2
Uumame moontitopa te piyyatte pana olho na kittatte qagha kaasanna onke hasa lighatakki dhikkadhi.
Kuyyaqako Taxxantoy
2 Waako kodhmossi kaasaasi idhdhikkisi;
hussa maallay kodhmossi kodhi kaasanna kuyyaqako taxxanthonna hxaysadhu.
3 Waako kodhmo uumataasi idhdhikkisina kuyyaqakosi inna hxaysadhi qhooti kodhdhi maallay kuyyaqako taxxanthoosi iʼsakipa kʼulkʼulleessu.
Ataamepa Hewwaane Etene Kennetatte Kittatte
4 Moontopa piyyatte uumame tuusundhi qhamu kula.
Haallikko Waakoa moontidhdhepa piyyesikki uumi.
5 Haallikko Waako irrawwo qhooti ye dhipasuppa qhawho piyye qhotnakka isi ye qaghi maallay dhishtakko toʼokoka piyyatte ye qaghi;
mangho fuuikka ye qaghi.
6 Ikkodhdhitama kapay qelho kappenu lighapa isi piyye kaasa qukisaki qagha.
7 Xaysa tupettay Haallikko Waako kappatti piyye akkipa qhawhoossi kodhdhu,
sindhekata nasso qaghito na “uf” payu,
tanu qhawhokka uumata napse qagho sheegha kodhdhu.
8 Haallikko Waako piyye Etene karo oqhqhaye lighatta qaghsa iʼxayto dhishtito gharisi;
qhawhossi iʼuumi qhamu haaha qaakninu kodhu.
9 Haallikko Waakokka xaytusasa idhdhishto ho ehxhxettay aeemana koro hxasesapa kaare yiʼonu ghara kaasasi kappatte fuuasu.
Xaytussa dhishtitona kittatte kaarkko qagho koro teexa qagha,
holuppa karko olho xeesapa ho maghaasi illena kalla reehenu koro arno teexa qagha.
10 Kolle dhishtusa qukisakka Etenena kittati elti,
kollisakka xayto salaxsa iqhqhootamtipa isi elay.
11 Kolle payyootatte Fisoone ana payi isekka piyyessi Hawila warkʼena tayamti kaasakki elti.
12 Piyyisanakka warkʼe uuma xeesapa shitto oshooqa pana fure na tayama.
13 Kolle lankay Kiyoone ana payi,
isekka piyye Kushe(Toppiya) kaʼita iʼelti.
14 Kolle izxay Tʼekiroose ana payi,
isekka piyye Asoornna karo oqhqhaye ligha kulaki elti;
kolle salxanna Efratʼise ana payi.
15 Xaysa tupettay Haallikko Waako qhawhosisi iʼakkipa xaytosi dhishtito Eteene ana payiisi qhamu gharisnipa tiqadhonu nakitta xawwadhu.
16 Haallikko Waako qhawhossina hasa na payipa hayu:
“Kaarissa xayto dhishtitona kittatte qagha kaasanna awsho huusundhiisi yiʼa.
17 naqharay karkossi olho xeesapa ho maghaasi illena reehenu koro arno teexana awsho huusuusi olo yiʼi!
Moʼo mallay payni kuyyaqako aʼusona yiitina dhukeenu affarray!”
18 Nakaleema Haallikko Waako ippayi:
“Qhawho qhamu qawni qaakninu ye xeesti,
hussa maallay kʼarkʼarsampatte nu gharraasi Annu gharisni.”
19 Haallikko Waako kappati piyyaatte akkipa aaghe qarakkitopa he moontito kaasaasi uumu;
makaxxe mala qhamunnu konniisi eemenu Attaame miinta okaasu,
makaxxessi Attaame uumata qagho sheegha kaasannu kodhittay isa ooqa.
20 Husa mallay Attaame qholepa aaghe moontito pana aaghe qarakkito kaasanuki makaxxe kodhi.
Naqharray usoosi kʼarkʼarsanpatte gharay yenu tayamu.
21 Xaysa tupettay Haallikko Waako Attaameema piʼaatte dhammaasiki na okaasipa ippiʼaadhi tupettay ghinaqqe huusuna meqhte toote akkuppa xaytusaasi sakankottay na hoqhqhashuy.
22 Haallikko Waako meqhtessi ghinaqqe Attaamenna akkiisi xiskaththo ikkodhipa kodhdhu,
Attaame mintemakka okaasu.
23 Attaamekka ippayina:
“Haadhi meqhti te meqhte thaayyu na,
sakanku ho sakanko haayyuna,
tʼiirakkito ittayamti maallay ‹xiskaththo › ana paya!”
24 Husa maallay tʼiirakko paapopa yaye tuususi ihhela hxurrapa xiskaththo tuusu illay ille ghapadhonki,
lakkintoy pishko toʼoko kodhdhonki.
25 Attaamepa xiskaththo tuusu tʼurkumaqqe iqqaghe,
ikkodhdhitama kapay ye ille qharay palame.