21
1 Naba suunre ane wo lɔɔhe ko'om bɔna Na'ayenɛ nu'uhen, te a ŋmɛreha dɛ enŋa bote se'em.2 Nɛra woo sore ane soŋa bɔ'ɔra a mea ge Na'ayenɛ behere la suunre la poan.
3 Ho tona tontɔɔ, la sɛla n de ma'an, dela sɛla te Na'ayenɛ bɔta gana kaanbegɔ.
4 Se'em n ka nane la pa'alɛ mɛŋa suunre, dela be'em te potɔpa la eta.
5 Ninmɔ'ɔredaana potɛn'ɛra tare en yɛ'a la kekeko poan, ge kaanbe kaanbedaana yeere la nɔŋɔ poan.
6 Lɔgɔseto te ho parom nyɛ' wan mɛlom wo zun'uhe la, ba tare ho yɛ'a la kum poan.
7 Potɔpa mɛŋa gbirigere la wan piie ba keŋɛ. Se'ere n sɔe la, ba zagahɛ mɛ te ba kan tom sɛla n nare.
8 Be'emdoma sore ŋmɛlene mɛ, ge tontɔɔdoma etegɔ woo dela ma'an.
9 Hom yage gɔhɔgɔ nyane hom boe bɔ'ɔ poan la pɔgɔnyunyuŋa.
10 Potɔpa sea nɔŋɛ la be'emtooma, ba ka zote ba nɛreba ninbɔn'ɔn.
11 Namehe nɛre kɛha te potɛn'pɔ'ɔrɛ daana nyɔgɛ la yam, kan'an yamdaana, te a malom nyɛ la baŋerɛ.
12 Yenɛ mi' sɛla te potɔpa la eta ba yiya poan ge mɛ wan sagaŋɔ ba.
13 Ho han ka kɛleha nahadoma kaahega, ho me pon kan kaahɛ te se'em kelehe ho.
14 Ho han sogɛ bo bo'olom, bo kiinhiri sunsunyiim mɛ, te mu'ure gu'ura sunsunyiim ho zuo.
15 Se'em n tom ma'an, la dela popeelom bo tontɔɔdoma, ge dɛna dabeem bo be'emdoma.
16 Se'em n buregɛ bɔkerɛ sore la poan yɛ'ɛhe la yɔɔen.
17 Se'em n nɔŋɛ nyɛlom wan lebege naha, te se'em n nɔŋɛ daam la ka'an kan malom dɛna dakanrɛ,
18 Potɔpa to'ore la namehe seko te ba zegera te eŋɛ nɛresondoma, te tontɔɔdoma la wan peɛn ge te potɔpa la tee sige namehegɔ la poan.
19 La ane soŋa te ho kɛn'ɛra pɔgɔtia poan ha, nyane hom boe la pɔgɔnyunyuŋa la sunsunyiim.
20 Lɔgɔsonɔ la ka'an perɛ la yamdaana yire, ge gerego ne pan'am a bonɔ mɛ.
21 Se'em n eere tontɔɔ la zo'ohogɔ bɔŋa, wan nyɛ vom, la tontɔɔ la na'ahegɔ.
22 Yamdaana en kɛn' teŋkantɛ en kpe'em zabɛ nyaŋɛ lobɛ ban dekɛ ba mɛŋa delom sɛla la.
23 Ho tara ho nɔɔrɛ la ho zɛleŋa dela ho yehe ho mɛŋa daaŋɔ poan.
24 Pa'alɛ mɛŋa, la nɛre wurubere daana te ba yi'ira nɛre kɛha la, pa'ale la a mɛŋa yoo.
25 Zinyanka n bote sɛla la n wan ko en. Se'ere n sɔe la a nu'uhe ka bote tooma.
26 Saŋa woo a toonɛ dela be'ero, ge tontɔɔdoma la bo'ore mɛ, ba ka gumi ba nu'uhe.
27 Potɔpa kaanbegɔ fɛn'ɛn mɛ Na'ayenɛ nɛŋan bii ba nya tare ba na, la potɛn'yooro.
28 Aze'elenyɛdaana se'em n parone wan mɛlom, ge se'em n kelehe yelemɛŋɛrɛ wan vɔna wuuha.
29 Potɔpa lorege ba nɛŋan mɛ, ge tontɔɔdoma behere ba sore la soŋa soŋa.
30 Yam bii bɔkerɛ, bii kan'aŋɔ ka boe wan nyaŋɛ Na'ayenɛ.
31 Pɛɛntɛɛnra maahom la a yeho gura zaberɛ daarɛ, ge nyaŋerɛ la ze'ete la Na'ayenɛ zen'en na.