22
1 Hom tare yu'urɛ sonɛ nyane lɔgɔrɔ, te na'ahegɔ gana sanlema la sanlenpeelega.2 Sɛla n boe dankanpa, la nahadoma zan'an teŋasoka dela, Na'ayenɛ n naam ba zan'an.
3 Potɛn'sonɛ daana ne nyɛ be'em sogɛ a mɛŋa mɛ, ge yampɔ'ɔredaana ne to'ohɛ bo mɛ nyɛ namehegɔ.
4 Sigehe mɛŋa, la Na'ayenɛ zɔɔlom yɔɔrɛ dela panrega, la na'ahegɔ, la vom.
5 Nɛre ŋmɛleŋɔ sore tare la gɔn'ɔhe la bɛntɔ, te se'em n tan gu'ura a mea ka lɛne ba.
6 Pa'alɛ kɔma sɔrɔɔ soŋɔ la, te ba han ta zo'e ba kan bɔregɛ.
7 Bondaana dela naha kpɛ'ɛma, sandita dela pɛmɛha la yameŋa.
8 Se'em n tone pototooma nyɛ' daaŋkantɛ, te a pototooma la wan bahɛ yoo.
9 Sɛba sake nu'o tɛɛnrɛ nyɛte la kan'an, la dela bama bo'ore nahadoma la dia la zuo.
10 Sa'ɛ nɛre kɛha, te zaberɛ yehe, te sagaŋɔ la vi' wan ba'ahɛ.
11 Se'em n de birikina, ge tara na'ahegɔ yetɔgom, naba n wan dɛna a zɔ.
12 Na'ayenɛ behere baŋere doma mɛ ge sagona nɛrebɛ'ɛhe yetɔgom baha.
13 Zinyanka yeti gbegenɛ en gan' yeŋa, mam han yehe a wan ko mam.
14 Pɔgɔyaalega yetɔgom dela boko kantɛ, se'em te Na'ayenɛ yaɛ la n wan lu bini.
15 Gɔɔnɛ en perɛ bodibila suunre, ge ŋmɛ'ɛre wan dige de bahɛ.
16 Ho fan' la nahadoma tara, bii ho ton tara bɔ'ɔra kpɛ'ɛndoma tare ho yɛ'a la teŋa.
Yɛla pihitan'
17 Be'e toberɛ la ho kelehe yamdoma n tɔgɔre sɛla wa. Bahɛ te ho potɛn'ɛrɛ to'e en pa'alegɔ wa. 18 Ba han bɔna ho poan, te ho tara tɔgɔra, la wan ana ho soŋa. 19 Mam tɔgɛ pa'alɛ ho wa, bala te ho wan delom Na'ayenɛ. 20 Mam golehɛ la yɛla pihitan' bo ho, kan'aŋɔ la baŋere yɛla. 21 Yɛla la pa'alɛ ho la yelemɛŋɛrɛ la sera, bala te ho ta'an leregere soŋa bo sɛba n tom ho la?
22 Da fan' naha te a de taroma zuo, da tara yɛla muguha taromdoma. 23 Na'ayenɛ n behere ba yɛla, te hom se'em n sagom ba, Yenɛ wan sagom hom me,
24 Da nyɔgɛ zɔtɔ la sunsunya daana bii ho dɔla zukpe'eŋo daana 25 ge ho wan tɔgɔhɛ ba etegɔ la, te ba yɛla wan taɛ ho.
26 Se'em han pengɛ sɛla nɛra zen'en da ze'ele po'olɛ nɔɔrɛ te ho wan yɔ sanɛ la, 27 Se'ere n sɔe, ho han ka ta nyɛ yɔ, ba wan vaɛ ho soŋɔ seko te ho gan'an ko zuo la keŋɛ.