Fartte Aprihaame
(Ot.1 1:32-33)
25
Aprihaame naxaye pile te Ketʼura ana payiisikki akki.
2 Isekka:
Zemiraanepa Yokʼisaanepa Metaanepa Miitiyamepa Yispoʼaakke pana Siwehiinesiki nu dhalti.
3 Yokʼisaanekka Saapapa Titaanesiki dhali,
dhelle Titaanekka:
Asooraadhdhepa Leʼusaadhdhepa Le’uumaadhdhe.
4 Dhelle Miitiyamekka:
Keferepa Eferepa Hanoohepa Aptaae pana Eltaate.
Hissa kaasay dhelle Ketʼuray.
5 Aprihaamekka olhu sheeghi kaasaasi Yisaakʼenukki teexi.
6 Aprihaame hannay ye farunna qharaʼita miʼaadhessi xiske piileete dhalinu teexakko innu teexipa mi’aye huusu Yisaakʼe na kalla qhamu sikaapuyneppa qaakonkinu karo xayto oqhqhaye ligha kula hela laaghghu.
7 Perre Aprihaame kaasay aʼilla holasina perko 175ki qaaki.
8 Usokka perre dhamma poghghuppa keeshsha xeesaasi ikkeeshuy tupettay napse tuusu nalighippa faru;
dhalitto huusu kulakka ashshoy.
9 Dhelle huusu Yisaakʼepa Ismaeelekka hawlesi qhawho piyye Ket’awatte kodhi pasho miʼaye Soaare Efrone ana payi Memrena kanta qagha xayto Makfela ana paysa maayasonki.
10 Pashusakka hoossi Aprihaame qhawho piyye Ket’aawttena pitami,
naxaye tuusu Saara kapeema haama amaayu.
11 Aprihaame iffari tupettay Waako Yisaakʼesi issaki.
Xinkisana Yisaakʼkka xayto Peri-Lehay-Rooi ana payinaki qaaki.
Dhelle Ismaeele
(1Ot. 1:29-31)
12 Miʼayessi kodhamppatte Saaray shette piyye Kiptʼatte Akkaare ana payi Aprihaamenu dhalti Ismaeelena sanynye tuusu xayna kalakata hasi lighti.
13 Miʼaadhe Ismaeelenna makaxe perre huusundhittay ille kaleema haadhi hisi:
qharitto Ismaeele Nepayotepa nakala Kʼedhaarepa Neptaeelepa Mepisamepa,
14 Masimaepa Dhumapa Maasapa,
15 Kutaanepa Temaanepa Yitʼurepa Nafishe pana Kʼetima.
16 Hisi miʼaadhe Ismaeele,
usundhekka xaytu ashsheppa isi qaaka kaasanna kaffessi hudhappa lakina makaxe huusundhi.
17 Ismaeeleka perko 137ki poghghipa faru.
18 Sanynye Ismaeele piyye Kiptʼattena xayto oqhqhaye ligha kula onke piyye Asoore kula ashshanna piyye Hawilappa piyye Suurenna kittatte iqqaake,
qaako huusundhikka sanynye tuusundhi illaki ille papaaxeppa illena kalla sikaapuyonki.
Yaikʼoopepa Esawo
19 Miʼaye Aprihaame Yisaakʼena sanynye tuusu tisi.
Aprihaame Yisaakʼesikki dhali.
20 Yisaakʼe Ripkʼaasi akkana perko huusu perko hudhanko salax.
Isekka shette qhawho piyye Sooriyay xayto Mespet’oomiya ana payina qaaka shette Paatueele,
qhawho piyye Sooriyay Laapa ana payina alawte tuusu.
21 Ripkʼa qhooti dhopantte kodhdhiti maallay Yisaakʼe qhoota hiisi mallakki Haallikko ghissadhi.
Haallikkokka ghissoote tuususi apaqhu,
Ripkʼaka sheeghoy.
22 Dhelleka karqittito kittatte ille dhudhuuke payyonki,
isekka “Oli moonuki hasa yeema kodhamadhi?”
ki paytipa Haallikoosi kasqadhenu ashshoy.
23 Haallikkokka hasina payi:
“Waarsho lakki karqitto haahina kittatte qagha,
korussa lakki hela kittatte qagha qawni qawniki lighne;
tookito kaantta tookko ikkookisanna;
qharunkoka qasonukki kodhampakko kodhdhini.”
24 Kuyyaqako inna dhalintikka ihxhxafina karqitto hiisina sallaaxe shampo lakki dhalti.
25 Miʼaye qharitteema idhdhaltti ho iidhdha,
dhakintte tuusu kaasaka kaso heneqqe,
hussa mallay makaxako huusuka Esawo anu kodhi.
26 Xaysa tupettay qaso huusu dhaladhi,
xargho huusutakka kamintako Eesawosikki ghapadhipa lighu,
hussa mallay makaxko huusukka Yaikʼoope anu kodhi.
Ripkʼakka miʼaadhe hiisisi idhdhalanna Yisaakʼe perko hudhanko tappi hxafasi.
Eesawo Qharumunte Tuusu Laasi
27 Dhellesikka ghohonki,
Eesawo qhawho hamo alkasa;
qhawho qarakito ikkodhdhi;
Yaikʼoope kapay qhawho kʼampaya ho manneete ye lighi.
28 Yisaakʼekka sakanko hamonu aqaakittay qhooti uso hxaseesi maallay Eesawosi icʼcʼikadha,
naqharay Ripkʼa Yaikʼoopesikki cʼikatti.
29 Kuyyaqako tooko Yaikʼoope iwwatʼe wat’uyana,
Eesawo uumi puffipa qarakonu holu.
30 Eesawokka Yaikʼoopena hasinna payi:
“Wadhpa watʼisay idhdhanna ye tteexamma uuma an puffiye!”
(Olissa mallaki Etome ana payi.)
31 Yaikʼoopekka hasinna payi:
“Qharitteema qharumunte taahusi ye las.”
32 Eesawokka hasi payi:
“Haadhi Yeesi puffaye iyye poghay,
emma qharumuntte te moʼo ye konnay?”
33 Yaikʼoopekka Eesawona hasinna payi:
“Hasa payni qhariteema ye akutadh!”
Hussa mallay usokka nu akutadhu;
qharumunttesikka Yaikʼoopenu lasu.
34 Yaikʼoopekka pitteenapa watʼessi missirateesi Eesawonu teexu,
usokka iyyiʼipa quku tupettay ihhaqipa ashshoy.
Esawo onke hasa lighattakki qharumuntte tuusuusi hela palamisi.