28
Yisaakʼe Yaikʼoopesi iʼooqasipa sako tupettay hasi payipa nu hayo teexu:
“Moʼo kaki kodhdhinti payni ihaadhdhe piyye Keneaanattena naxaye inna akku.
2 Hantu miinakale haqapa karo piyye Mesopetʼoomiya paappo yaaye tnaahuna na qaaki ho Patueele kula ashshoy.
Hahatikka ihaadhdhe apiyya haahu Laapanna kittate tootte akkay.
3 Waakosi Olho Kaasa Alkasaa ihho saki!
Waarsho kisha haka kodhdhinti saasa dhaladhpa sanynye thaahuusikka innaqisa!
4 Piyyi Waako Aprihaamenu teexipa athokka okaayo kodhdhappa isa na qaakay qhamu hoosi teexninu sakessi Aprihaamenu teexisi hoosippa sanynye thaahunu itteexa!”
5 Yisaakʼe onke hasa lighatakki Yaikʼoopeesi karo qhawhossi piyye Mesopetʼoomiyanna qaaka Soriyittosi ana payi Patueelena miʼaye huusu Laapa kula eraki.
Qhawhusakka yaye Yaikʼoopeppa Esawo Ripkʼana alawho hiisi.
6 Esawokka Yisaakʼe qhamu Yaikʼoopeesi sakipa naxaye akkenukka piyye Mesopetʼoomiyanna xaytosi ana payi Padhan-Aram kula erakuppa kuyyaqakussa issakinakka ihaadhdhe Keneanattena qhamu ye naxaye akkininu nu hayo teexussa iʼapaqhi.
7 Yaikʼoope qhamu woʼo paappopa yaye dhikisenu karo piyye Mesopetʼoomiya kula ashshisa Esawo iʼupadhi.
8 Hussattay paappo huusu Yisaakʼena ihaadhdhe piyye Keneaanatte qhamu mala ghaqqiti na maghessa iʼari.
9 Husa maallay Ismaeele kulakki ashshipa shampossi miʼaye Aprihaame Ismaeele dhali Napayotena alawte thuusu ana payi Mahileteesi xiske lakkisisa padhawuppa akku.
Ulsinke Yaikʼoope Piyye Peetelessa Ulseedhi
10 Yaikʼoopekka piyye Persapenukki haqipa karo piyye Karaane kula isi ashsha.
11 Ixxayto toʼonna hxafina oqhayye qhooti xulliti maallay xaytosi hxafisa irrafe hela ghadhipa awrughghe xaytusana kaanta qaghana tookoosi kasidheesadhoppa rafu.
12 Ulsinke huusuttaka ayyi kati shanshikko piyyenu moonthito hxafa shikkaaripa erkampattaadhdhe Waakito isinna hadhdhapa isinna oodhdhanakki hiʼi.
13 Haallikkokka na kapeemi shikkaaripa hasa na payu:
“Waako paappo haahu Aprihaamepa ho Yisaakʼe,
Ano Haallikko!
Kappisa anna rafti hoosippa sanynye thaahunukki an teexni.
14 Sanynye thaahu qhamo thaxakko kappatte kulakki naqinti,
holuppa karo oqhqhayye xullappa ligha,
karo ghutuppa kalu kulaki aghandhaqinti;
waarsho piyyadheete qagha kaasay athopa sanynye thaahutakki sakamni.
15 Ano ho qale!
Xayto aʼashshiti kaasakka an ho tiqanna,
piyyi kulakka ho holasa,
kipposi an hoxuliisi an ho dhikkisna,
moʼokka payni anu ho hxurikka.”
16 Yaikʼoopekka piʼathatte thayripa hasa payu:
“Dhuke Haallikko xayni qaghi,
ano kapay anu arukka.”
17 Usokka ghapkotakki hasa payi:
“Xaytu ho mala hasa koro ghaapisa!
Xaytu manne Haallikkito kodhdhe gheeqasa,
husi ghinte monthito.”
18 Yaikʼoope haqhayna sinkatho awnetakki haqipa awrukkosi ikkasidheesadhi awrukko hawleete kula shikkarashu;
na sappeematekka zayte elisu.
19 Xaytusanakka “Peeteleb” na payuppa nu makaxko kodhu,
xayna qharʼitha kathamissana “Luuza” ana payi.
20 Xaysa tupettay Yaikʼoope hasi payipa silatadhu:
“Waako ye qale kodhdhipa onke an ashshi kaasakka yetiqadhoppa yiʼo ayiinipa laalle an urkuyni ye teexuppa,
21 manne paappo haayyu kula nakayhottay ye holasu payni Haallikko Waako haayyu iyye kodhdhini,
22 Awrukku an ghaqqi manne Waakkito ikkodhdhini,
shorokunko ayye teexinti kaasanna xargho hudhdhanna tookko hoosikka teexni.”