Yaikʼoope Esawo Qhamu Illay Hxafe
33
Yaikʼoope ishshokipa emmadhdhunna,
Esawo qhawho 400 nukki inthawipa isi okaayna,
akko ale ihhxafi!
kippayi.
Hussa mallay dhelle huususi xiskke husu Liyapa Raheele pana xiskke hulthame huusu lakkinukki illena kalla qhooti.
2 Payyotatte xiskke hulthame huusu lakkipa miʼaadhe huusundhisikki inthoosi,
lankana Liyapa miʼaadhe hiisisi nakaleematte laghghu,
dhikkattattekka Raheelepa Yoosefesi he kaasanna keetasoy.
3 Yayikʼoope kaasanakki inthawipa inni ashshana,
haaki qharunko huusu Esawona kanta hxafni saasa thara taxxay mintettay haaki piyatte hxafnisa ghuladhuppa nu xasu.
4 Esawo kapay usona kanta hxafenukki inna kula soripa,
amoiʼtha tʼabhbharadhuppa mayuy,
lakkinttoy illa ooyonki.
5 Nakala Esawo qila paypa emmadhdhunna xiskke pana miʼaadhe hiʼi,
usokka:
“Hisi ho qale qagha koro yaxay?”
Kippayipa kasqadhu.
Yaikʼoopekka inna payina:
“Hisi kulay he Waako teexakkoo huusutay ano kodhampakko haahunu teexi miʼaadhe hayyu.”
Kinna payi.
6 Xaysa tupettay xiskke hulthame huusu lakki miʼadhe huusundhi illakki okayeppa minttettay haaki piyyaatte hxafne saasa ghulladhonkippa nu xasonki.
7 Nakala Liyapa miʼaadhe hiisiki okayipa minttettay haaki piyyaatte hxafne saasa ghulladhonkippa nu xasonki.
Dhikkattatte Yoosefe pana Raahelekka iʼokayeppa minttettay haaki piyyaatte hxafne saasa ghulladhonkippa nu xasonki.
8 Esawokka:
“Emma irppani akkaro haayyu dhanipa okaasu kaasay he moyto?”
Kinna payi.
Usokka:
“Pogholho haayyu,
minte thaahunakki an gharri mallay.”
Kinna payi.
9 Esawo naqharay:
“Qaso hayyu,
ano hoye hxafna an sheeghi,
haahu ihosi kodhdha.”
Kinna payi.
10 Yaikʼoope kapay ippayina:
“Ihaasa kodhdhe hxurtta,
dhukkeemattekki an hola minatte ghari payni maʼala thaahu teexakko haayyusi yela akkadh.
Qhota yeesi cʼikno hiʼastinu,
husi an miinte thaahu hiʼi kati miinte Waakitosikki an hiʼi kulakki an dhihadhi.
11 Waako cʼikknottay ollho ye gheeqasa kaasasi iyye hoqhqhashipa ye teexu mallay teexakusa anho itʼtʼoosisi akko maʼala yela akkadh!”
Kinna payi.
Yaikʼoopekka uuma qhoti wathadhi mallay Esawo teexakkosiisi inna akkadhi.
12 Esawokka:
“Lammi haqnipa ashshankko haanisi thiyyisni anokka ho qale an ashshniye.”
Kinna payi.
13 Yaikʼoope kapay hasinna payi:
“Pogholho haayyu,
miʼaadhe haayyu qhama hiiti kula iqaghghomanki.
Qeemme shurashapa loʼaame shurashana,
laaqhqhumme huusundhiisi pankadhe ye gheeqasa.
Qholeesikka an wadhnetay kuyyaqako tooko dhaanni payni ihhumna.
14 Hussa maallay pogholho haayyu:
atho qharaʼitha inthawpa ashshoy,
anokka qholi an dhaanipa miʼaadhe haayu illay lokko ho kaleema okaynipa piyye thaahu Seyresa ho dhaghghapaye.”
15 Esawoka inna payi:
“Lammi koru ye qale qaghana anaho qhoota” Yaikʼoope kapay inna payi:
“Pogholho hayyu,
moonukka ye rakkatti?
Ye akkadhe thaahu pattakki ye hxafnaye.”
16 Hussa maallay Esawo kuyaqakussanaki karo piyye Seyre kula holenu haqi.
17 Yaikʼoope kapay karo piyye Sukootea kulakki ashshi,
xaytusasa kanasko ghupadhuppa qholenukka keero gharisu,
hussa maallay xaytusana Sukoote napayuppa nu makaxako kodhu.
18 Yaikʼoopekka ippiyye Mespʼetʼomiyanu holi tupettay xaytossi piyye Keneaanena kittatte qagha Sekeme kulakki nakayhottay dhaghghapi,
kathamissana miinta qaakoy.
19 Xaytussa inna tuunkaana ghaqqisikka dhelle Hamorenna 100b pithamu,
Hamorekka paappo Sekeeme.
20 Haama xayto ana teexako dhilli gharisuppa:
“Waako Israeelate Haallikko” payuppa ooqu.