Akaarepa Ismaeele
16
Naxaye Apraame Saaray hannay Apraamenu miʼaye ye dhalu,
naqharray kodhampatte tootte shette piyye Kiptʼattena te ana pay Akaare na qale qaaka.
2 Husa maallay Saaray Apraamena inna payti:
“Haadhi qhamu anu dhallinu Haallikko miʼaye iyye dhawri.
Into kodhampatte thaayyu si akkima yaxaray ise kaakkorukki amiʼaye tayyanniye.”
Apraamekka olhossi Saaray nu qalitisa inna ghari.
3 Husa maallay Saaray kodhampatesi hiisina qaakay shettesi piyye Kiptʼatena Akaareesi iʼakkitipa naxayunkonu Apraamenu teexi.
Apraamekka piyye Keneanesa perrko hudhdhanki poghghi tupetakki olissa kodhdhamadhi.
4 Apraamekka Akaaresisi qali rafipa issekka sheeghoy;
isekka qhamu sheeghtisa ihela artina Saarayeesi idhdhafti.
5 Saarayekka Apraamena hasina payti:
“Maghnusa yeema hxafi kapeema atho kasqatamna.
Iseesika hoho teexi pukaqite tayyuna ano;
ise naqharray sheeghe hiisisiki ihela hiitipa ye dhafe paayyi.
Hantukka anopa athona kittatte qhawho dhappite na qaghtisa Haallikko inna qhaqhitte qhaqha.”
6 Apraameka inna payi:
“kodhampate taahi qhooti kodhdhiti maallay xarghe haahinaki qaghtiye olho awwoti na kodh.”
Xaysa tupettay Saaraye Akaaresiisi qhooti uuma rakkisti maallay Akaareka inna maghtipa ghoradhi.
7 Akaare iʼqelho toʼon mandhito kittatte qaghana kanta qaghannakki Erkampatte Haallikkito na hxafti;
qelhusakka sanusi karo piyye Suure kula ashana kantaakki qaghi.
8 Erkampattesikka inna paytina:
“Ata kodhampatte Saaraye,
Akaare ahanuka okaaytipa karo hunka isa ashshay?”
Isekka inna paytina:
“Ano ho Saarayenukki an ghoradhi.”
9 Erkampattesikka inna payti:
“Ho Saaraye kula holpa iseesi kodhadhay.”
10 Hollippa hasakka na payi:
“Sanynye taahiisi yaxakaki haki ye dhihe alkasni saasa annaqisni.”
11 Hantukka hasana payi:
“Haadhi Ato qhoota asheeghti mallay
miʼaye shampo adhdhalinti.
Haallikko ooye saqko haahina qhooti hela apaqhi maallay
makaxko huusukka Ismaeele anu kodhinti.
12 Naqharay hermalea ikkodhinipa
Koro kaasasika isi torra,
korokka usoosiki ittoorri,
dhalitto huususikka ishshikinapa qawni isi qaaka.”
13 Akkaarekka Haallikkossi iseema qaladhana “Elroʼi” kinna payti.
Moʼo malla payini:
“Hoye hiʼiisi hantu an hiʼi” kippayiti mallay.
14 Qelhussana “Piʼer Lahay Roʼi” (hussa payyo Haallikkossi ye hiʼa qagho sheghana hxohxono huusu) Xaytusakka piyye Kʼateesepa piyye Parnena kittati qaghi.
15 Akaarekka Apraamenu shambho innu dhalti.
Apraamekka miʼayeesi Akaare nu dhaltina “Ismaeele” inna payipa nu makaxko kodhu.
16 Xinkisana Apraamekka perrko 86 ihxhxafasi.