Fartte Saaray
23
Saara perko dhippapa hudhanko lakkipa taxxanki hxafasti tupettay
2 piyye Kʼiriyatte Arpakʼe taakkinti Keproone piyye Keneʼaanena kittatte qaghassa iffarti.
Aprihaame farte Saara maallay uuma iʼazanipa ooyoy.
3 Aprihaame pukkaqosi naxaye tuusuna kaanta ihhaqipa karo piyye Hitawadheete kula ashshoppa
4 hasana payu:
“Korunka ano hunena kittatte qhawho hayhitto qhaman kodhdhisa aʼaranku.
Akko maʼala xayto hawleete ye lasapa pukkaqo naxaye thaayyu na ammaayasa.”
5 Hitawaadhdhesi Aprihaamena hasina payeppa nu holasonki:
6 “Akko Pogholho haani into inena apaqh,
kulay atho inena kittatte qhawho dhamma,
hussa mallay hawle hanina kittatte hanna wootiisi na reehxadhapa pukkaqqo naxaye taahuna maayasay.
Ine kaasay kulaay hawle anna pukkaqqo naxaye taahuna mayasintiisi hoosi teexenu awwoaaniyye.”
7 Xaysa tupettay Aprihaamekka korossi piyyisana Hitawaadhe kanasenu ikkahhipa hasa payu:
8 “Pukkaqo naxaye tayyuna qhamo ammaayasninu kawwoote payni mi’aye Tʼoare Efrooneesi ye waatadha.
9 Xaytussa pasho huusuna kaanta qagha Makfela ana payiisi qhamu hawlenu ye lasninu hune ye xadhighumama olho iyyela payisiki annu teexniye.”
10 Efroone pukkaqate tuusuna korossi Hitawatte katamissana harratte qakkadhana kittate qhooti qaghi maallay korussa kaasay inni apaqhana hasi payipa Aprihaamenu holasu:
11 “Pogholho hayyu!
Hasa qandhimma yela apaqh:
pashussa xaytussana kittate qagha illay akkadh,
haadhi koro haayyu miinteema an ho teexiye pukkaqo naxaye taahuna na maayas.”
12 Naqharay Aprihaame korossi piyyisanna kaanasenuki na miinta holi kahhuppa
13 korossi xaytusana qagha miinteema Efroonena hasa payu:
“Akko ma’ala xortto pashusana haadhi yela akkipa pukkaqo naxaye tayyuna anna maaya.”
14 Efroonekka hasina payipa Aprihaamenu holasu:
15 “Pogholho haayyu,
xorto pashusana dhippa salaxkia kodhdhinima kapay olissa yelapa holla kitteema mo’o ikkoni?
Hussana kanta pukkaqo naxaye taahuna hasa na maayas.”
16 Aprihaamekka xortosi Efroone Hitawaadhe minteema qallisa ighgaripa qhamo xorto xinkisana kula pirre dhippa salax dhihoppa nu teexu.
17 Onke hasa lighattay pasho Efroone piyye Memrenna kaantta qagha xayto Mekfela ana payina rampepa kaare na kittatte qagha kaasay illay qhamu huusu kodhdhininu pitamu.
18 Hitawaadhdhessi katamisana harratte qagha kaasay minteema qhamu pasho Aprihaame kodhdhisa iʼarami.
19 Xaysa tupettay Aprihaame piyye Keneʼaanena xayito Memrena kaanta qaagha rampeesi pasho Mekfela ana payina kittate qaaghasa ippukkaqo naxaye tuusu Saarasi maayi.
Xaytusana hantu Keproone ana payi.
20 Hussa maallay pashosi Hitawaadhdheete rampe nakittatte qaghe Aprihaamenu xayto hawleete kodhdhu.