Apraamepa Lootʼe Iʼillena Kalla Reehame
13
Apraamekka naxayepa kodhatte tuusu kaasaasikki sixipa piyye Kiptʼatena kittatte lighuppa xayto ana payi Nekepe kula ashshoy.
Lootʼekka na qali qaghi.
2 Apraame ho qholepa kodhatte pana warkʼe dhamma sheegha qhawho shorokitto.
3 Apraame Nekepenu ihhaqipa haka xayto Petele ana payi saasa ashshoy;
xaytosi xayna qaraʼita inna tunkaana ghaqqipa naqaakoy Petelepa katama Ayinna kittate qaghay
4 xaytossi xayna qharaʼita Ihhaallikkonu na xayto teexakito gharisina hxafoy.
Xaytusasaka Haallikko kaanasu.
5 Lootʼesi Apraame qalle ashshikka:
qeemepa talepa qhole pana tunkanaadhdhea dhammasikki sheeghi.
6 Qhollaadhdhe huusundhikka qhooti illeema naqe maallay xayto inna koshanne ye usundhe hxafi,
hussa maallay illeqale qaake ye alkasonki.
7 Hussana haqati koshnampawhe Apraameppa koshnampawhe Lootʼe kitteema poghghatho dhaladhi.
Perisanaka koro piyye Keneaaneppa koro piyye Ferezanaki piyyisana qaaka.
8 Xaysa tupettay Apraamekka Lotʼena hasinna payi:
“Anopa atho qhoota kʼeeqhte toʼote kodhdhini maallay yelapa hola taaki koshamapawhe haani kitta poghgatho dhaladhe ye gheeqasi.
9 Haadhi qhama hiiti kula piyye te ghandhaqa,
hussa maallay illena kalla reehannipa xayto awwoti kula ashshoy.
Ato karo pixatate kula ashsha payni ano karo miskittito kulaki an ashshini,
apayni atho karo miskittito kula ashsha payni ano kapay karo pixatatte kulakki an ashshini.”
10 Lootʼekka he kaʼiti xayto eemina leqako Yortanoosenu payyatti haka piyye Tʼoaare saasa qhamo xayto dhishto Kenetatte kula ligha taakkinti qhamo piyyesi Kiptʼatte qandhadhe na qaghe kulaki hiʼi.
Husakka Haallikko hannay katama Setoomeppa ho Kemorasi ye patisunna qaraʼitaki hiʼi payo.
11 Husa maallay Lootʼe leqako Yortanoose kaasaasi icʼcʼikadhipa karo xayto oqhqhaye ligha kula ashshoy,
usundhe lakkinttoy onke hasa lighataki illena kalla reehame.
12 Apraamekka piyye Keneaanessi haqhi Lootʼe kapay katamaadhdhesi piyye Setoomena kaanta liqakito qagha kulaki ashshipa usundhisa kapeema tunkana ghaqqu.
13 Koro piyye Setoomenna kapay maghawhepa Haallikkito miinatte he cʼuppottay hoqhqhe.
Apraame Xayto Ana Payi Keproone Kulaki Ashshi
14 Lootʼe inna kaata reehami tupettay Haallikko Apraamena hasinna payi:
“Into xaytusa anna qaghtisa shikkarpa karo ammeetepa karo kalleetepa karo oqhqhaye ligha pana karo oqhqhaye xulla kula eemadhoy.
15 Piyyisay ahiiti kaasaasi hoosippa sanynye tahunukki an teexni,
haka perre ye hume sheeghesa taahundhi ikkodhdhinti.
16 Sanynye taahuusi qhamo taxakkito annaqisni,
taxakkoosi qhamu olo dhihi kula sanynye taahuukka te olo dhihe alkasnikki an konni.
17 Haqpa piyyisana sikaapnopa ghandhaqunteema na ashshomma hoosiki an teexniye.”
18 Hussa maallay Apraame tunkaana huusuusi irropipa xaytossi ana payi Memire Keproonena kittatte qagha xayto xiltaane kanooma qaghe kula ashshoy;
xaytusasakka Haallikkonu xayto teexakito gharisu.