Dhaladhe Yisaakʼe
21
Haallikko qhamosi qalli kulaki Saarasi emmipa kippossi innu xuliisi dhikkisu.
2 Hussa maallay Saarakka ishsheeghtipa leqidhesi Waako nu ghapina keshshana kalla Aprihaamenu shampo dhali.
3 Aprihaamekka miʼayessi naxaye tuusu Saara dhaltina Yisaakʼe inna payipa nu makaxko kodhu.
4 Aprihaame qhamossi Waako nu hay kula miʼayessi huusu Yisaakʼe dhalanni kuyyaqako settentonna ikkarazi.
5 Aprihaamekka miʼayesi huusu Yisaakʼe idhdhaladhina perko 100 ihxhxafasi.
6 Saarakka ippaytina:
“Waako kishshaqako iyye teexi,
hussa maallay qhawho oliisi apaqhi kaasay ye qali kishshaqni.”
7 Nakaleema ippaytina:
“Keenni yaxa Aprihaamena na payi ‹Saara miʼaadhe ishshurashinti›?
Haadhi kapay hantu keshsha tuusuna kallakki annu shampo dhali.”
Ghorame Akkareppa Te Ismaeele
8 Miʼayesikka ighghohipa shure hxuru,
Aprihaame kuyyaqakussi Yisaak’e shure hxurina yiʼopa qukte dhammasikki gharisi.
9 Naqharray Saara miʼayesi shette Kiptʼate Aprihaamenu dhalti Ismaeele Iyyisaakʼena xikkadhanaki hiiti.
10 Saarakka Aprihaamena hasinna payti:
“Aylitiisi miʼaye hiisi illay yela kanta ghor,
moʼo kaki payni miʼaye hiisi miʼaye haayyu Yisaakʼe qalle ye tayni.”
11 Ismaeele qhooti miʼaye huusu kodhdhi maallay Aprihaame uumi rakkadhi.
12 Waako kapay Aprihaamena inna payi:
“Qhoota miʼayattepa qhoota aylitte taahu Akaare maallay olo he ghadhima sanynye taahu Yisaakʼetakki ooqamintiye olho Saara ho qalliti kaasasi kodh.
13 Miʼayisa aylitte taahuna miʼaye haahu qhooti kodhdhi maallay waarsho dhamma an uso konni.”
14 Aprihaamekka kuyyaqakusana sinkatto awnetakki haqipa yiito takkayyapa qandhe surpooma nu tiighuppa Akkaarenu teexu,
konnathoomaka kakiteesuppa miʼayesi illay laaghghu,
isseka iʼashshitipa mandho Persapehesa unte dhape paayyi.
15 Qandhesi surpito qagha ihhumenna mʼayesiisi miise kaleemi hela hxurtipa na kaanta ashshoy.
16 Xaysa tupettay “Miʼaye haayyu iffarana eeme anu alkasni” kipaytipa xayto koo’itte nahxafinti kula ghaqqiti sikapuyippa xayto miʼayisa nu armanisa qakkadhippa ooye paayyi.
17 Waakokka riire miʼayesinaki apaqhi,
erkampatte Haallikkitokka montonu ghutu Akaaresi ooqippa hasana payi:
“Akaare moʼo he tayi?
Kulay Waako ooye miʼayatteesi iʼapaqhiye olo ghaapi.
18 Haqpa miʼayissaasi akkappa heema ghapappa salisamma waarshsho dhamma an konniye.”
19 Xinkisana Waako ehxhxe hiisisiki na qhaashipa hxohxnito kittatte qandhe tayi.
Ashshoppa surposisa meeghghippa miʼayesi hiisisi qukisi.
20 Waakokka miʼayisa qali qaghipa mi’ayissakka ghohu.
Qaako huusukka qarakkito.
Usokka tannapko ho kooʼe raqqa kodhdhu.
21 Iqqarakko Faaranna qaghana,
yaaye tuusu shette piyye Kiptʼatenaki nu akkiti.
Aprihaamepa Apemeleke Persapehemi Ille Ghare
22 Xinkisana Apemeleke qhawhosi koro huusu orxankito rafisa Fikoole ana payi illakki Aprihaame kula ashshipa hasa na payu:
“Olho akkotti kaasanna Waako ho qali qaghi.
23 Anopa dhelle haayyu taakki sanynye tayyusi tattakettay maghno qhamu atu ineema kodhintinu mintte Waakitosa xaysa ye akutadh.
Qhamo an hoosi olho xeesa kodhi kula athokka yeesippa piyyi anna hayhunkottay qaakinu olho xeesa ye kodh.”
24 Aprihaamekka inna payina:
“E’e an akutanna.”
25 Nakala Aprihaame qandhesi hxoohxnito kodhampawhe Apemelke kittettay na akke maallay Apemelekeesi irreepi.
26 Apemelekekka hasi pay:
“Olissa qhamu yaxa kodhi anu ari,
athokka atu ye qallu,
olisakka kuyyuki an hanna apaqhi.”
27 Xaysa tupettay Aphrihaame qeemmepa qholeesikki okaasipa Apemelekenu teexu;
kuyyaqakusana usundhe lakkinttoy ille qali ghareppa akutadhonki.
28 Aprihaamekka qeemte taxxaniisiki reehi.
29 Apemelekekka hasi payipa Aprihaamesi kasqadhu:
“Qeemti taxxani moonukka reehtipa haama shikkaarashay?”
30 Aprihaamekka inna payina:
“Xooxonu qandheeteesi qhama ano qhotisa arenu milikite qeemti taxxanisi yela akkadh.”
31 Xaytosi usundhe lakkinttoy naama ille gharreppa akutadhonki qhooti kodhdhi maallay xaytusana Persapeha ana payipa anu makaxko kodhu.
32 Olisaasi iʼille xule tupettay Apemelekepa qhawhosi koro huusu orxankito rafisa ana payi Fikoole illaki karo piyye Filistʼeematte kula hole.
33 Xaysa tupettay Aprihaamekka Persapeheemi kaarko temir ana payiisi dhishshipa Waakossi Perre Yehume Sheeghenna makaxko Haallikkitoosi kaanasu.
34 Aprihaamekka perre dhammaki hayhunkottay piyye Filstʼeemattena qaaki.