Matʼaafa Uumattay
Thorre Uumame Qhatʼeetena
1
Waako payyoteema moontopa piyyesikki uumi.
2 Piyyekka qhooti heneqe kodhdhiti maallay
olho illighti ye qaghi,
piyye kaasay tukankotakki loqhatti,
Nasso Waakitokka qandhe saappaʼita illalaghami.
Kuyyaqako Payyootatte
3 Xaysa tupettay Waako:
“Hammakko ikkodhdha!”
kippayi.
Hammakkosikka ikkodhdhi.
4 Waako hammakko ho xeesa qhamu kodhdhisa iʼeemi,
hammakkusaasikka tukankito kalla reehoy.
5 Waako hammakkosinna:
“Kuyyaqate” inna payi;
qhamussa kula tukkankitokka:
“Awne” na payuppa makaxu.
Iʼawnuyti,
iqhqhayti;
hussakka kuyyaqako payyootatte.
Kuyyaqako Laankay
6 Xaysa tupettay Waako:
“Qandheesi qandheete kalla reehenu asaappe ikkodhdhamadhe!”
kippayi.
7 Hussa maallay Waako saappeesiki uumipa qandhe saappe ghuta qaghapa saappe kalay qaghaasi illena kala reehoy;
qhamosi payi kulakka kodhdhamadhu.
8 Waako saappessina:
“Moonto” inna payipa makaxu.
Iʼawnuyti,
iqhqhayti,
hussakka kuyyaqako laankay.
Kuyyaqako Izxay
9 Xaysa tupettay Waako:
“Piyye haxaway qhamu armadhintinu qandhe montonu katoy qagha kaasay iʼille kula hole” kippay;
qhamosi payi kulakka kodhdhamadhu.
10 Waako Piyyessi haxawana “Kappe” Qandhesi illa holenakka “Paso” inna payipa makaxu.
Hussakka ho xeesa qhamu kodhdhisa Waako iʼeemmi.
11 Xaysa tupettay Waako:
“Kappe dhishtopa poodhaxo manghitopa kaare awsha pana dhishto qhamo iko huusuttay iffuuasta!”
kippayi;
qhamossi payi kulakka kodhdhamadhu.
12 Kappekka miise qawni qawni dhishto poodhaxo sheeghapa kaare awshapa isi kittatte ibhbhe sheegha iffuuasti.
Hussaka ho xeesa qhamu kodhdhisa Waako iʼeemi.
13 Iʼawnuyti,
iqhqhayti;
hussakka kuyyaqako izxay.
Kuyyaqako salxay
14 Xaysa tupettay Waako hasi payi:
“Kuyyaqateesi awnatte kalla reehenu hammaane qawni qawni immonto sappeema kodhdhamadhe,
dhihakko kuyyaqqeetepa ho perreete pana ho leqidheetesi illena kalla reehenu milikite kodhdhe!
15 Immoonto sappeema kodhdheppa piyyenu hammakko teexonki!”
Qhamosi payi kulakka kodhdhamadhu.
16 Waako hammakko lakki he kaanomaasikki uumi:
hammakko dhamma kuyyaqate,
ho qhacʼakka awne qhamu hxusnenu uumu;
holuppa xuske moontitosikka uumu.
17 Waakokka hammaanisa piyyenu qhamu hxusnenu moonto sappeema ixxawwadhi.
18 Olhunu hasa kodhikka kuyyaqatepa awne sappeema qhamu rafise sheeghneppa tukankoosi hammakito kala reehonkinu.
Hussakka ho xeesa qhamu kodhdhisa Waako iʼeemi.
19 Iʼawnuyti,
iqhqhayti,
hussakka kuyyaqako salxay.
Kuyyaqako Hxupnay
20 Xaysa tupettay Waako:
“Qandhadhdhe uumata qagho sheegha ho qawni qawnittay ihhoqhqhe!
Aaghe hoolo sheeghakka immoonto sappeʼita haqe!”
kippayi.
21 Qhamussa kula Waako aaghe pasito he kanoomapa aaghe pile pile he qandheete kittatte qaakapa isi lelleeha qhamo iko huusundhittay;
holuppa aaghe hoolo sheegha pile pileesi iko huusundhitakki uumu.
Hussakka ho xeesa qhamu kodhdhisa Waako iʼeemi.
22 Waakokka hasi payipa sakoy:
“Dhaladhapa naqanku,
qandhe pasitosikka hoqhqhanku!
Aaghe moontitokka piyyeematte innaqe!”
23 Iʼawnuyti,
iqhqhayti,
hussakka kuyyaqako hxupnay.
Kuyyaqako tappoy
24 Xaysa tupettay Waako:
“Piyye uumata qagho sheeghaasi iko huusuttay:
qholaadhdhepa aaghe eerottay piyyaʼita kuqama pana aaghe qarakkito iko huusundhittay illihasta.”
kippayi;
qhamosi payi kula kodhdhamadhu.
25 Waako aaghe mandhito iko huusundhittay,
qholeesikka iko huusundhittay,
he eerotay piyyeʼita kuqamaasikka iko huusundhittaki kodhi.
Hussakka ho xeesa qhamu kodhdhisa Waako iʼeemi.
26 Xaysa tupettay Waako hasi payi:
“Qhawhoosi ho ine lighapa lighno Haanittay uumnipa hxaare pasitopa aaghe moontoʼita haqapa qholadhdhepa aaghe mandhito pana aaghe piyyaʼita eerottay kuqama kaasasi ho rafisa kodhdha!”
27 Qhamusa kula Waako qhawhoosi lighno huusutakki uummi,
lighno Waakitotakki usundhe uummi,
tʼiirakkopa xiskaththo kodhuppa uumu.
28 Waakokka hasi payipa usundhe sakoy:
“Dhaladhapa naqanku!
Piyyesikka hoqhqhankuppa rafisanku:
hxaaressi pasitopa aaghe moontito pana uumata aagheete piyyaʼita lelleeha kaasanna he ghula kodhdhanku!”
29 Xaysa tupettay Waako hasi payi:
“Yiʼo qhamu hune kodhdhininu dhishto poodhaxo sheegha piyyatte qagha kaasappa kare awushito kittate ibhbhe sheegha kaasaasi an hune teexi.
30 Holuppa aaghe piyyatte qaaka kaasannu,
aaghe moontito kaasannu,
uumata qagho sheeghapa isi piyyaʼita lelleeha kaasannu yiʼo innu kodhdhini maalay qashko laxxa kaasaasi annu teexi.”
Qhamosi payi kulakka kodhdhamadhu.
31 Waako olhossi kodhi kaasaasi iʼeemi.
Usokka uumi xeesi.
Iʼawnuyti,
iqhqhayti,
hussakka kuyyaqako tappoy.