Apraame Lootʼesiki Pojkito Kala Holasi
14
Xinkessi perre nikusa piyye Papiloonena Amrafelepa nikusa piyye Elasaarenna Aryokepa nikusa piyye Elamenna Kolotokomere pana nikusa piyye Koymenna Titiale nikusumenna
2 nikusaadhdhi salaxki illeema holipa nikusa hxupinsi qhipenu tuulonki,
nikusaadhdhissa hxupinka:
nikusa piyye Setoomenna Peraʼipa nikusa piyye Komeranna Pirshayepa nikusa piyye Ataamanna Shinapa nukusasi piyye Sipoyenna Senpere pana ho ghodhdhe Zoʼaarenna qaaka nikusa piyye Pelanna.
3 Nikusaadhdhisa hxupin kaasakki liqako Sitime,
paso Sooqho na qaghisa illa holli.
4 Nikusaadhdhisa hxupin haka perrkko hudhdhanpa lakki saasa nikusisa Kolotokomereki usundheesi rafisa,
naqharray perkko hudhdhanpa izzax tupettay qhipathonukki usooma haqe.
5 Perrkko hudhdhanpa salaxnna nikusa Kolotokomere nikusaadhdhesi uso qale ghare illakki okayeppa koro piyye Rafayimesi orxamonkippa xayto ana payi Astaroote-Kʼarnisesa puthonki;
koro piyye Suusesikka xayto ana payi Hameema puthonki;
koro piyye Emesikka xayto ana payi Shawe-Kʼiriyatesa puthonki.
6 Koro piyye Horesikka piyyesi ghuppeete kanta qagha Seyrenu payyatti haka piyyessi mandhito kanta qagha Elfaraane ana payi saasa puthonki.
7 Xaysa tupettay holonkippa xaytosi Kʼateese Ayni Misipoote ana payi kula okayonkippa piyye Amalakewatepa korossi xayto Hases-Tamar ana payina qaaka Amorawaadhe kaasasi qhiponkippa putonki.
8 Xaysa tupettay nikusa piyye Sotoomeppa nikusa piyye Kemorappa nikusa piyye Ataamappa nikusa piyye Sipooye pana nikusasi piyye Pelanna Zoʼaare ana payiki koro huusundhi orxankito liqako Sitiimessa illa holasi.
9 Nikusaadhdhisa hxupinki nukusadhi salax nikusa piyye Elamenna Kolotokomerepa nikusa piyye Koymenna Titialepa nikusa piyye Papilonenna Amrafele pana nikusa piyye Elasaarenna Aryokemema tuuli.
10 Liqakko Sitiimenna kittatte hxohxnidhdhe olho tankare ligha ana shaghiki qagha,
nukusasi piyye Setoomeppa Kemoray iʼorxankosinna pinnenu ghoradhana hxohxonidhisa kitteemi yakame,
hehaqhe karo ghuppeete ghghoradhe.
11 Nikusaadhdhesi salax kodhattepa olho yiʼonu kodhdhina piyye Setoomeppa Kemoranna qagha kaasasikki pojuyeppa ashshonki.
12 Miʼaye qaso Apraamenna Lootʼekka qhooti piyye Setoomenna qaaki maallay usosikka ippojuyeppa olhu sheeghi kassasikka nasixonkippa ashshonkittay.
13 Naqharray qhawho tookko hopinni okayipa Apraamesi Iprawitto kodhdhinu olisaasi torruyu.
Xinkisana Apraame xayto inna qaaki qhawhosi piyye Amoratena makaxko huusu Memre ana payina xiltaane huusu kanoomana kanta;
qhawhusapa qassawhe huusu:
Eskolepa Aneerekka he Apraame qale qhipenu katape sheegha.
14 Apraamekka miʼaye qaso huusuna qhamu pojuyamisi iʼapaqhina hultaame mane huusuna dhaladheppa orxanko qhipe koladhonki orxampawhe qhawho 318 ki ishshapateesipa haka piyye Taane saasa nakala ashshonki.
15 Apraame parakaraadhdhe huususi orxamenu koro huususi iqhoqhotipa awnisana orhxame payyuppa katama Temaaskʼonna karo ammetettay haka piyye Hoopa saasa usundhe ghoru.
16 Apraame olhossi parakaraadhdhe pojuye kaasasi inna holsasi;
holuppa miʼayesi qaso huusuna Lootʼepa kodhatte tuusupa xiske pana waarsho kaasasi holsasu.
17 Apraame nikusa Kolotokomerepa nikusaadhdhesi na qale qagha kasaasi ipputtipa isi holana nikusa piyye Setoomenna xaytossi ana payi ‹Eelte Nukusay› Eelte Shawi saamatteki righadhi.
18 Kʼeesitosi Haallikko Olho Kaasanna Ghulana nikusa piyye Saalemenna Melketʼedhikʼe yiʼopa tʼajje woynattetakki Apraamenu okayi.
19
Hasa payuppa Apraameesi sakoy:
“Haallikosi Olho Kaasanna Ghula
moontopa piyye uumi Iʼapraameesi saki.
20 Haallikkosi Olho Kasaasana Ghula
parakaraadhdhe haahuusi ho likkasipa teexu ho kaanasami ikkodhdha.”
Apraamekka pojko kaasana xargho hudhana tookkoosi Melketʼedhekʼenu teexu.
21 Nukusassi piyye Setoome Apraamena hasinna payi:
“Pojkussa aholastti kaasasi atho akkadhpa korossi kapay ye holasay.”
22 Apraamekka hasi payipa nu holasu:
“Haallikkosi Dhamma Olho Kaasanna Ghula moontopa piyye uumina makaxko huusutakki anho akutadhi.
23 Ano Apraameesi shorokumisi qhamu atu payintinu shalootitte qhutʼanatte taakki suro ahxopettay shapadhisikaki anu hola akkadhe woʼi.
24 Yiʼo koro haayyu yiʼipa hessi ye qale qaghana pakayye tuusundhi malettay ano olho toʼokokaki anu akkani,
naqharay hessi ye qale ashshe Aneerepa Eskole pana Memre pakayye tuusundhi iʼakkadhe.”