Jesu gbɔ-awutu ná mɛsɛntɔ́ mɛkanwekoóhwangǎn ɖe tɔn
(Matye 8.5-13)
7
1 Kín Jesu do lɔxó énɛ́ títɛkpóe ná agun ɖée nɔ ɖótú i lɔ́ kpó, é byɔ otoxo Kapɛɛnawumi tɔn mɛ. 2 Mɛkanwekoóhwangǎn Lɔmu tɔn ɖé ló otoxo lɔ́ mɛ mɔ ɖo mɛsɛntɔ́ vǐvɛ́ ɖékpo, ɖée nɔ jɛ̌ awutu mɔ́ ló okúdonu. 3 Kín ogǎn énɛ́ do se linlin Jesu tɔn, é do tomɛxó Juu tɔn ɖɛhwlɛn hlǎn é de ná ye ní do vɛ̌ ɛ, ní do wa gbɔ̌-awutu na mɛsɛntɔ́ étɔn. 4 Kín ye do wa Jesu de, yě vɛ̌ ɛ vǐvɛ́vǐvɛ́ fáan: «Mɛkanwekoóhwangǎn éxe jɛxɛ́ tɛ alɔgɔ̌, 5 ná é yiwánná otogun mítɔn, éyɔ mɔ́ nɛ gba kpíkplítɛn mítɔn.»6 Kín Jesu do zɔnxɛ́ ye fɛwungɔ, é ma gɔ dɛn dǒ osín lɔ́ mɛ, mɛkanwekoóhwangǎn lɔ́ mɔ do hɔntɔn étɔn e hlin i ná ye ní do lɔ ní i fáan: «Oklunɔ! Dɛ gɔ jɛtuklá káká le, ná un ma jɛxɛ́ omɛ ɖée sín osín mɛ o singǎn byɔ. 7 Enɛ́wútu jǎn un do lɛn fáan é ma jɛ ná nyɔ tete lɔsú ní wa tɛ de; amɔ̌ lɔxó ɖékpo kpowun tɔ mɛsɛntɔ́ mɔ́ jɛ gǎngán. 8 Nyɔ tete lɔsú ló acɛkpikpa ɖé glɔ̌, mɔ ɖo ahwanvǐkpɛ́ e ló tɔ glɔɔ. Ényí un lɔ́ na omɛ ɖé fáan: “Nya”, é mɔ́ nyá, kínɖékpolɔ́, ényí un lɔ na omɛ ɖevo fáan: “Wa”, é mɔ́ wá; ényí un gɔ lɔ na tɔ mɛsɛntɔ́ fáan: “Bayí éxe” é mɔ́ bǎyí i.»
9 Kín Jesu do se oxó énɛ́ e, onú mɛkanwekoóhwangǎn lɔ́ tɔn jɔwun nukún étɔn mɛ, é lɛkpannukɔn agun ɖée xodǐ i lɔ́ mɔ lɔ ná ye fáan: «Un nɔ lɔ́ ná mi: Ékpɛn lo Izlayɛli tomɛ tete lɔsú gbɔ̌n, un ma mɔ yíse éxe wunkɔ kpɔn.»
10 Kín omɛ ɖée mɛkanwekoóhwangǎn lɔ́ do hlan e do lɛkɔwa osín mɛ, yě mɔ fáan mɛsɛntɔ́ lɔ́ ko jɛ gǎngán.
Jesu fɔn ocɔ ovǐ xlunhwǎn osúkúsi ɖé tɔn
11 Enɛ́godo, Jesu nɔ sɔ́n nyá otoxo ɖée ye ylɔ́ jǎn Nayini mɛ. Núkplɔ́ntɔ́ étɔn e kpó agun ɖaxó ɖe kpó mɔ xodǐ i. 12 Kín é do sɛkpɔ hɔngbǒ otoxo lɔ́ tɔn ji, yě ze ocɔ ɖé fɛwungɔ ɖiɖi kɔn, ocɔ ovǐ xlunhwǎn kúnɖékpo osúkúsi ɖé tɔn. Otoxo lɔ́ mɛnu e susu gɔ xodǒ osúkúsi lɔ́. 13 Kín Oklunɔ Jesu do mɔ náwe osúkúsi lɔ́, onú étɔn wa lɛ́blánú ní i, é mɔ lɔ ní i fáan: «Gɔ vi-avǐ ba le!»
14 É sɛkpɔ ocɔkpótín lɔ́ mɔ ɖoalɔ é go, omɛ ɖée ze ocɔkpótín lɔ́ e mɔ nɔte. Jesu lɔ fáan: «Ɖɛkpɛvǔ! Un ɖegbe ná ɛ, fɔntite!»
15 Omɛkúkú lɔ́ gɔ fɔn sin-awán mɔ gɔ cɛ xólɔ. Jesu mɔ gɔ ɛ jo ná onɔ étɔn. 16 Obú gɔ ɖi ye omɛ kpó, ye mɔ gɔ nɔ kpágigo ná Mawu mɔ nɔ lɔ́ fáan: «Gbeyílɔtɔ́ Mawu tɔn ɖaxó ɖe tɔn ló mímɛ, Mawu wa alɔgɔ̌ ná otogun étɔn.» 17 Onú ɖée Jesu wa énɛ́ gɔ gbakpe gbɔn agbegbe Juɖe tɔn kpéte mɛ kpó agbegbe ɖée lɛdǐ i e kpó mɛ.
Jaan do núkplɔ́ntɔ́ étɔn e hlǎn Jesu de
(Matye 11.2-19)
18 Núkplɔ́ntɔ́ Jaan mawusinlɛnamɛtɔ́ tɔn e ɖogbe onú ɖée jɔ títɛkpóe tɔn ná mɛkplɔ́ntɔ́ yetɔn. Jaan ylɔ awe ló núkplɔ́ntɔ́ étɔn e mɛ, 19 mɔ do ye hlan Oklunɔ Jesu de nádo kansí i fáan: «Bé ayɔ wá Klisti hwlɛngǎntɔ́ ɖée ná wa lɔ́? Kayí mí ní nɔtekpɔn omɛ ɖevo?» 20 Kín núkplɔ́ntɔ́ lɔ́ e do wa Jesu de, ye lɔ ní i fáan: «Jaan mawusinlɛnamɛtɔ́ do mí hlan tɛ de ná mí ní do kanse é fáan: Bé ayɔ wá Klisti hwlɛngǎntɔ́ ɖée ná wa lɔ́ kayí mí ní nɔtekpɔn omɛ ɖevo?»
21 Lo ojlɛ̌ ɖékpolɔ́ mɛ, Jesu hwlɛn omɛ susu gan sɔ́n awutu yetɔn e sí, sɔ́n maɖógǎn yetɔn e sí, mɔ tunkan ná omɛ ɖée gbigbɔ mawé e nɔ doyaná e, é mɔ gɔ hun nukún ná nukúntɔ́nnɔ susu. 22 Enɛ́godo, é gblɔn ná núkplɔ́ntɔ́ Jaan tɔn e fáan: «Mi nya ɖogbe onú ɖée mi mɔ kpó onú ɖée mi se kpó tɔn na Jaan: nukúntɔ́nnɔ e nɔ mɔ́ nú, sɛ́kúnɔ e mɔ nɔ zǐnzɔnlin, kpozɔnjɛtɔ́ e mɔ nɔ mɔ́ azɔnhɛngbɔ kpó lɛwéa kpó yí, tókúnɔ e nɔ sé nú, omɛkúkú e nɔ fɔ́nsɔ́nkú, wamamɔnɔ e nɔ sé owɛnjɔwǔn Mawu tɔn. 23 Nújɔwunnánɔ wá omɛ ɖée ma ná jo yíse étɔn do ná nyɔ tɔn wútu.»
24 Kín mɛdǒhlan Jaan tɔn e do sɔn, Jesu cɛ oxó lɔ ná agun lɔ́ dǒ Jaan ji fáan: «Amú mi nya kpɔn ló danklóji? Fántín ɖée jɛhɔn nɔ hwán nɛ ya? 25 Tíi, amú mi nya kpɔn? Gbɛtɔ́ ɖée do avɔn acɔ́nɔ e nɛ ya? Omɛ ɖée dǒ avɔn okwávǐvɛ́gbe e mɔ́ ɖúgbɛ e, axɔ́lú e sín hɔnmɛ yi ye nɔ. 26 Amú mi nya kpɔn? Gbeyílɔtɔ́ Mawu tɔn ɖé nɛ ya? Ɛɛn, un nɔ lɔ́ ná mi, omɛ ɖée hugán gbeyílɔtɔ́ Mawu tɔn nɛ. 27 Ɖó Jaan wá omɛ ɖée wútu oxó Mawu tɔn do lɔ fáan:
“Yíwe, un do tɔ owɛndǒtɔ́ hlan jɛnukɔn ná ɛ,
ní do jla tɛ alixo ɖo”!
28 Un hunlɔ ná mi fáan, ɖékpékpé lo ye omɛ ɖée jɔsɔ́n adɔ nyɔnu tɔn mɛ ma hugán Jaan. Cógancó, omɛ ɖée hwe hugán omɛ títɛkpóe ló Axɔ́lúɖu Mawu tɔn mɛ hugán éyɔ. 29 Otogun lɔ́ kpéte kpó tokwácántɔ́ e kpó ɖée se oxó étɔn ɖekunnu fáan dǒdónɔ wá Mawu, Jaan mɔ lɛmawusin ná ye. 30 Amɔ̌ Falizi e kpó sɛ́nkplɔ́nmɛtɔ́ e kpó gbɛ lɛndote Mawu tɔn hlan dali yetɔn, mɔ gbɛ mawusinlilɛ Jaan tɔn.»
31 Jesu gɔ lɔ fáan: «Amɛ́ go un ná jlɛ gbɛtɔ́ hweéxenutɔn e tɔn do? A mɛ ye ga jɔ? 32 Yě jɔ vikɛvú ɖée sin-awán ló tovali mɔ nɔ dlǎn ogbe hlǎn yenɔzo e fáan:
“Byɛ́ kun ofle ná mi gbɛ̌ mi ma ɖuwe!
Mí ji ovohan ná mi gbɛ̌ mi ma vi-avǐ!”
33 Ɖó Jaan mawusinlɛnamɛtɔ́ wa, é ma ɖú akla gbɛ̌ é ma gɔ̌ nú vɛɛn mi mɔ lɔ fáan: “Gbigbɔ mawé yi é ló é mɛ!” 34 Ovǐ gbɛtɔ́ tɔn wa, éyɔ ɖú, mɔ́ gɔ̌ nú, mi mɔ gɔ lɔ fáan: “Dǎwe éxe, adɔnɔ vɛɛnnutɔ́ ɖe nɛ, hɔntɔn tokwácántɔ́ kpó nyladǒnɔ e kpó tɔn.” 35 Amɔ̌, ye omɛ títɛkpóe ɖée yí núnyínyɔ́ Mawu tɔn e ɖékunnu fáan dǒdó wá núnyínyɔ́ lɔ́.»
Jesu ɖunú ló Falizi ɖé sín osín mɛ
36 Falizi ɖé ylɔ Jesu fáan é ní wa ɖúnú kpódǒ yelɔ́ kpó. Jesu byɔ osín Falizi lɔ́ tɔn mɛ mɔ sin-awán ló nuɖuɖukákɔn kpí i kpó. 37 Lo sáa énɛ́ mɛ, náwe ogbɛ gbǐgblézǎntɔ́ ɖé nɔ́ otoxo lɔ́ mɛ. É se fáan Jesu ló osín Falizi lɔ́ tɔn mɛ. Éyɔ mɔ wa kpódǒ lɔ́fínɖa owánjɔwǔnnɔ ogo ɖékpo kpó. Osé hwankpɛnɔ ɖée ye ylɔ́ jǎn alubatlu yi ye do bayí ogo énɛ́. 38 É nɔte ló godo ná Jesu ló afɔkɔ étɔn, mɔ nɔ vǐ-avǐ, ɖasin étɔn mɔ nɔ kún dǒ afɔ Jesu tɔn e ji. É mɔ yi oɖa étɔn e do nɔ súnsún afɔ Jesu tɔn e, mɔ kisi ná ye mɔ gɔ nɔ kɔ́n lɔ́fínɖa lɔ́ dǒ ye ji. 39 Kín Falizi ɖée ylɔ Jesu lɔ́ do mɔ jan ítɔ́, é nɔ lɔ́ ló éɖe mɛ fáan: «Ényí dǎwe éxe nyí gbeyílɔtɔ́ Mawu tɔn núgbǒ nɛ, é ná ko nyɔ omɛ ɖée wunkɔ wá náwe ɖée nɔ ɖóalɔ é go, kpó onú ɖée é nyi kpó, é ná ko nyɔ fáan náwe ogbɛ gbǐgblézǎntɔ́ ɖe nɛ.» 40 Jesu yixó mɔ lɔ ná Falizi lɔ́ fáan: «Simɔɔ! Un ɖo onú ɖe ná lɔ ná ɛ.» Simɔɔ gblɔn fáan: «Mɛkplɔ́ntɔ́! Lɔxó!» 41 Jesu lɔ fáan: «Kwányanamɛtɔ́ ɖe ɖo axɔ́tɔ́nɔ awe. Omɛ ɖé ɖu abɔgankwá fowekanwekoó (500) dǐ i, omɛ awetɔ́ mɔ ɖu abɔgankwá kanɖeawó (50). 42 Amɔ̌, kín ye ma do ɖo onú ɖée ye ná do su-axɔ́ yetɔn e wɛ́, kwányanamɛtɔ́ lɔ́ mɔ jo axɔ́ lɔ́ do ná ye. Lo ye omɛ awe lɔ́ e mɛ, amɛ́ ná yiwánna kwányanamɛtɔ́ lɔ́ hugán omɛ ɖe?» 43 Simɔɔ gblɔn fáan: «Un ɖi fáan, omɛ ɖée é jo-axɔ́ susu do ná lɔ́ nɛ.» Jesu lɔ ní i fáan: «O lɔ núgbǒ.»
44 Enɛ́godo, Jesu lɛkpannukɔn náwe lɔ́, mɔ lɔ ná Simɔɔ fáan: «Ó mɔ náwe éxe? Un byɔ tɛ sínmɛ, o ma na o osin nádo klɔ tɔ afɔ e, amɔ̌ éyɔ, é kun ɖasin étɔn e dǒ tɔ afɔ e ji, mɔ gɔ sunsún ye kpódǒ oɖa étɔn e kpó. 45 O ma gɔ kisi ná o, amɔ̌ éyɔ, sáa ɖée mɛ gbɔ̌n é wa xítɔ léb, é nɔ kísi ná tɔ afɔ e magbɔjɛ. 46 O ma kɔn ami dǒ tɔ takún, amɔ̌ éyɔ, é kɔn lɔ́fínɖa dǒ tɔ afɔ e ji. 47 Enɛ́wútu, un nɔ lɔ́ nɛ fáan: é mɔ jona nyladǒ étɔn e kpó yi, énɛ́ yi é zɔn é do do owán-yíyí susu xlɛ. Amɔ̌ omɛ ɖée ye jo nyladǒ vǔɖe ná, ná do owán-yíyí vǔɖe xlɛ.» 48 Jesu wa lɔ́ ná nyɔnu lɔ́ fáan: «Ye jo tɛ nyladǒ e nɛ.» 49 Omɛ ɖée nɔ ɖúnú kpí i kpó e nɔ lɔ́ ló yeɖé e mɛ fáan: «A mɛ gǎ wá dǎwe éxe ɖée gɔ̌ jǒ nyladǒ e ná mɛ?» 50 Amɔ̌ Jesu lɔ ná nyɔnu lɔ́ fáan: «Tɛ yíse hwlɛn ɛ gan. Nya lo jijɔxo mɛ.»