Themmame Aprihaame
22
Olissa kaasay ikkodhdhamadhi tupettay Waako Aprihaamesiki theemmi.
“Aprihaame!”
Kipayipa ooqu.
Aprihaameka inna payna “Hassakki an qaghi!”
2 Haallikkokka inna payi:
“Miʼayesi haahu toʼokossi acʼikatti Yisaakʼeesi akkipa piyye Mooriya kula ashshoy,
ghupo tookko an ho hiʼaasni sappeema usosi teexakko adhili kodhppa ye itʼt’oosay.”
3 Haqhayna sinkatho awnettay Aprihaame i’haqipa kaaressi teexakko ana dhillisi qhit’uppa harre saappeema feʼoy.
Miʼaye huusu Yisaakʼepa kodhampawhe huusu lakki illay xaytossi Waako nu hiʼaasi kula ashshenu haqu.
4 Kuyyaqako izzxanna Aprihaame iqqla payipa emmadhunna xaytosiisi sikaapnoomi hiʼi.
5 Xaysa tupettay Aprihaame kodhampawhesi huusuna inna payi:
“Hunepa harre hassasa ghayyindhama anopa miʼaye haayyu xaysa korasa an ashshinaanippa Haallikkoosi an kaanasni tupettay hollaaniye.”
6 Aprihaamekka kaaressi teexakkottay adhillisi i’akkipa miʼaye huusu Yisaakʼeema dhooqhasoy,
uso kapay pillawopa haththeesiki dhooqhipa lakkinttoy isi ille qale ashshankina,
7 Yisaakʼe paappo huusu Aprihaamena inna payi:
“Appa haayyu!”
Aprihaamekka inna payi:
“Yee,
miʼaye haayyu!”
Yisaakʼekka hasi payipa Aprihaamesi kasqadhu:
“Hattepa kaare haadhi!
Emma orppossi teexakkito adhilli aha?”
8 Aprihaamekka inna payina:
“Miʼaye haayyu orppo teexakkonu adhillisi Waako pukkaqatuusunu Uso gharisna.”
Lakkintoy ashanko huusundhiisi tiyyisonki.
9 Xaytossi Waako nu hiʼasina hxafonki.
Aprihaamekka xayto teexakitosikki gharisipa kaaresi naqhara ghadheesoy.
Miʼaye huusu Yisaakʼeesikka shapuppa kaaresi sappema xayto teexakitosa raffeesu.
10 Miʼayessi huusuusi parrakenu pillawwito xarghottay shokkuppa akku.
11 Naqharray erkampatte Haallikkito moonthikki hasa inna payti:
“Aprihaame!
Aprihaame!”
Usokka “Yee!”
kippayi.
12 Isekka inna payiti:
“Miʼayeesi olo koxi,
inna olho toʼokokka na kodhu miʼaye haahu toʼokkoosi qhooti athu ye dhawru maallay qhama Waako ghaaptisa anho ari.”
13 Aprihaame ihhe kaaʼita emmadhina orppo tooko ho kaase huusu saraaqhottay na marameki hiʼi.
Ashshoppa orposiisi okaasuppa qhoota miʼaye huusu kapa teexakkossi adhillinu itʼtʼoosu.
14 Hussa mallay Aprihaamekka xaytusana “Haallikko gharisna” kippayipa nu makaxko kodhu.
Haka kuyyu saasa koro ippayana:
“Ghupo Haallikkito sappa Haallikko gharisna.”
15 Erkampatte Haallikkito lankka ihholtipa Aprihaamesi ooqipa hasa napayi:
16 “Haallikko i’iyyana:
‹Pukkaqate tayyutakki an akutadhi,
oliisi qhoota akkotipa miʼaye haahu toʼokoosi atuye dhawru mallay,
17 ano sanynye taahuusi ansakna;
qhamo xuske moontitopa taxakko pasito hinaseete kulaki annaqisni.
Sanynye taahukka ghintte paarakaaradhe huusundhinakki tayti
18 Hayo Haayyusi qhoota kotti mallay waarshidhdhe piyye qhaat’eete qagha kaasay sanynye taahuttakki sakamne.›”
19 Xaysa tupettay Aprihaame kodhampawhe huusu kulakki holipa ille qale Persapehe kula ashshonki.
Aprihaamekka piyye Persapehenna isi qaaka.
Sanynye Nakoore
20 Xaysa tupettay hasi payppa Aprihaamenu qallonki:
Milkakka qaso haahu Nakoorenukki mi’aadhi dhalti.
21 Qharitto,
Uutʼeppa qaso huusukka Puuze pana paapo Araame Kemuʼeele.
22 Kosaatepa Hazopa Filtaasepa Yetilafina pana Paatuʼeele.
23 Paatueelekka Ripk’aasiki dhali.
Milkakka qaso Aprihaame Nakoorenu miʼadhissa settenki dhalti.
24 Lammitte Nakkoore ana payi Ruʼamakka Tepahepa,
Kehamepa Tehashe pana Maʼikasikki Nakoorenu dhalti.