Aprihaamepa Apemeleke
20
Aprihaame qaakosi piyye Memrenna ihela hxuripa karo piyye Nekepe kula ashshoppa saapanko piyye Kʼaadheseppa piyye Shure kitteema qaakoy.
Piyye Kererenana hayhunkottay isi qaakana,
2 Aprihaame naxaye tuusu Saarasi koro piyyisanu iqallana inna payi:
“Tisi kulay alawte tayyu”,
hussa maallay nikusa piyye Kererenna Apemeleke korosikki na erakipa Saarasisi ooqasu.
3 Naqharay Waako kuyyaqako tooko awne ulsinketakki Apemeleke kula okayipa hasana payu:
“Qhoota xiskatussa qaakatitta maallay affarray,
ise kulay te tʼiirakko sheeghay.”
4 Ikkodhitama kapay Apemeleke qhooti ye ise kohxu maallay hasi payi:
“Pogholho haayyu,
waarsho ye dhappusika patisinti?
5 Ho yela ‹Alawte thaayyu › payi uso qandhi?
Holuppa isekka ‹Alawho haayyu› iyyela payti qandhi?
Ano oliisi kʼalpe xeesapa xargho xeesatakki an kodhi.”
6 Waakokka ulsinkesitakki hasa na payi:
“Ato qhama xeesnottay olisa kottisa an ara,
qhamu atu ise kohxintippa yela miinatte cʼuppo kodha mallakki an hola dhawrasi.
7 Naqharray hantu xiskatusaasi xalho hiisinu holas;
uso hxumampakkopa ihho ghissanapa atu farinti;
atunu holasu payni kapay athopa olho haahu kodhdhi kaasay qhama farrintesa ara.”
8 Haqhayna sinkatho Apemeleke soroppo huusu kaasasiki ooqipa olho kodhdhamadhi kaasasi nu torruyu;
usundhekka uuma murrukonki.
9 Xaysa tupettay Apemeleke Aprihaamesikki ooqasipa hasana payu:
“Ata husi moʼo aʼinena kodhdhati?
Moʼo an hola dhappipa anopa ahxase thaayyu sa onke patitate hasa lighaasi ina okaasay?
Dhukeenu olho kodhe yeho gheeqasikka ina kotti.”
10 Xaysa tupettay Apemeleke Aprihaamena inna payi:
“Emma olhannu hasa kotti moʼo?”
11 Aprihaamekka hasi payipa nu holasu:
“Hassa piyyinna qhawho Waako ghaapa ye qaghi kanpayipa naxaye thaayyu mallay qhamu yeye poghnenu ghaapo.
12 Holuppa dhukeema ise alawte thaayyu ,
yaayye toote kaki ye ine dhalu payni paappo haani to’okko,
holapa ise akka.
13 Waako iyye hayipa manne paappo haayyuna lighapa piyyaadhe kaasay isana aʼashshana ‹Cʼikno ayye sheeghtiisi husittay ye hiʼaas,
xayto an hxafni kaasanaka «Uso alawho haayyu» qhamu yela payintinu› anona payi.”
14 Xaysa tupettay Apemeleke qeemmepa qhole pana aylaadhe tʼiirepa xiskesikki Aprihaamenu teexi,
holuppa naxayesi tuusu Saarasikka nu holasu.
15 Apemelekekka Aprihaamena inna payi:
“Haadhi piyye tayyu hola miinati qaghtiye qhama wooti kula naqaaka.”
16 Saaranakka inna payi:
“Ato qhama atu olho toʼokoka dhappupa te xeesa kodhdhasa koro he qale qaghanu qhamu milikite kodhdhininu alawho haahi Aprihaamenu pirre 1,000a tooko an teexi.”