Ooqame Apraame
12
Haallikko Apraamena hasinna payi:
“Piyye taahupa dhalitto haahu pana ahxke paappo haahuna hela hxurpa piyye ano ho hiʼaasi kula ashshoy.
2 “Waarsho dhamma anho konni,
anho saknakka,
makaxko hahusikka ho dhamma kodha,
koro pillenukka sake ho kodha.
3 Koro ho sakaasi an sakna,
koro ho qhiicʼaasika an qhiicʼna,
waarsho piyyatte qaaka kaasay hottakki sakamni.”
4 Hussa maallay Apraame qhamossi Haallikko nu qalli kulaki lighi,
Lootʼekka na qali ashshi,
Apraame ippiyye Karanena kittatte lighana perre huusu 75.
5 Apraamekka naxaye tuusu Saarayepa miʼayeesi qaso huusuna Lootʼesikki he kala ooqipa kodhatesi ippiyye Karanena kittatte qaakana kodhatadheppa hultaame huusu kaasaasikki sixadhipa piyye Keneaane kula xullonki.
Ippiyye Keneaanena hxafenna,
6 Apraame haka xaytosi karrko dhamma More ana payi na qaghi Sekeme saasi ashshi.
Xinkisana koro piyye Keneaanena haahaki qaaki.
7 Haallikkokka Apraamenu innu armadhipa hasana payu:
“Piyyisiki an sanynye taahunu teexni.”
Xaysa tupettay Apraamekka xaytusasa Haallikkosi nu armadhinu xayto teexakito gharisu.
8 Xaysa tupettay ihhaqipa ghuppesi piyye Peetelenna karo oqhqhayye lighattay qagha kula ashshoy.
Piyye Peeteleesi karo oqhqhaye xullattay hxuruppa piyye Ayneesikka karo oqhqhaye lighattay hxuruppa xaytusasa tunkaana ghaqquppa Haallikkonu xayto teexakito gharisuppa Makaxko Haallikkitoosi ooquppa ghissadhu.
9 Apraame ihaahanu ihhaqipa karo xayto ana payi Nekepe kula ashshoy.
Apraame Piyye Kiptʼattena
10 Xinkisana laaqe piyye Keneaanesa lighi,
laaqisana paayyatti Apraame xeere qhacʼa qhamu hayhunkottay piyye Kiptʼatena qaakninukki oodhdhi,
moʼo maalla payni laaqe uuma hammaati.
11 Apraamekka ippiyye Kiptʼatesa xullenu itʼtʼuyina naxaye tuusu Saarayena hasinna payi:
“Ato xiskaththo uuma xeesay qhama kodhdhitisa anhe ara.”
12 Koro piyye Kiptʼattenaki he hiʼi payni:
“Tisi naxaye tuusu.”
Payineppa ye poghonki atho kapay appinninay.
13 Qhoota haahi maallay qhamu ye pankanneppa pehanu “Ano alawte tuusu” anna payinti.
14 Apraame Ikkiptʼatte hxafina koro piyyisana naxaye tuusu qhamu uuma xeestisa ihhiʼi.
15 Laadhi kodhampawhe ahxase Ferioonenaa kodhadha iʼise hiʼenna uumi peepeppa xeesno hiisisi Ferioonenu qallonki.
Hussa maallay iooqeppa ho Ferioonena mane kula ashshonkittay.
16 Ferioone qhoota hiisi maallay Apraameesi ikkaanasipa hayhunkottay akkadhuppa qeemepa qholaadhdhepa harraadhdhe qanghawhepa nexxepa kodhambawhe tʼiirepa xiske pana kaalaadhdheesi nu teexu.
17 Naqharay Haallikko naxaye Apraame Saaraye maallay Ferioonepa ahxke huusu pana koro huusuna qaaka kaasaasi haqotakki shoqhi.
18 Xaysa tupettay Ferioone Apraameesi iʼooqasipa hasana payuppa kasqadhu:
“Moʼo maallaki ahasa ye kotti?
Saaray qhamu naxaye taahu kodhdhitisa moonukki atu ye qallu?
19 Moʼo maallaka ‹Alawte thaayyu › yela payti?
Ano ahxay akke anna woʼi.
Hantu haadhi naxaye taahuusi akkadhpa ashshottay.”
20 Xaysa tupettay Ferioone kodhambawhe huusu qhamu Apraameesi laghinenuki hayi,
usundhekka Apraameesi naxaye tuusupa kodhatte tuusu kaasay illay laaghghonki.