Yaikʼoope Qharunko Huusu Esawo Illay Illaa Lighenu gharrsadhi
32
Yaikʼoope lammi ashanko huusu ittiyysi;
erkampattadhdhe Waakitokka onkate nalighghonki.
2 Iʼusundhe hiʼina hasi payi:
“Xaytu ho Waako Erkampatadhdhe huusu illay natayami” hussa mallay xaytusana Mahanayima kinna payipa ooqu.
3 Yaikʼoopekka qharunkossi huusu piyye Ettomenna ghodhdhe Seyir ana payina qaaka Esawo kulakki inntosipa errkampawhe eraku.
4 Hasakka na payuppa hayu:
“Pogholho haayyu Esawona hasana paya:
‹Kodhampakko haahu Yaikʼoope hasi payi:
«Laapa kapeema an qakadhipa haka hantu saasa haaha qaako.
5 Haadhi hantu qholepa harraadhepa irppanko qeemmetepa ho taleete,
holuppa kodhampawhe tʼiirepa ihaadhe an sheeghi;
hantukka olhanna maallay poghlho hayyu kula erakasami woʼoko haahu xeesa qhaman tayaninu.»›”
6 Korossi aerakikka Yaikʼoope kulaki holeppa hasa na payonki:
“Qharunko haahu Esawo kulakki an ashshini,
Usokka hoosi akkadhenukki okaayi,
uso qalekka qhawho dhippa salaxki qagha.”
7 Yaikʼoopekka uumi ghaapipa korossi na qalle qaghasi xayto lakkisa qhootu,
holuppa qeemmepa talaadhdhepa qholaadhdhe pana kaalaadhdhekka lakki lakkisi qhooti.
8 Olhuna maallay hasa kodhikka Esawo okayipa qhottatte payyotatesi paaxu payni,
qhottatte toote ippinninaki payipa dhihadhoy.
9 Xaysa tupettay Yaikʼoope hasi payipa ghissadhu:
“O,
Waako,
paappo haayyu Aprihaameppa Waako paappo haayu Yisakʼe!
‹Hossi karo piyye thaahupa kaaro dhalitho haahu kula holma anokka ollho xeesa anho konniye› yela payiti Haallikko haayyu.
10 Ano ayilito haahunu cʼiknossi ye ohaamipa dhukkaysathame hasa lighaasi ye hiʼaasenu ano ho gheeqasa qandhikka.
Kolle yortanoosenna an tahxhxana tollakko xarghgho hayyuna qagha malettay olho pile anu sheeghikka.
Hantu naqharay warsho hxittatte lakki an kodhdhi.
11 Xarghgho qharunko haayu Esawona qhamaye dhinisintinu anho waathadha;
iʼokaynapa yeesippa yaayadhiisi miʼaadhe husundhi illay paaxu kan payipa ghaapoye.
12 Naqharray atho pukkaqate taahuna ‹Ollho xeesa anho konni,
sanynye thaahuusi qhama taxaakkosi pasito hinaseete dhihe olo alkasi kulaki an naqisni› ayela payti.”
13 Awnisanakka Yaikʼoope haamatti rafi;
shorokunkossi sheeghinakka qharunko huusu Esawonu qhamu teexninu hisisi na qhooluy:
14 talte 200,
ghopolho 20,
qeemte 200,
orppo 20,
15 kaalaadhdhe he shurasha 30 miʼaadhe husundhi illay,
loʼo 40,
qardho 10,
harraadhdhe dhalito 20 haradhe qanghawe 10.
16 Hisisikki irppantaadheema illena kalla reehipa nu koshnampawhe xawwadhu,
koshnampawhesinna hasa payu:
“Yela qharaʼita intawapa ashonku,
irppankadhisaasi ellena kalla sikapoosapa dhaanaku.”
17 Yaikʼoope intawampakkosina hasi na payipa hayu:
“Esawo hooma axafipa:
‹Ato haaxa?
Aha kulakka ashshiti?
Qholadhdhi adhdhanti kaasay haaxa?›
hola payuppa ho kassqadhu payini,
18 ‹He aylitto haahu Yaikʼoope,
pogholho haayyu Esawonukki teexakko kodhdhine,
usokka ine kaleemi okaayi› na payi.”
19 Koshnampawhe lankappa he isxapa he irppankaadhdhe dhaana pana pilaawhesikka hasi payipa hayu:
“Esawosiki attayte payni qhamussa kula nu qalla,
20 holuppa ‹Ayylito haahu Yaikʼoope ine kaalematti okaayi.›
payesi olo thaymodhe.”
Husisikka olhu nu hayi:
“Esawo yeya xafunna qharaʼita teexakussa hayyu intawnapa uso dhaghghapu payni yaaxaaray saqako huusu inna shalalaapa ye qhararsadhuppa mintte tuusu na hiʼa” kipayipa dhihaadhoy mallay.
21 Hussa mallay teexakkosi qhareʼita eraki;
uso kapay xaytosi na qaghisa irrafi.
Yaikʼoope Waako Qalemi Ohxhxmami
22 Kallapkusana Yaikʼoope ihhaqipa xiskke huusu lakkisippa,
xiskke hultamesi huusu lakki pana,
dhelle huusu hudhdhappa toʼonsi akkuppa tahxhximpakko Yapokʼenna tahxhxuy.
23 Iʼusundhe tahxasipa laghghu tupettay mahxhxe qagha kaasaasikka ittahxhxasi.
24 Yaikʼoope kapay uso pattakki haama haqhi,
qhawho tookokka haaki qhayti saasa isi uso oohxama.
25 Qhawhusakka Yaikʼoopesi ohxhxmathottay qhamu ye punnisa iʼupadhina tafunna shoqhi,
Yaikʼoopekka iʼohxamana shokitte thuusu xaytossi na ille ghapatinaki dhuuqamti.
26 Xaysa tupettay qhawhossi:
“Xayto qhayete qaghiye ye hxuripa an ashshi” kinnapayi.
Yaikʼoopekka inna payina:
“Athu ye saku payni anu ho hxurrini.”
27 Qhawhossikka inna payina:
“Makaxko haahu yaxa?”
Usokka:
“Makaxko haayyu Yaikʼoope.”
Inna paay.
28 Qhawhossikka inna payna:
“Lammi xaynu koru makaxko haahu Yaikʼoope olo hola payni,
Waako qalekka qhawho qalekka aohxmamitipa puttay mallay makaxko haahu ‹Israeeleb › ahola payni.”
29 Yaikʼoopekka:
“Akko maʼala,
makaxko haahu ye qalli.”
Kinna payipa kasqadhu.
Qhawhossikka:
“Makaxko haayyu arenu monukka gheqti?”
Kippayipa xaytusasa sakoy.
30 Hussa mallay Yaikʼoope:
“Waakoosi ehxhxe hayyutaakki an hiʼi,
qagho haayukka pinnu” hussa maallay xaytusana makaxko husu “Pinielec” na payu.
31 Pinielenuki ihhaqipa isi ashshana oqhqhaye na lighi shokitte qhooti na qhararatti maallay isi xokkola.
32 Husanna paayyatti haaka hantu saasa Isiraeelaadhdhe sakankosi tafopa shokitesi ella ghapaasi ye yiʼe.
Moʼo maalla payni xayto Yaikʼoopena tafopa shokittesi ella ghapa na shoqhadhi mallay.