Cʼuppo Piyye Setomenna
19
Kuyyaqakusana kalapo erkampate lakkissi katama Seetomenaki hxafe.
Xinkisana Lootʼe katamassinna harrati qakkadhi,
erkampatadhesiisi ihhiʼina usundheesi akkadhenuki shikkaari,
kahhuppa nu xasu.
2 Usokka inna payi:
“Akko maʼala,
poghlaadhdhe haayyu manne Ano kodhampako haahundhi kula okayapa luhhe hela shoxankuppa rafankumma qhayna sinkatho awnetakki ahaqinteppa ashshonkuye.”
Usundhe kapay inna payenna:
“Ye kodhdhintimma hassa liqakusa arrafnaani.”
3 Naqharay Lootʼe qhooti uuma usundhe waathadhi maallay manne huusu kulaki na qale ashshe.
Xaysa tupettay Lootʼe dhilanko innu dhillasipa eesse xeesa nu gharisuppa usundhekka yionki.
4 Hayihitosikka hannay ye raffuna qharaʼita korossi katama Setomena qaaka qhawho tʼiirakko kodhdhi kaasay aparsa ye haqhu,
ponkorrepa xadhighe kaasakki illema holipa okayonki manne Lootʼeesi qhorronki.
5 Lootʼesikka ooqonkippa hasana payonki:
“Korossi haahuna raftenu okayi ahaati qaghi?
Qhama naqale rafnaaninu ghinteema ine lihas.”
6 Lootʼekka usundhe qallateesenukki ghinte kula illighipa mankaxeesikka he kala kʼuppuppa
7 hasana payu:
“Koro haayyu,
ma’ala,
olho maghaasi olona kodhe!
8 Awwoanku payni haadhi ihaadhdhe haayyu lakki he tʼiire qale ye rafonkiki qaghaye usundheesi an hune lihasapa olho awooteesi na kodhanku.
Korunna kapay olho toʼokokka olona kodhe,
moʼo maallay ayni yeesikki payeppa manne haayyu kula okayonkiye.”
9 Naqharay usundhe hasinna paye:
“Inena miinatte pat!
Aata ookaayo husi iʼiyya mala?
Olho an usundhena kodhe woonina ho ghula an hola konnaani!
Onke hasa lighattay Lootʼeesi isi susughurapa mankaxessikka ghondheema itʼosonki.
10 Naqharray qhawho lakki Hayihitossi manneete kalla qagha xarghe huusundhitakki shokkepa Lootʼeesi kiikonkippa manne kaleema xullesonki,
mankaxeesikka kʼupponki.
11 Xaysa tupettay ponkorrepa xadhighghesi ghintate qagha kaasay qhamu ye mankaxe hiine maallay ehxhxe huusundhiisi na taafisonki.
12 Qhawhossi lakki Lootʼena hasinna paye:
“Dhalitto haahu ho kataminna kittate qaaka iʼqagha?
Sooghidhe haahupa ponkore pana ihaadhe taakintti dhalito pile kaki qagha payni waadhpa qhamu kataminna lighnenu nu qallay.
13 Katamiisi an patisnaani moʼo maalla payni cʼuppo korunna uumi naqipa Haallikko apaqhu,
inekka qhama patisnaaninu Uso ine eraku.”
14 Xaysa tupettay Lootʼe iʼashshipa dhellesi ihaadhdhe huususi rapadhe sooghidhdhe huusuna hasa payu:
“Waadhapa kataminna kittatte lighankumma Haallikko katamiisi ippatisnaye!”
Sooghidhdhe huusu kapay hona feedhoodha innu lighi.
15 Xayto iqhqhayeete qaghana erkampattaadhessi Lootʼena hasinna payeppa waadhisonki:
“Katami illay qhamu huni patinte maallay waadhpa naxaye taahupa ihaadhdhe haahu lakkiisi sixappa kataminna kittatte lighay.”
16 Naqharay Lootʼenu hattay lighe innu dhikitti;
Haallikko kapay qhooti usundhe qhararsadhi maallay korossi usopa naxaye tuusu pana ihaadhessi huusu lakkina xarghe inna ghappepa katamassinna kittatte lihasonki.
17 Illihase tupettay korossina kittate qhawho tookko inna payi:
“Napsaadhe hahundhi pinnisadhenu waadhapa ghoradhanku!
Konankonayekka inna emmadhonku!
Koloʼe kitteemakka olo shikkaari,
ghupo kula ghoradha,
hasakki ye kodhdhu payni affarrinanku.”
18 Lootʼekka inna payi:
“Poghlaadhe haayyu,
ma’ala,
ihhasa kodhdhe hxura!
19 Haadhi ano kodhampakko haahu hola miinatte kaanaste an taayyadhi,
napse thaayuusi pinnisenu xorxunte dhammaki ayye kotti,
naqharay ghuppe kula ghoradhepa pinne qhoota anu alkasni maallay miirisa okayna iyye dhaghapnapa ye poghu.
20 Haadhi katama takkayya ho iitʼtʼa hattay anna hxafni qaghaye haha kula an ghoradhapa peha;
haaha kula an ghoradhi payni napse thaayyu ippininayye.”
21 Usokka inna payi:
“Eeʼe,
waathadhe thaahuusi an hola akkadhi;
katamisa atho qallitiisi anu patisni.
22 Haka atho katamissana hxafinti saasa olho toʼokoka qhoota anu konni maallay waadhpa katamissa kula ghoradhay!”
hussa maallay makaxko katamissana Zoaarea ana payi.
23 Lootʼe ikkatama Zoaarena hxafina oqhqhaye haanakki lighti.
24 Xaysa tupettay Haallikko katama Setoomeppa Kemorasa hattepa tiinesikkib na dhipasi.
Olisakka ghuta moontonu Haallikko dhipasi.
25 Katamaadhdhisa kaasappa koloadhdhepa korossi katamissana qaaka kaasay pana olho piyyate fuua kaasay ye haqhunaki patisi.
26 Naxaye Lootʼe kapay qhooti konnankonnayye emmadhiti maallay awrukko sooqhito kodhdhitipa haama haqhi.
27 Haqhayna sinkatho awnettay Aprihaame ihhaqipa xaytossi xayna qharaʼita inna Haallikko miinta shikkaari kula ashshoy.
28 Katama Setoomeppa Kemora pana koloadhdhesi piyyisanna qagha kaasaasi hakkatako eemonna piyyisanna qhamo kuute hooro dhamma shaʼina kula kutamaasikki hiʼi.
29 Waako hasi kodhipa katamaadhdhessi kollate qagha kaasaasi isi patisana Aprihaamesikki hela taayi.
Hussa malllay miirasi katamaadhdhe Lootʼe na qaakisi patisnana Lootʼesi lihasu.
Lootʼepa Ihaadhdhe Huusu Lakki
30 Lootʼe katama Zoaarenna qaake qhooti ghaapi maallay haahanu ihaqipa ihaadhdhesi huusu lakki illay ghuppe katamissana kaanta qagha kula ashshoppa ihaadhe huusu lakki illay isi pokke he rokke lighana qaaka.
31 Kuyyaqako tookko shette qharittesi qase tiisina hasinna payti:
“Haadhi papo haani ikkeeshuyi,
holuppa qhamo aata koro piyyatte qaaka kaasa kula xaytu anna qaghni tʼiire an akkanaani ye qaghti.
32 Hussa maallay paapo haanisi tʼayye woynatte qukisnipa uso qale rafni,
onke hasa lighattay paappo haaninu miʼaadhe dhallipa sanynye ghaqqini.”
33 Kuyaqakusana kallapo paapo huusundhiisi tʼayye woynateesikki qukiseppa hxayesasonki,
shette qharitte tuusukka na qale rafi.
Lootʼe kapay inna qale rafappa ihaqanakka ye hela arri.
34 Haqhayna sinkatho qharunttessi qase tiisina inna payti:
“Awni kulay ano paappo qale arrafi,
kuyyuka na hollipa tʼayyesi woynate qukisnipa ihxhxayoodhipa athokka nakapa xullappa na qale rafay,
onke hasa lighattay paappo haaninu miʼaadhe dhallipa sanynye ghaqqini.”
35 Kuyyaqakusana kallapo paappo huusundhiisii inna holeppa tʼayee woynate qukisonkippa hxayyesasonki,
qasesikka na qale rafi,
Lootʼe kapay inna qale rafappa ihaqanakka ye hela arri.
36 Onke hasa lighattay ihaadhdhesi lakki paappo huusudhi Lootʼenu sheeghonki.
37 Shette qharitesi shampo idhdhaltipa makaxko huusukka Moaape nu kodhi,
Usokka waarshossi kuyyu ana payi Moaapadheete paappo huusundhi.
38 Qasesikka shambho idhdhaltipa makaxko huusukka Peneamic nu kodhi.
Usokka waarshossi kuyyu ana payi Amonadheette paappo huusundhi.