23
1 Ho han zin'ita la nɛrekantɛ te ho di, behe sɛla n ze' ho nɛŋan la soŋa. 2 Nyɔkɛ ho mɛŋa, ho han dɛna la punya'andaana. 3 Da tara koŋkoma'ahom la dia la soŋa, ge ka dela bɛnregɔ.4 Da mɛlɛha ho mɛŋa te ho nyɛ' lɔgɔrɔ, tara yam la ho vo'oha. 5 Ho han dekɛ ho niho kpa' la tarega, ka wan mɛlom, ka wan puhe kelompagehe ɛngera wo tuguho la.
6 Da bɔta bonbɛ'ɛleŋa dia, da ɛɛra a disoŋa la. 7 Se'ere n sɔe la a dela se'em n tɛn'ɛhe a dia la ligiri zoe a wan yele ho yeti, dita ge nyuura, ge la ka paɛ ba puuren. 8 Ho wan di fiin wa, ge tin' ba bahɛ na, te yetɔgɔnyɛlegɔ la te ho tɔgɔ bo en la dela yoo.
9 Da tɔgɔra bɔ'ɔra gɔɔŋɔ, se'ere n la a wan zagahɛ ho yam yetɔgom.
10 Da malom vuruge deemen deemen beene, bii danlehom sebo n beŋɛ hom la keebega, 11 Se'ere n sɔe la ba faanra la kpe'em mɛ, a wan zabɛ la hɔ ba zuo.
12 Bahɛ te ho potɛn'ɛrɛ kɛleha pa'alegɔ, te ho toberɛ wuna baŋere. 13 Da zagahɛ ho kɔma ŋmɛ'a, ho han ŋmɛ' ba, ba kan ki. 14 Kafɛɛbega han ŋmɛ' bia, ho wan fan' ka sagaŋɔ poan bahɛ.
17 Da bahɛ te ho nini tɛnta la be'emdoma, ge saŋa woo, bɔna Na'ayenɛ zɔɔlom la poan. 18 Ho ba'ahegɔ wan ana soŋa, te potɛn'ɛrɛ se'ere te ho tara la wan eŋɛ. 19 N bia, kelehe la ho nyɔgɛ yam, bahɛ te ho suunre dɔla tontɔɔ sore la, 20 Da dekɛ ho mɛŋa lagom la daambugureba, bii valehe. 21 Se'ere n sɔe la, daambugureba la diiha ba'ahe mɛ la nɔŋɔ, te gɔɔm bahɛ te ba ka tara sɛla yɛɛra.
22 Kɛleha ho sɔ se'em n dɔgɛ ho, ge ho ma han ta korogɛ. Da bahɛ en yoo. 23 Da' yelemɛŋɛrɛ ge da koohe bo, dekɛ yam la pa'alegɔ la bɔkerɛ pa'ahe bini. 24 Bisɛka en kene tontɔɔ a sɔ nyeene mɛ, se'em n dɔgɛ yamdaana poore pee la en. 25 Ho etegɔ en bahɛ te ho sɔ la ho ma nyeena ho zuo, bahɛ te se'em n dɔgɛ ho la tara popeelom ho zuo.
26 N bia, yu'ɛ ho suunre wa bo n pa'alegɔ wa, ge bahɛ te ho nini bɔna mam dole sɔrɔɔ seto wa poan. 27 Pɔgɔyireyia dela boko kantɛ, te pɔgɔyaalega dɛna bulega en kɔ. 28 Pɔgɔkana taaba gan' mɛ gura wo faanreba la, a bahɛ te boraahe ka tara yelemɛŋɛrɛ la ba pɔgɔba.
29 Ane n tare fabelegɔ? Ane n tare sunsagaŋɔ? Ane n zaberɛ? Ane n nyɔnɛ? Ane n pɔgɔlom yoo? Ane nini en ane mɔlɔ mɔlɔ? 30 Sɛba n dole daam na'ma la en bala, sɛba n dole gɛnregera daam nyuura en bala. 31 Da dagom beha daam la mɔ'ɛ se'em loi ge tɛnra ŋmai ŋmai wanɛ la poan, te ho tugule te bo sigera bala mea soŋa soŋa. 32 Ba'ahegɔ zan'an, bo kɛ'ɛre mɛ wo kanpɛn'a la zankaŋa la. 33 Te ho nini nya nyɛta yelenyalema, te ho nɔɔrɛ nya yɛta yetɔgɔyooro. 34 Ho nɛŋa nya wan kaalena ge te ho tiira wo nɛra n boe ɔɔnrɔŋkantɛ poan te ko bɔna ko'kantɛ poan. 35 Ho wan yeti, ba kɛ' mam mɛ ge en ka pɔgɔlom, ba ŋmɛ' mam mɛ ge mam pon ka wuna. N wan ihege la wane ma'an nyɛ' en daam nyu'.