:
“Qhoota mïʼaye haayyu maallay inna ooyanaki an farri” kippayipa dhikite iishoy,
qhoota miʼaye huusu maallay ooye thiyyisu.
36 Xinkisana nakkataadhesi piyye Midhiyamattena Yoosefeesi rafisampawhe Fereoonenna kittate tookko kodhdhi wanitto tiqitampawhatte Potʼifaaranukki lase.