Kimpe Papiloone
11
Xinkisana waarsho qhaatʼe kaasanna pako toʼoku qalladhipa isi illa xulla.
2 Korusakka xayto oqhqhaye lighanukki haqipa isi ashshana piyye Senaoorenna leqakosikki tayipa haama qaakoy.
3 Nakaleema pukkaqe pukkaqenukki illena papayenna:
“Okaya cʼoqhqhollo dhoopnipa qhamu dhikitninu hattettay hxoopni!”
Onke hasa lighattay awrughe kapa cʼoqhqhollo gharisonki,
illeema cʼaqhqhalisenukka olho tankarea ligha tayonki.
4 Hasakka illena payonki:
“Okayapa ini illena kalla pullamoonina makaxko haani oqasenu katamapa kimpe toʼote te moontito xafna ghupanni.”
5 Haallikko kapay katamapa kimpesi ghupadheesi emmenukki montonu oodhdhi.
6 Haallikkokka ippayi:
“Qhamu kulaki waarsho toʼoko kodhdheppa pako toʼoko isi qalladhapa oliisi kodhe paayyonki payni lammi xaynu koru olhu kodhe woʼe dhikkise ye usundhe malaalli.
7 Okaya oodhdhinipa qhamu ye illa xullenu pako huusundhiisi na lahxeesni.”
8 Xaysa tupettay Haallikko piyye kaasakki usundhe pulli,
katamassikka ghupadhe hela hxuronki.
9 Haallikko xaytusasa qhooti pakke qhaatʼe kaasanna lahxeesipa usundheesi piyye kaasay illena kalla pullo maallay makaxko katamisana Papiloone ana payi.
Dhalata Seemenu Haka Apraame saasa
(Uuma. 10:21-32; 1Ot. 1:17-27)
10 Sanynye Seemekka xayna kalakata hasi lighti:
Seeme qandhe patitatte tupettay perko lankkana miʼaye ana payi Arfakʼsidheesi dhalina perre huusu 100 hxafe.
11 Seeme Arfaʼsidheesi idhdhali tupettay perko 500 ki qaakipa shambhidhdhepa ihaadhdhe hibhaasi dhaloy.
12 Arfaʼsidhekka perko 35 ihxhxafasina Salaheesikki dhali.
13 Xaysa tupettay Arfakʼsidhe perko 403 ki qaakipa shambhidhdhepa ihaadhdhe hibhaasi dhaloy.
14 Salahekka perko 30 ihxhxafasina Eporesikki dhali.
15 Xaysa tupettay Salahe perko 403 ki qaakipa shambhidhdhepa ihaadhdhe hibhaasi dhaloy.
16 Eporekka perko 34 ihxhxafasina Falekʼesikki dhali.
17 Xaysa tupettay Epore perko 430 ki qaakipa shambhidhdhepa ihaadhdhe hibhaasi dhaloy.
18 Falekʼekka perko 30 ihxhxafasina Reusesikki dhali.
19 Xaysa tupettay Faleekʼe perko 209 ki qaakipa shampidhdhepa ihaadhdhe hibhaasi dhaloy.
20 Reukka perko 32 ihxhxafasina Serukesikki dhali.
21 Xaysa tupettay Reu perko 207 ki qaakipa shampidhdhepa ihaadhdhe hibhaasi dhaloy.
22 Serukekka perko 30 ihxhxafasina Nakooresikki dhali.
23 Xaysa tupettay Serukekka perko 200 ki qaakipa shampidhdhepa ihaadhdhe hibhaasi dhaloy.
24 Nakoorekka perko 29 ihxhxafasina Taarasikki dhali.
25 Xaysa tupettay Nakoore perko 119 ki qaakipa shampidhdhepa ihaadhdhe hibhaasi dhaloy.
26 Taarakka perko 70 ihxhxafasina Apraamepa Nakoore pana Haraneesikki dhali.
27 Sanynye Taarakka xayna kalakata hasi lighti:
Taara Apraamepa Nakoore pana Haraneesikki dhali.
Haranekka Lotʼisikki dhali.
28 Harane paappo huusu Taara ihhaannay napsettay qaghanaki katamassi piyye Keltawatena Ur ana payisa fari.
29 Apraamepa Nakoore xiski sixe:
naxaye Apraamena Saaraye ana payi,
te Nakoorenakka Milka ana payi.
Naxaye Nakoore miʼaye Haraane;
miʼaadhe Haraanekka Milka pana Yosika.
30 Saaraye qhooti dhopante kodhdhiti maallay miʼaye ye sheeghti.