Yaikʼoope Ho Laapanna Manneti Hxafi
29
Yaikʼoopekka ashshanko huusuusi ithiyyisipa piyyessi koro karo oqhqhaye lighattay qaakana hxafoy.
2 Xaysannakka liqakkito xayto qeemme irpanko izzax rafenna kaanta hxohxno qandheete hiʼu.
Qemmisakka hxohxnusanaki qandhe qukkye,
hxohxnussa qandheetekka awrukko dhaqqamma ana pako qhadhdhumittakki sheeghi.
3 Qeemme irpankussa kaasay xinki hxohxnussa kapa illa holenna koshnampawhe awrukusaasi inna sukkasapa isi qeemmesiisi qandhe qukise;
xaysa tupettay awrukkosiisi inna holasapa isi hxohxnusi qhadhdhume.
4 Yaikʼoopekka koshanampawhessina hasinna payipa kasaqadhu:
“Dhelle haani!
Xankanukka okayte?”
Usundhekka inna paye:
“Piyye Karaanenukka okayni”
5 Usokka inna payi:
“Opopko Nakoore Laapaasi aʼaranku?”
Usundhekka inna paye:
“Ee an araani.”
6 Usokka inna payi:
“Innakaysadha?”
Usundhekka ina paye:
“Ee innakaysadha,
laadhdhi miʼaye thuusu Raheelekka korraadhi qeemmi dhaantipa isi okaayay.”
7 Yaikʼoopekka inna payi:
“Qhama hiite kula xayto hannay kuyyaqate,
saate anna qeemme qaakasinte ye taamu,
emma moonukki qeemme hahundhiisi huni qandhe qukisteppa yoqhqhanku?”
8 Usundhekka inna paye:
“Kulay koshnampawhe kaasakki qeemme huusundhi ye illa holasonkippa awrukussa na sukkasonki payni ine patta ini alkane,
xaysa tupettay kapay qeemme haanisi an qukisnaani.”
9 Yaikʼoope ihhaannay koshnampawhessi qale thorruyadhana Raheele qhooti koshshitte kodhdhiti maallay qeemme paappo hiisinaki dhaantipa okayi.
10 Yaikʼoope ishshettesi alawho yaye thuusu Laapa Raheelepa qeemme apiyya huusu Laapa hiʼina hxohxnossi kulakki ashshipa awrukkosiisi hxohxnosina pakito sukkasoppa qeemesi apiyya huusuna qandhe qukisu.
11 Xaysa tupettay Yaikʼoope Raheeleesi immayipa,
ikkito huusu uuma naqisuppa ooyoy.
12 Yaikʼoopekka inna payi:
“Ano kulay alawte paappo haahina miʼaye Ripkʼay.”
Isekka hermathotakki ashshitipa paappo hiisinu qalli.
13 Laapakka ashshinko huusu Yaikʼoope qhamu okayisa iʼapaqhina uso akkadhenukki waadhettay na miinta lighipa tʼabhbharadhuppa mayyu tupettayi manne huusu kula ashshottay;
Yaikʼoopekka olho kodhdhamadhi kaasaasikki Laapanu torruyi.
14 Laapakka ina payi:
“Dhukkeema atho kʼeqhte thaayyu.”
Usokka leeqqo tookko inna qale oladhi.
Yaikʼoope Liyapa Raheleesikki Akki
15 Laapa Yaikʼoopena inna payi:
“Qhoota ashinko haayyu kodhdhiti maallay patta hasa yeesi kodhadhe yeho gheeqasi,
hussa maallay reero haahu moʼo?”
16 Laapa ihaadhdhe lakkiisikki sheeghi qharumtatte Liya ana payi qasattekka Raheele ana payi.
17 Liya the ehxhxe nakilame,
Raheele kapay shikkarte thiisi the xeesappa miinte thiisikka the uuma xeesa.
18 Yaikʼoopekka qhooti Raheele cʼikadhi maallay:
“Shethissay thaahu takkaya Raheelesikki ayye teexinti payni perko taxxanki anho kodhanni.”
19 Laapakka inna payi:
“Qhawho pilenu teexeete kaanta hoosi teexe ye woyyaye hassasa ye qale gheyya.”
20 Yaikʼoopekka Raheele akkenu perko taxxanki kodhadhi,
qhooti uuma ise cʼikadhi maallakka perko taxxan qhamo kuyaqqe qhacʼa kulakki nu kodhdhe.
21 Xaysa tupettay Yaikʼoope Laapana inna payi:
“Haadhi perresi an illa xulli idhdhikadhe,
hussa maallay xaante thayyuusi ye teexpa an qaruyna.”
22 Hussa maallay Laapa koro piyyisana qagha kaasakki ooqipa yiʼo yiʼashoy.
23 Iʼawnuytina Laapa miʼaye thuusu Liyasiki okaasipa Yaikʼoopenu teexu,
Yaikʼoopekka inna qale rafi.
24 Laapa hulthitte thuusu Zilpasikki akkipa miʼaye thuusu Liyanu qhamu hultitte kodhdhintinu teexu.
25 Xayto iqhqhayina Yaikʼoope tena qale rafti Liya qhamu kodhdhitisa iʼupadhi!
Hussa maallay Yaikʼoope Laapana inna payi:
“Ata oli mayela kodhatti?
Ho anna maallay ho kodhadhi Rahele qandhi?
Emma monukki ayye tatakti?”
26 Laapakka inna payi:
“Aata piyye thaanina qharumte immannete ghayyana qase yeakkatikka,
27 Kuyyaqissa thaxxan sawdhate poghghipa,
lammi xaysa tupettay perko thaxxanki ayye kodhadhinti payni Raheeleesikka anho teexnaye.”
kinna payi.
28 Yaikʼoopekka qallitesisa inna ghari.
Ille qale kuyyaqako thaxxan xaane tupettay,
Laapa miʼaye thuusu Raheeleesi Yaikʼoopenukki teexi.
29 Laapa hulthite thuusu ana payi Pilha qhamunu hulthitte kodhdhintinukki miʼaye thuusu Raahelenu teexi.
30 Yaikʼoopekka Raheele qali rafi,
Liyanu ghulasuppa cʼikadhoy.
Xaysa tupettay lanka perko taxxan Laapanu kodhadhu.
31 Haallikko Liya qhamu ye cʼikathamuusi ihhina qhamu miʼaadhe dhale alkasintinukki mane dhalito nu qhaashi,
naqharay Raheele dhopantte.
32 Liya ishsheeghtipa shampo dhali.
“Haallikko qhooti rakko haayyuusi emmi maallay tʼiirakko haayyu iyye cʼikanna” kippaytipa miʼayesinna Roopelea napayippa nu makaxko kodhi.
33 Laanka sheeghoppa shampo dhali.
“Haallikko qhamu olo ye cʼikadhisa iyye apaqhipa miʼayiisi ye teexu.”
kippaytipa Simooneb payippa nu makaxko kodhi.
34 Hantukka sheeghoppa shampo pile dhali,
“Lammi shampo izzxay qhootannu dhali maallay tʼiirakko haayyu iʼye kula itʼtʼuyna.”
kippaytipa miʼayisana Lewic napayippa nu makaxko kodhi.
35 Hantukka sheeghoppa shampo dhali:
“Thannu Haallikkoosi an kalataysadha.”
Kippaytipa makaxko huusu Yihutad nu kodhi.
Xaysa tupettay dhaloosi ishshikkaarashti.