Yisaakʼepa Apemeleke
26
Laaqessi kedhdhay perre Aprihaamenna lighti tupettay laaqe pilatte laanka piyyisasa lighi,
husa maallay Yisaakʼe xaytossi nikusa piyye Filstʼeematte Apemeleke na qaaki karo Kerara kulakki ashshi.
2 Hahaatikka Haallikko Yisaakʼenu innu armadhipa hasana payu:
“Piyye ano ho qallisa ghayyama karo piyye Kiptʼatte kula olo oodhdhi.
3 Xeere qhacʼa piyyissa ghaayyama Anokka ho qale an kodhdhiniye,
Anho saknakka;
piyyi kaasaasi athopa sanynye taahunu teexa,
katapessi an paappo haahu Aprihaamenu xuliisi an dhikkisna.
4 Sanynye taahuusi qhamo xuske moontito kulaki annaqisni,
piyyi kaasaasi sanynye taahunukki an teexni,
waarsho piyyatte qagha kaasay sanynye taahutakki sakamni.
5 Hussakka Aprihaame qhooti kʼaale Taayyu apaqhipa hayopa tampe pana hikke thaayyu kasaasi tiqithadho maallay.”
6 Hussa maallay Yisaakʼe piyye Keraaressi qaaki.
7 Koro piyyisana qaaka:
“Ripkʼa moʼo taahu?”
inna payeppa kasqadhonkina Yisaakʼe inna payi:
“Alawte thaayyu :”
Moʼo maallay payni “Ripkʼa xiskaththo thaayyu ” inna payi payni ise qhooti te uuma xeesay kodhdhiti maallay,
koro piyyisana ise maallay qhamu ye uso poghnekki ghaapi.
8 Yisaakʼekka perre dhammakki haaha qaaki tupettay nikusassi Filstʼeematte Apemeleke ibhbhaaqhettay ghinte kata tutuppe emmadhdhina Yisaakʼe Irripkʼaasi ghaghappadhanaki hiʼi.
9 Hussa maallay Apemeleke Yisaakʼeesi iʼooqasipa hasa na payuppa kasqadhu:
“Keenni Ripkʼa naxaye taahu!
Emma monukka appaytina:
‹Alawte thaayyu ›?”
Usokka hasi payipa nu holasu:
“Kulay naxaye thaayyu an payi payni koro piyyinna qhoota hiisi maallay iyye poghna an payipa ghaapo.”
10 Apemelekekka inna payi:
“Moʼonukka olho hasa ligha ina kotti?
Koro haanina kittatte qhawho tooko hola naxaye taahu ghapu payni cʼuppo aʼina okasasti qandhi?”
11 Apemelekekka hasi payipa waarsho kaasanu hayo teexu:
“Qhawho aqhawhuusi taakki naxaye tuusuusi kohxi fartetakki kʼatʼtʼaʼamni.”
12 Yisaakʼekka piysana manghosikki pooxadhi Haallikkoka innu sakipa perkussana xargho dhippa awshasu.
13 Usokka haki uuma shorkumni saasa kodhatte inni kodhatte sappeema nu padhawamanakki ashshiti.
14 Qhooti qeemmepa thalepa qhole pana hultaame kisha sheeghi maallay korossi piyye Filstʼeemattena innu yooke.
15 Hussana paayyatti Filstʼeemadhdhesi ihhaqeppa hxohxonidhdhessi qandheete kedhdhay Aprihaame ye farunna qharaʼitha hulthaame huusu qhote kaasasa na piyye hoqhashonkippa mammayonki.
16 Apemelekekka Yisaakʼena inna payi:
“Piyye thaanina lighpa ashoy;
inena kaanta atho qhawho dhikita akkodhdhitiye.”
17 Yisaakʼekka xaytusaasi ihhela hxuripa ashshoy foqholho Kerarassa xayto ghapadhuppa haama qaakoy.
18 Yisaakʼekka hxohxonidhdhessi qandheete kedhdhay paappo huusu Aprihaame qhothasipa iffari tupettay koro piyye Filistʼeematte na mayonkiisi ihholipa lanka pootasoy,
makaxessi kedhdhay paappo huusu nu kodhittay ooqa.
19 Hulthaamessi Yisaakʼekka foqholhossinna kittate ihhxohxno qandheete qhothana qandhe hxohxnusi nu kalu lighaasikki taye.
20 Naqharray koshnampawhe piyye Keraranna “Qandhi kulay haani!”
kippayeppa koshnampawhesi Yisaakʼe illay ille paxonki.
Yisaakʼekka hussa maallakki hxohxnussana “Esekʼea” payipa nu makaxko kodhu.
21 Hulthaame Yisaakʼekka ihholleppa laanka hxohxno qandheete pilaakko qhothonki,
naqharray hantukka paqhatho pile holipa haqu.
Hussa maallay Yisaakʼe hxohxnusanakka “Sitʼinab” inna payipa nu makaxko kodhu.
22 Yisaakʼekka xaytusaasi ihhela hxuripa hxayto pileema hxohxno qandheete qhothoy;
xinkissana thannu qhawho toʼokokka paqhatho yena haqisu;
hussa maallay hxohxnussa qandheetena “Hantu Haallikko xayto ghandhaqqa iʼine teexi;
inekka kappeema an naqanaani” kippayipa xaytusana ‹Rehopoote›” na payuppa nu makaxko kodhu.
23 Xaysa tupettay Yisaakʼe karo piyye Persapec kulakki haqipa ashshoy.
24 Xinkissana awnatte Haallikko nu armadhuppa hasana payu:
“Ano Waako paappo haahu Aprihaame ho qaleye olo ghaapi,
Anho sakna;
qhoota kodhampakko haayyu Aprihaame maallay sanynye thaahuusi annaqisna.”
25 Yisaakʼekka xaytusasi xayto ana teexakko dhilli gharisipa makaxko Haallikkito ooqu,
qaakko huususikka haamatte holasu,
hultaame huusukka hxohxno qandheete pileesi haama qhotonki.
26 Apemeleke soropittossi huusu ana payi Azekotepa hayampakkosi koro orxankitona Fekole illaki piyye Kerarannu haqipa xaytosi Yisaakʼe qaghina hxafoy.
27 Yisaakʼekka hasi payipa usundhe kasqadhu:
“Ayye shikkiteppa ye ghoranku tupettay hantu moyto okayte?”
28 Usundhekka hasinna payeppa nu holasonki:
“Dhukke Waako qhamu ho qale qaghisa an upanni,
hussa maallay inepa hola kittatte katape an ille xullaaniki gheeqasa hussakka akkutte dhikkitakki kodhdhinti,
29 hussakka qhamu ini ho kottaoonippa xesno ho kodhaanippa nakayhottay ho laghghaani kula athokka qhamu atu olho magha inena kodhintinu.
Hantukka karay Haallikko ihho sakiye.”
30 Yisaakʼekka yiʼosikki gharisipa usundhe yiʼashoppa qukisu.
31 Haqhayna sinkatho awnettay ihhaqeppa ille katape xulonkki,
Yisaakʼekka usundhe laaghghu,
usundhekka nakayhottay ashshonki.
32 Kuyyaqakussana hulthaamessi Yisaakʼe iʼokayeppa qhoota hxohxnosi qandheete iqhqhothe kaaʼitha hasa payonkippa Yisaakʼenu qallonki:
“Qandheesi kulay an tayni!”
33 Usokka hxohxnossi qandheetena “Sapehid” inna payipa nu makaxko kodhu,
hussana paayyatti makxko katamissana haka hantu saasa “Persape” ana payi.