Qhama Shette Yaikʼoopesi Ghapi
34
Shettesi Liya Yaikʼoopenu dhalti Tina kuyyaqako tookko ihaadhdhe piyyisana hiʼenukki lighti.
2 Qhawhossi piyyisa rafisa Ewiyawitosi Hamore na miʼaye huusu ana payi Sekeme iʼise hiʼina ighghapipa na qale rafu.
3 Saqako huusu shette Yaikʼoope Tinatakki napati,
shettisaasi uuma cʼikadhoppa qalliite saqako na hxasesnaasi na qalladhu.
4 Sekemekka paappo huusu Hamorena inna payi:
“Shettiisi ye akki.”
5 Yaikʼoope Sekeme qhamu miʼaye thuusu Tinaasi lokisa iʼapaqhi;
xinkisana ponkore huusu qholaadhdhi yoqhqhe,
Yaikʼoopekka dhelle huusu haki holle saasa dhuupaythakki oladhi.
6 Xaysa tupettay paappo Sekeme Hamore Yaikʼoopeesi qallateesenukki na kula ashshi.
7 Ponkore Yaikʼoopekka olissa kodhdhamadhiisi apaqhniittay miinakalti xaytosi koshenu okaye,
Sekeme dhawre kodhe ye gheeqaseesi qhooti waarsho Israeelattesa kodhipa shette Yaikʼoopeesi ghapu maallay azanokippa uuma miirodhonki.
8 Hamore kapayi hasi inna payi:
“Saqako miʼaye haayyu Sekeme miʼaye thaahundhittakki ghapami maallay,
maʼala qhamu akkininu ye eeʼe paya.
9 Akkettay ille lahxni,
shette thaahundhikka ine teexa,
ihaadhdhe haanisikka sixa.
10 Ine qale qaakekka aʼalkasnanku,
piyye thaanikka thaahundhiye na qaakindha,
xorghadha,
kodhatheesikka kodhathadhapa shorokumanku.”
11 Sekemekka paappo Tinappa allawwe hiisina hasinna payi:
“Hune pattaki ye ghari payni olho ayye kasqatte kaasasi an hune teexna.
12 Kodhdhe teex kayyela payte payni an kodhdhina,
thuukka awwoote kula ghaqitika an teexna,
kapay shettisaasi qhama akkininu ye eʼe paya.”
13 Ponkore Yaikʼoope adhawrassi alawte thuusundhi Tinaama kodhdhamadhiisi poorkoomi ghapadheppa Sekemepa paappo huusu Hamorena
14 hasa payonki:
“Alawte thaaniisikki an qhawho ye karazamunu teexni payni palanko qhooti ine kodhdhini maallay olho hasa lighaasi ini konne.
15 Ikkodhdhakka payni onke an illa xullaanittay toʼote qagha,
thissakka ponkore haahundhi kaasasikki akkarrazteppa isa ineesi lighanku payni patta.
16 Xaysa tupettay ihaadhdhe haaniisi an hune teexnaani,
haahundhiisikka an akkinaani,
waarsho toʼokokka kodhdhaanippa ille qale qaakooni.
17 Karazamettay huni dhukkaysatte payni kapay miʼaye thaaniisi an akkinaanippa ashshonittay.”
18 Qallitesi usundhe itʼtʼoose Hamorepa miʼaye huusu Sekemenu the xeesa innu kodhdhitipa armadhi.
19 Sekeme qhooti ponkore manneetena kittate ho kanasami kodhdhipa shette Yaikʼoopeesi cʼikadho maallay olhossi ana payiisi kodhenu ye olthisukka.
20 Hussa maallay Hamorepa miʼaye huusu Sekeme olhossi an payiisi koro huusundhinu qallinenukki xaytosi kathamana harratte ana illa hollayyi kula ashshe.
21 Hasa payonkippa korosinu qallonki:
“Koru koro nakayhito qhooti kodhdhi maallay qhamu ine qale qaakneppa xaytu woʼe kulakka isi mooruyadhanu nu eʼe payni,
piyyikka inepa usundheesi ihxhxfnay,
ihaadhdhe huusundhiisi an akkinaani,
usundhekka ihaadhe haaniisi iʼakkinanki.
22 Holluppa usundhe hu ine qale qhamo waarsho toʼokko kula kodhdhineppa ine qale qaakenu eʼe payonki tʼiire thaaniki qhamo huusundhi karrazami payni patta.
23 Laadhdhi hasa konni payini irpankaadhdhepa kodhathe pana qhole huusundhi kaasay haani ye kodhdhine?
Hussa maallay olhu payettay na qale gharri,
usundhekka iʼine qale qaake.”
24 Korossi kathamissana mooriteema illa holi kaasay olhossi Hamorepa miʼaye huusu Sekeme qallesa inna ghare,
tʼiire kathamissana qaaka kaasakka karrazamonki.
25 Kuyyaqako izzxanna hessi karazame payshe huusundhi haannay ye dhinonkinna dhelle Yaikʼoopenna kittate qhawho lakki alawwe Tiina Simioonepa Lewi koorataadhdhi sixadheppa tutuppe kathamassi kula xullonkippa tʼiire kaasasi paaxonki.
26 Hamorepa miʼayessi huusu Sekemeesikka koratettay paaxonkippa alawte thuusundhi Tinaasi ho Sekemenna manneete yokonkippa qakonkittay.
27 Dhelle Yaikʼoope kaasay mannadhessi koro na farri kulaki ashsheppa kathamassi ana alawte thuusundhi ghapiisi saronki.
28 Irpankaadhdhe qeemmetepa he taleetepa qhole pana harraadhe holuppa kodhathe katamissapa piyyisana qagha kaasasi sixonki.
29 Kodhathe thuusundhi kaasasi sarokippa xiskepa miʼaadhe huusundhiisi pojuyonki,
olho mannaadhdhe huusundhina taye kaasaasikka sixonkippa ashshonkittay.
30 Yaikʼoopekka Simioonepa Lewina hasinna payi:
“Keneanaadhepa Ferzawaadhdhi piyyinna qaakana miinatte ayye hxinooste,
qhama rakkaninuka ye kodhanku.
Ine dhihakkito an qhacʼaani,
illeemi kodhdhineppa ya haqonkipa ye orxamonki payni anopa ahxke haayyu an pannaani qandhi?”
31 Usundhe kapay hasina paye:
“Eemma alawte thaaniisi qhamo shette ghuppeʼitha tʼiire qale qaaka kulakki ghapanni?”