Karrazame Milikite Katapatte
17
Apraamekka ipperiko 99 hxafasina Haallikko nu armadhipa hasana payu:
“Ano Waako Olho Kaasay Alkasaye Yeessi eʼe payettay olho xeesa kodh.
2 Katapesi anho xuliisi an dhiktisna,
sanynye taahusikka uumate naqisa.”
3 Apraamekka miintettay haki piyyate hxafni saasaki ghulladhdhipa sakatu,
Waakokka hasinna payi:
4 “Katape anho qale xulli haadhi tisi:
paappo waarsho dhammanaki anho konni.
5 Paappo waarsho kishana qhoota anho konni maallay xaynukoru makaxko haahu Apraame payame ihhaqhnapa Aprihaame ahola payu.
6 Haaki waarshidhdhe kisha kodhdhine saasa an sanynye taahuusi naqisni,
nukusadhdhekka sanynye taahunaki lighne.
7 Anopa atho pana sanynye taahu hola tupettay okayina qale katape taayu dhalatanu haka dhalata saasa perre ye hume sheegenakki an xawwani.
Husattay athopa sanynye taahu ho kala okaynannu Waako an kodhdhini.
8 Piyyisa Keneaane hantu hayhunkottay anna qaakti kaasasi hoosippa sanynye taahu hola tupettay okayinanu haka perre ye hume sheeghesa qhama tayintenuki an hune teexni;
Anokka Waako huusundhi an kodhdhini.”
9 Waako Aprihaamena hasinna payi:
“Katapesi ayye qale xultiisi athopa sanynyeesi taahu ho kala okaynay dhalatanu haka dhalata saasa tiqitadhindha.
10 Katapessi Atopa sanynyeesi taahu ho kaleema okaayna illi atiqitadhintekka haadhi tisi:
tʼiire haahuna maneete qaaka kaasay ikkarazame.
11 Hussa mallay hune kaasay akarazamnaku hussakka katapessi Anopa hunena kittate qaghanna milikkite ikkodhdhinti.
12 Dhalata okayna kaasanna miʼaye shampito idhdhaladhipa kuyyaqako setten hxafaso payni ikkarazama;
qhamussa kula shampidhdhe manne haahuna kittatte dhaladheppa he manne haahuna kittatte ye dhaladhonkinna aylunkonu xayto pileete akodhattetay pittami kaasay ikkarrazame.
13 He manne haahuna dhaladhekka ikkodhdhe he kodhatettay apittami kaasay ikkarrazame;
katapi Taayyu dhakinte taahundhisa kodhdhamatti katape perre yehume sheeghenaki kodhdhinti.
14 Qhawho tʼiirakko kodhdhipa isi ye karazamu kaassay katape thaayyu usi pule huusuna payyati korito kittate ippata.”
15 Waako Aprihaamena hasinna payi:
“Xaynu koru makaxko naxaye taahuna Saaray payame ihhaqhanappa ‹Saara› ana payu.
16 Anokka an ise sakna,
moʼokaki kodhdhinti payini miʼaye shampitoossi isse kakorukki anho teexni.
Yaaye waarshidhdheete qhamu kodhdhintinu an ise sakna;
nukusaadhdhe waarshidhdheete issenaki lighne.”
17 Aprihaamekka haki mintettay piyyate hxafni saasa ighulladhdhipa kishshaquppa saqako huusuttay hasa payu:
“Qhawho perrko 100 hxafasi malaali miʼaye dhale alkasni?
Saarakka perrko 90 ki hxafastina malaali miʼaye dhale alkasinti?”
18 Aprihaamekka Waakito hasina payi:
“Ako tannu Ismaeelesi patta ye saktipa ye qaghasoy.”
19 Waakokka hasinna payi:
“Dhukeema naxaye taahu Saara shampo ihho dhalinti,
makaxko huusukka Yisaakʼe anna payinti.
Katape tayyu perre ye hume sheeghenaki an usopa sanynye tuusu qale shikkarashni.
20 Naqharray kasqo qhoota Ismaeele ayye kasqatiisi an apaqhi;
lammi an uso saknapa miʼaadhe dhammasika nu teexa,
sanynye tuususikka uuma annaqisni.
Paappo rafisampawhe hudhdhanpa lakkinaki kodhdhini,
sanynye tuususikka waarsho dhamma an koni.
21 Naqharray katape tayyuusi perko qhamma kitinna miʼayissa naxaye taahu Saara dhalinti Yisaakʼe qale an shikkaarashni.”
22 Waakokka Aprihaame qale torresiisi idhdhikkisi tupettay ihhadhdhi.
23 Kuyyaqkusana Aprihaamekka miʼayessi huusu Ismaeelepa miʼaadhessi manne huususa dhaladhe pana miʼaadhe xayto pileete apirradhettay pittami ho tʼiirakko kodhdhi kaasaasi issixipa qhamosi Haallikko nu qalli kula karrazu.
24 Aprihaamekka perko 99 ki hxafasinaki karrazami.
25 Ismaeelekka ipperrko 13 hxafasinaki karazami.
26 Aprihaamepa miʼaye huusu Ismaeele,
kuyyaqakusanaki karrazame.
27 Tʼiire ho Aprihaamenna manneete qagha kaasappa he huusuna manneete dhaladhe pana he axayto pileete pirradhettaya pittami kaasay uso qali karrazame.