Yayikʼoope Karo Pethele Kulakki Holi
35
Xaysa tupettay Waako Yaikʼoopena inna payi:
“Haqapa karo Pethelea kula ashshoppa haaha qaakoy,
xeeresi aqharinko haahu Esawona kantta ghoratipa isa ashshonna Waakossi ho arrmadhinu xaytosasa xayto ana teexako dhili gharisay.”
2 Hussa maallay Yaikʼoope ahxke huusu manneetepa koro na qale qagha kaasanna hasinna pay:
“Waakidhdhisa qurratte hune qale qaghaasi hela patisa,
pishko hahundhiisi allheesindha,
laalaadhe haahundhiisikka oohadha.
3 Lammi haqnipa karo Pethele kula ashshini,
ho kuyyaqko rakkitona ye apaqhi,
Waakossi xaytto an ashshi kaasanna ye yela kantta reehammunu an xayto teexakito gharisa.”
4 Hussa maallay waakidhdhessi qurratte kaasasi iʼilla holaseppa,
sire qhametesikka hela shaghonkkippa Yaikʼoopeema teexonki.
Yaikʼoopekka iʼakkipa xiltakkosi Sekemena kantta qagha kaleema maayuy.
5 Xaytusaasi hela hxuronkippa ashshonki,
Waakokka qhooti kathamaadhdhissa usundhe kaaʼita qagha kaasasa ghapko hxurri maallay qhawho usundhe ghora yeqaghi.
6 Yaikʼoopepa korossi na qale qagha kaasay iʼashsheppa piyyesi Luuza ana payi Pethele piyye Keneaanena kittate qaghana hxafonki.
7 Yaikʼoopekka xaytusasi xayto teexakito gharisi:
xaytussanakka “El-Petheleb” na payuppa nu makaxko kodhu.
Moʼo maalla payni xinkessi iqhqharinko huusu qharay ghoradhipa isi ashshana xaytossi Waako naanu armadhi hussa uso.
8 Xinkisana apnathe Ripkʼay Dhipoora fari,
xilltakkosi Pethelena kalay qagha kalema amaayu.
Hussana haqati xaytusana Alonpakutec anapayi.
9 Yaikʼoope piyye Mespetʼomiyannu ihholi tupettay Waako lankakka innu armadhipa sakoy.
10 Waakokka inna payi:
“Haka hantu saasa makaxko haahu Yaikʼoope ahola payi,
xaynu koru Yaikʼoope olo hola paynippa isaho ooqa,
naqarray makaxko haahu Israeele ahola payni.”
Hussa maallay Israeele innapayipa ooqu.
11 Holuppa Waako Yaikʼoopena hasinna payi:
“Ano Waakossi Olho Kaasay Alkasa,
dhaladhpa naqay warshopa toʼokunko waarshito holakki lighne,
poghladhdhekka holaki dhalanne.
12 Piyyessi Aprihaamepa Yisaakʼenu an teexisi hoosikka an teexni,
hola tupettakka piyyiisi sanynye taahunukka an teexni.”
13 Waako xaytusi inna torruyadhinu haqili ihhadhdhi.
14 Yaikʼoopekka,
xaytossi Waako na torruyadhisa awurrko thaayhito ighghaqqi,
awurkusasa na tʼayye woynatte oohxadhuppa zayteesikka na elisu.
15 Yaikʼoopekka xaytossi Waako na qale toruyadhina “Pethele” inna payipa ooqu.
Fartte Raheeleppa Te Yisaakʼe
16 Haaha Pethelenu haqonkippa ashshonki,
iʼpiyye Efraathanna hxafenu okoto patta nu haqhana Raahele qhuqhayte ghapi,
qhuqhaytesikka uuma na dhikiti.
17 Qhuqhaythissa iʼuuma ise rakisanna kaakka dhalsadhy inna payti:
“ Hay olo ghaapi,
hantukka shampo adhdhalintiye!”
18 Ise kapay qhooti farteema itʼtʼuytipa isi liliibha maallay ye faruna qharaʼitha miʼaye hiisina “Peniooned” inna payti,
pappo huusu kapay “Peniyaamee” innapayi.
19 Raheelekka iffarti,
onkesi karo Efraata (taakinti Petheleheme) kula ashshasa amaayu.
20 Yaikʼoopekka hawle Raheele sappeemi awruko thayihito ghaqqi.
Awrukussakka haka hantu saasa hawle Raheeleesikki hiʼaasi.
21 Israʼeele ashanko huusuusi ithiyyisipa thayho Edherenna afe koray tunkaana ghaqqu.
22 Israʼeele ippiyysana qaakana,
Roopele lammithe paappo huusuna Pilha qali rafi,
Israeelekka olissaasi apaqhu.
Shampidhdhe Yaikʼoope hudhanpa lakkissi haadhi hisi.
23 Miʼaadhe Liyayi:
qharitho Yaikʼoope Roopelepa
Simoonepa Lewipa Yihutapa Yisakkoore pana Zapiloone.
24 Miʼaadhe Raheele:
Yoosefepa Piniyaame.
25 Miʼadhe Pilhay hulthite Raheelenna
Taanepa Niftaleme.
26 Miʼaadhe Zilpa hulthite Liyanna:
Kaatepa Aseere.
Shampidhdhi hessi Yayikʼoope ippiyye Mespetʼomiyanna qaakinaki dhali.
27 Yaikʼoope paapposi huusu piyye Kiriate-Arpa taakinti Kepronena kaanta qagha Memre ana payina qaaka Yisaakʼe kulakki ashi,
xaytusakka xaytossi Aprihaamepa Yisaakʼe okaayo kodhdheppa na qaakonki.
28 Yisaakʼekka perko180 hxafasipa
29 keeshuyupa pere kisha qaakoy,
pere huususikka poghghadhuppa faru,
karo appadhdhe huusu kulakka ashshoy.
Miʼaadhe huusu Esawopa Yaikʼoopekka maayadhonkki.