Akke Yisaak’eppa He Ripkʼay
24
Xinkisana Aprihaame ikkeeshuyipa paʼayshu;
Haallikkokka Aprihaameesi olho kaasatakki saki.
2 Aprihaame kodhampako huusu bhaxi olho kaasa rafisana hasina payi:
“Okaypa xargho haahuusi tafo haayyu kaleema qadhdhay.
3 Ihaadhdhe piyye Keneʼanenna kittatte qaakana miʼaye haayyunu naxaye qhamu athu akkintinu Haallikko Waako moontitopa ho piyyate miinteema ye akutadha.
4 Naqharray piyye thaayyu anna dhaladhi kula ashshapa ahxke haayyu haaha qaakanna kittatte miʼaye haayyu Yisaakʼenu naxaye akkay.”
5 Kodhampakossikka hasi payipa kasqadhu:
“ Shettissay an tayi isi hassa kula ye qale okaye iisha payni mala pasini?
Miʼaye haahuusika piyyesi qharro atho naqaakti kula an ashshinittay?”
6 Naqharray Aprihaame hasi na payi:
“Miʼaye haayyuusi moʼo kaki payni piyyisa kula qhamu athu holintitanu he tiqitadha!
7 Haallikko Waako moontito manne paapo haayyunapa piyye anna dhaladhina ye lihasipa yela payunna ‹Piyyiisi sanynye thaahuunuki an teexni› pa katape yexulu erkampathe thuususikki ho qharaʼitha erakni;
miʼaye haayyunu piyyisanaki annu naxaye akkinti.
8 Sheettisaki ho qale ashanko iishi payni atho akutinna kalla appinniti,
naqharay moʼo kaki payni miʼaye haayyuusi piyyisa kula olo holasi.”
9 Xaysa tupettay kodhampakkosi xargho huusuusi thafo Aprihaame kaleemi qadhdhipa olhosi Aprihaame na payi kaasasi kodhenu akutadhu.
10 Kodhampakosi kaalaadhdhe Aprihaamenna kittate hudhdhanasikki na laaghipa mahxhxadhe xeesooma kaasaasi kaladhesisa feoppa piyyesi katama Naakoore na qaghi karo ammeete oqhaye hxullattay qagha piyye Mesopetʼomiaya kula ashshoy.
11 Ippiyyisana hxafina hxoohxnossi qandheete katamana seettottay qagha kapeemi kaalaadhdhesiisi ghullatesipa isi hxaysisana xaytoka awnuyeema itha qhooti tahxi maallay saate xiske piyyisana na qandheete dhaghekki hxafi.
12 Usoka hasi payi:
“Haallikko Waako pogholho haayyu Aprihaame kuyyu olho awwoiisi ye kodhettay pogholho haayyu Aprihaamenu cʼikno Haahu ye oohamiissi nu hiʼaas.
13 Haadhi ano hassa hxoohxono qandheetena kantakki an shikkaari,
ihhadhdhe piyyinna qandhe meeghenukki hassa kula okayne.
14 Usundhisana kittatte shette anna payina:
‹Sighte taahiisi ye ghaalpa qandhe ye qukisay› issekka:
‹Haadhi quk,
kaalaadhdhe haahunukka anu meeghipa qukisa› yela payti isisaki an kodhampakko haahu Yisaakʼenu qhamu naxaye kodhdhintinu an qholli ikodhdhita.
Olisa kodhettay poghoho haayyu Aprihaamenu cikno Haahu ye oohamisi qhama hi’astisa an arra.”
15 Hannay ghissootesiisi ye dhikisunna Ripkʼa sighteesiki hashshitottay dhoqhtipa okayi.
Isisakka miʼayesi qaso Aprihaame Nakkorepa naxaye thuusu Milkana dhaladhina shette Paatueele.
16 Ripkʼa shette uuma xeesa the shetinko sheeghappa te ye tʼirako qale rafayyu.
Karo hxohxnusi qandheete kulakki oodhitipa sighte thiisisa qandhe meeghghippa holittay.
17 Kodhampakossikka miina kali isse kula iitʼuyipa hasa na payu:
“Akko ma’ala thaahi sighte thaahisi ghaalpa qandhe takkasa ye qukisay.”
18 Issekka inna payti:
“Eeʼe pogholho haayyu quk!”
sightesi hela oodhdhasippa ghaalippa qukisi.
19 Iqquki tupettay ihholtipa hasa na pay:
“Kaalaadhdhe haahukka haki qukneppa pakonki saasa qandhessi annu meeghna.”
20 Haattay qandhesi sightattesi iʼakitipa olhossi kaalaadhdhe na quknessa tuqhippa kaalaadhdhe kaasay haki pakne saasa hxoohxnusinna wadheettay qandhe isinu meeghay.
21 Qhawhossikka olhossi inna ashshiisi Haallikko innu konnam yenu konnisa arenu ikʼkʼampayipa olhu isse kottiisi isi eema.
22 Kaalaadhdhessi iqukeppa dhikkisadhonki tupettay qhawhosi t’ukitte wark’atte akodhdhi te riqishno hiisikka kiraame hxupin haqisaasi akkuppa nu teexu.
Qhashawaane warkʼatte akodhdhi lakki riqishno huusundhikka kiraame dhippapa hudhanko tooko shaghoppa xargheema nu yaku.
23 Ise ooquppa hasa na payuppa kasqadhu:
“Emma Ato miʼaye thaaxay?
Into ye qalli manne paappo haahina xayto anna rafnaani iqaghna?”
24 Issekka inna payti:
“Ano miʼayessi Milka Naakoorenu dhaltti,
miʼaye Paatueele.
25 Holuppa haanina manneete seerepa qashko haxawakka ho dhamma qagha;
xayto hunena rafintekka iʼqagha.”
26 Qhawhosikka ighghulladhipa hasa payuppa Haallikkoosi kaanasu:
27 “Ho cʼiknossi ye oohamipa dhukkaysatameesi pogholho haayyu Aprihaamena ye qhacʼasu;
yeesiika manne ahxke pogholho haayyu kula ye inthawu;
Haallikko Waako pogholho haayyu Aprihaame ikkalataysama.”
28 Shettesi hermattaki ashshitipa olho kodhdhamadhi kaasasi yaaye thiisipa koro manneete qagha kaasanu thorruyi.
29 Ripkʼakka alawho Laapa ana payi ishsheeghti.
Usokka xaytossi kodhampako Aprihaame qaghi hxoohxnusi qandheete kulakki waadhettay ashshi.
30 Laapa tʼukittesi warkʼattepa qhashawwaanesi alawthe thuusu shapatti ihiʼipa olhosi Ripkʼa qallitiisikka apaqhunna haattakki qhawhossi kula ashshipa ho hxoohxnusi qandheetena kaalaadhdheete kantta shikkaarasa hxafoy.
31 Usokka hasina payi:
“Atho qhawho Haallikko ho saki,
wadhdhipa manne kula ashshini,
moonuka seeto koray shikkarti?
Manne haanina xayto anna rafti iʼqagha,
xayto kaalaadhdhe haahukka na rafne an gharisi.”
32 Qhawhossi Laapa qale immanne kula ashshi,
kaalaadhdheetekka feʼe oodhdhasuppa seerepa qashko haxawiisi anu teexu.
Usopa korossi na qale qaghanu qandhdhe luheette nu itʼt’uyonki.
33 Qhawhosinu yiito innu itʼtʼuyina uso naqharray hasi payi:
“Erko haayyuusi anu qallunna qharaʼita yiitoosi anu lokonni.”
Laapakka inna payi:
“Into qalli!”
34 Usokka hasi payi:
“Ano kodhampako Aprihaame.
35 Haalliko pogholho haayyuusi uumi uso saki;
usokka ishshorokumi;
qemmepa qhole,
pirrepaa warkʼe;
kodhampawhe tʼiirepa xisske;
kaalaadhdhepa harraadhdhe innu teexi.
36 Naxaye pogholho hayyuna Saara keshshana kallaki shambho nu dhalti;
shorohunko pogholho haayyu sheeghi kaasasi miʼaye huusunukki teexi.
37 Pogholho haayyu hasi yela payipa ye akutasu:
‹Piyyi anna qaakina ihaadhe Keneʼaanattena miʼaye haayyunu naxaye olo akki.
38 Naqharray manne paappo haayyu kula,
karo ahxke haayyu kula ashshapa miʼaye haayyunu naxaye akkay.›
39 Anokka hasa payipa kasqadha:
‹Pogholho haayyu shettisay yeqali okaye iishti payni mala payni?›
40 Usokka hasi yela payi:
‹Haallikkossi kuyyaqako kaasay annu qaaki erkampatte thuususi ho qali eraknipa miʼaye haayyunu ahxke hayyupa manne paapo hayyuna qhamannu naxaye okasntinu onke ho ghete’isi.
41 Ahxke haayyu kulaka ashshiti payni akutina kalla appehnay,
usundhe kaki hola payina «Shettiisi ini teexne» payni akutinu athu kasqataminti.›
42 “Anokka kuyyu hxoohxno qandheetena kanta an hxafina hasa an payipa ghissadha:
‹Haallikko Waako pogholho haayyu Aprihaame maʼala olho anna maallay okayi qhamu ye gharinu ye kʼarʼar.
43 Haadhi qandhe hxoohxnitona kantaki an shikkaari,
shette kʼifanitte the qandheete dhaghana “Into sighte thaahina qandhe ye qukis” anna payina.
44 ‹Ee’e haadhippa qukay,
kaalaadhdhe haahunukka ammeeghna› yela payti isissay te Haallikko mi’aye pogholho haayyu Aprihaamenu qholli ikkodhdhita.
45 Ghissootessi an saqako kata ghissadhisi anu dhikkisunna,
Ripkʼa sighte thiisisi hashshitottaki dhooqhatipa isi ookaya,
qelhossi hxoohxnito kula oodhdhippa qandhe meeghghi,
anokka ‹Maʼala into qandhe ye qukis.›
kanna payi.
46 Isekka hattakki sightesi hashshitito hela odhdhastipa ghaallippa hasa yela payi:
haadhi quk,
kaalaadhdhe haahusikka an qukisnaye,
hussa mallay anokka an quki,
kaalaadhdhe haayyusikka ye qukisi.
47 Anokka hasa anna payipa kasqadha:
‹Atho shette taaxay?›
isekka iyyela payti:
‹Ano miʼaye Paatueele,
paappo Paatueelekka Naakoore,
yaaye thuusukka Milka ana payi.›
Xaysa tupettay tʼukiteesikki annu qadhdhipa qhashawaanesikka xargheema nu shapa.
48 Nakalakka the opopte qaso pogholho haayyuna kodhdhaasi qhama miʼaye pogholho haayyu Aprihaamenu tayninu Haallikko Waako pogholho haayyu Aprihaame onke gheteʼanna ye inthawinu an ghulladhipa Uso kalataysadha.
49 Lammi dhukeema pogholho haayyusi ac’ikatte payni erkusa annu okayinu olho appayteesi yela paya,
yekodhinti payni xayto awwoʼi kulaki an ashshiniye.”
50 Laapapa Patueelekka hasi payeppa nu holasonki:
“Oli Haallikkito kanta qhooti kodhdhi maallay haʼitapa hakoru qalladheesi ini alkasne.
51 Ripkʼa haadhi hola kantaki qaghtiye akkipa ashshottay,
qhamusa Haallikko qalli kula miʼaye pogholho haahunu innaxaye kodhdhita.”
52 Kodhampakko Aprihaame iʼolisaasi apaqhina kilpayye huusuttakki ghulladhipa Haallikkonu sakatu.
53 Xaysa tupettay kodhampakkossi maahxe sireete warkʼepa pirrate akodhdhi,
holuppa laalladhdhe shaghoppa Ripkʼanu teexu;
alawhopa yaaye thiisinukka teexakko kodhatte dhamma akkaasi nu teexuy.
54 Usopa korossi na qale qagha iyyiʼeppa qukonki tupettay haami raffe.
Haqhayna sinkatto ihaqenna kodhampako Aprihaame hasi payi:
“Lammi pogholho haayyu kulakki an holleye ye haqisa.”
55 Alawhopa yaaye tiisikka hasi payeppa nu holasonki:
“Shette kuyyaqako hudhdhan kula ghaqi iʼine qale ghayyitipa xaysa tupettay hoqale ashsheesi iʼalkasnaye.”
56 Naqharray Uso hasinna pay:
“Akko maʼala Haallikko onke thayyuusi iyye gheteʼisiye oloye oltisi,
pogholho haayyu kula qhama hollinu ye haqisa.”
57 Usundhekka hasi paye:
“Into shetteesi oqnipa akasqadha.”
58 Hussa maallay Ripkʼaasi iʼooqeppa hasa payonkippa kasqadhonki:
“Qhawhu qale ashshankoosi awwoay?”
Isekka hasi payti:
“Ee an ashshina.”
59 Xaysa tupettay alawte thuusundhi Ripkʼapa apnatte thiisi,
holuppa kodhampako Aprihaameppa korossi naqale qaghaasi ihhela ha’qise.
60 Ripkʼana hasinna payeppa sakonki:
“Alawte thaani,
yaaye waarsho kishana kodhdhi,
sanynye thaahikka ghinte paarakaraadhdhe huusundhina ittayta!
61 Xaysa tupettay Ripk’apa uyyataadhdhe hiisi ighgharsadheppa kaalaadhdhe huusundhi saappema hadhdhonkippa qhawhossi kaleema ashshonki,
kodhampakossi onke hasa lighataki Ripk’aasi akkipa ashshottay.
62 Xinkisana Yisaakʼe xayto Nekepe an payna qhooti qaaki mallay Peri-Lehay-Rooinukib okayi.
63 Usokka kuyyaqako tookko kallapte dhihattoote kitteemi xullipa leqakko kula lighu;
iʼqila payipa emmadhuna kaalaadhdhe okaayasiki xayto sikaapasa hiʼi.
64 Ripkʼakka iʼemmadhitina Yisaakʼesikki hiitipa kaalana saapete oodhdhi.
65 Hasa payippa kodhampakosiisi kasqadhi:
“Eemma qhawhusa kora liqqakito ineesi akkadhenu okaaya yaxa?”
Usokka hasi paypa nu holasu:
“Hussa pogholho haayyu” isekka haattakki latʼanakko hiisi akkatipa he mutʼi.
66 Kodhmpakosikka olhu kodhi kaasasi Yisaakʼenukki thorruyi.
67 Yisakʼekka Ripkʼaasi i’ooqipa manne yaaye thuusu kala xulluttay,
ise akkuppa naxaye thuusu nu kodhdhi;
usokka iʼise cʼikadhipa fartte yaaye thuusuna dhikitno thayadhu.