Judá nacuapijiwi bijiaya ofrendababiaba Diosojawabelia
3
Orijibia, profeta Malaquías jumaitsi Judá nacuapijiwijawabelia:—Jehová pepopiacuenesaënë daxitawecua pacajumaitsi: «¡Marapacuenia pataenameje! Xanë itorobianajë tanejumepaebinëa tanetsiwajënaexaniawaetsinexa jiwi pexanaecuene, jamatejema tapatsinexa. Nexata, papetuxanenë paxamë pawajënae-ewetawanapame pepatsijawanexa, jemata naitajëtsiana templobojawata. Ponë, ‘Pejumeliwaisicaponaenë Dioso penaliwaisicajonejawanexa’, bajaraponë raja patsiana», pacajai Jehová—.
2 »¿Jipatsa cuenecaëjëpatsi penucaenexa pianeconijibinëcuenia nataeya bajaraPonë pitabarata pepatsimatacabijawata? ¿Jipatsa cuenecaëjëpatsi rowia penucaenexa, pematabacabëta irataeya nucaenejewa, bitso beweliajamatabëcuenewi nataeya bajaraPonë pitabarata? Ajibi cajena, tsipaji raja bajaraPonë patsiana jiwi pijaneconi petocanaëjëtsinexa. Pacuenia isoto penani pesetsijawata jiwi bawecuatsata piabejejawa, ëpepopexaniananijawa penacopatsinexa, pacuenianua jabón ajibia-exana piaxuirajawami, bajarapacuenia bajaraPonë patsiana, jiwi pijaneconi petocanaëjëtsijawata pibisiacuene pexanaewi pewecuatsatsinexa pijajiwituatuajëta, penacopatsinexa ëpexaniacuenia pexanawanapaewi. 3 Orijibia, pacuenia penani pesetsiwi piabejejawa bawecuatsata, ëpexanianani penacobabinexa, palatananitota, oronanitota-ata, bajarapacuenia Jehová exanaena Levípijinë pemomoxi sacerdotewijawabelia. BajaraPonë wecuatsatsiana pamonae piajamatabëcuenebejewi, penacopabinexa sacerdotewi ëpexaniajamatabëcuenewi bajaraPonë pitabarata. Bajaraxuacujinae, cuenecaëjëpaenatsi jane baja icatsia dajubimonae petajuitabiabinexa altar-jumata, pacuenia tsicarucatsi pexanaejawanexa. Nexata, Dioso siwajamatabëcuenebarëyanua tsane petajuitsijawanë. 4 Bajaraxuacujinae jane baja, Jehová siwajamatabëcuenebarëya tsane Judá nacuapijiwi, Jerusalén tomarapijiwi-ata petajutsijawanë dajubi, pecapatabiabijawanënua ofrendacuenia, pacuenia bajayatami exanabiaba pijasalinaiwijawabelia.
5 »Orijibia, Jehová pepopiacuenesaënë daxitawecua pacajumaitsi: «Jiwi tananeconitsia-exanaenënexa patsianajë, tacuenetaenëcuenia-ata cuenewajunupaebianajë jiwi pijaneconi. Nexata, bepijiayo itsajamatabëcuene xainaenejewanë cuenewajunupaebianajë pamonae penajorobiwi, pijawajiwi pepenetsiwi, penajumetsënëtsicuenia najumecapanepaeya pejumaitsiwi, xaniawaetsia apopematamobiwi petonacuenebiwitsi, pebejiobia-exanabiabiwi pamonajiwi pewecuatëpaewitsi, sutijiwixi, itsanacuanëwerena pepatsiwi-ata, pamonaenua xaniawaetsia xanë Jehovanë aponeyaiyataeyabiabi. Bajarapitsiwi pijaneconi caecuenia cuenewajunupaebianajë, tananeconitsia-exanaenexa», jai Jehová —jai Malaquías Judá nacuapijiwijawabelia.
Pacuenia Judá nacuapijiwi nacobetoxotabiaba Dioso pijajawanë
6 Icatsia, profeta Malaquías jumaitsi Judá nacuapijiwijawabelia: Jehová raja pacajumaitsi: «Xanë raja Jehovánë, apotanajamatabëcujiru-itothianaenë ta-exanaejawanexa najumecapanepaeya tajumaitsijumemiwecua. Bajaraxuata, paxamë Jacob-pijinë papemomoximë apopacatocopatsitsi itsamonae papecawerebiabinexa, pibisiacuene pa-exanawanapae-atamë. 7 Baja cajena panijasalinaiwijawawerenacujinae mapamatacabijawaberena-ataje, paxamë pawecuanatsatabiabame, apopajumecowënëtawanapaemënua patacatonajumecopatsiliwaisianë. Bajaraxuata, xanë, Jehovánë, pepota-acuenesaëtsaponaponaenë pacajumaitsitsi mapacueniaje: ‘¡Panajamatabëcuenepënëyorore pibisiacuene pane-exanawanapaejawawecua xanëjawaberena, icatsia patanejumecowënëtabiabinexamë! Nexata, xanë juya pacasiwajamatabëcuenecaewianatsi panijaneconimi, icatsia pexaniacuenia patacayawenonabiabinexa. Bajarapacuenia pacajunatsi-atatsi, paxamë panejumaitsimë tsabiabi: ‘¿Detsa xua pacato-exanatsi xua yabara icatsia panajamatabëcuenepënëyorotsijitsianë xamëjawabelia?’ panejamë. 8 Xanë itsiata pacayanijobatsi: ‘¿Pacatsita tsaja pexaniacuene jiwi penacobotoxotsijawa Dioso pijajawanë? Paxamë cajena panetonacobetoxotabiabame,’ pacajaitsi. Itsiata baitsi jane, pajumaitsimë tsabiabi pataneyanijobijawatamë: ‘¿Detsa xuanë nexata paxanë patajacatonacobetoxotsi?’ pajamë tsabiabi. Paxamë pacatsicarucae-ata picani patanerajutaponaenexamë, panewecua-asiwamë tsabiabi panija-ofrendajawanë, panijadiez xuayomibejeyajuwënëjawa-ata. 9 ¡Xaniajanë! Padaxitamë Judá nacuata panejinawanapaewi panetonacobetoxotabiabame bajaraxuanë. Baraxuata, xanë pacatocaëjëtsianatsi pibisiacuene panenatotaewanapaenexa.
10 »Nexata, xanë, Jehovánë, pepota-acuenesaënë daxitawecua, pacajumaitsitsi bajaraxua yabara: ‘Pacapatabiabianame templobojawaberena patanerajutaponaenexamë diez xuayomibejeyajuwënëjawa, caewiria caejawa canacujitsia, patacatocaëjëtsicuenia patanerajutabiabinexamë. Nexata nawitsia xainaena pexaejawa penacuenebiwi tajabojawata. Pëtsa panewecua-asiwamë bajaraxuanë. Panecuene-ëjëre saya pexaniajamatabëcuene taxainaenëcuene, xaniawaetsia paneyapëtaenexa. Nexata, patanerajutabiabijawanëwecua, xanë juya nawitsia pacarujutsianatsi daxitacuenejawanë. Bepatacatobaupatsicuenia itaboxotatsia, athëbëwetsica pacato-othopaeya-exanaenicatsi, bitso ayaicuenia papecatonawitsinexa pexaniacuenia patacayawenonaejawanë. 11 Orijibia, xanë apocuenecopatsinë tsane pane-ubijawanë papecatobijianaewinexa. Tocopatsianajënua panija-uvabacabonë ayaijawa papecatonacuaitsinexa. 12 Bajarapacuenia patacayawenonaexae tsane, daxitanacuanëpijiwi papecabaracuaicuaijawata pacawënëbaracuaicuaijai tsane Dioso pexaniacuenia papecayawenonabiabiwicuene. Nexata, panejinawanapaenacua jiwi bitso pitajitsipaenacua tsane pejinawanapaenacuanexa’, pacajaitsi Jehovánë pepota-acuenesaënë daxitawecua —jai Malaquías Judá nacuapijiwijawabelia.
13 Icatsia, profeta Malaquías jumaitsi Judá nacuapijiwijawabelia:
—Jehová pacajumaitsi: «Paxamë bitso pibisiacuenia xanë panebaracuaicuaijamë tsabiabi. Bajarapacuenia pa-exanae-atamë, tsiteca paneyanijobabiabame: ‘¿Detsa pacuenia patajacabaracuaicuaijai pibisiacuenia?’, panejamë tsabiabi. 14 Nexata Jehová pacajumecanawiata: ‘Orijibia, paxamë panajumaitsimë tsabiabi: «Wajatojinawanapaejawa Dioso pejitsipaecuenia aponacayawenonae itsacuenejawayo-ata. Apopitsitsi itsacuenejawa bajarapacuenia waja-exanaejawata. ¿Detsa xua nacatoxanepanaejitsipa jumecowënetsiaya waja-exanawanapaejawa xua Jehová naca-itoroba? ¿Detsa xua nacatoxanepanaejitsipa wajanaxatatsijawa piayo-eseto, wajanajamatabëcuene-itajëtsinexa wajanasiwanajamatabëxainaejawa pibisiacuene waja-exanaeneconi Jehová pepopiacuenesaënë pitabarata? 15 ¡Amatamobi saya! Waxaitsi cuenetaeyabiabatsi pamonae Diosowecua ayaijamatabëcuene penataewi, pebarëyacuenia pejinawanapaejawa. Cuenetanetsinua pamonae pibisiacuene pexanawanapaewi pexaniacuenia petopitsapabiabijawatsi xua nacuenebabiaba. Bajarapitsicuene pexanawapaewi jamatabëcuene-ëjëbabiaba Diosojawabelia picani pibisiacuene petocopiapatsia-exanaenexatsi, itsiata jane Dioso aponaneconitsia-exanabiabitsi. Jamatejema saya jinawanapa. Yee, amatamobi Dioso pejitsipaecuenia wajajinawanapaejawa,’ panajamë tsabiabi, pibisiacuenia patanebaracuaicuaijaijawatamë», pacajai Jehová —jai Malaquías.
16 Pamonae asiwaya yaiyatane Jehová, bajarapamonae nabarëcuaicuaijai tsabiabi, namata-enetsia penajamatabëcuenesaëya-exanaenexa Jehová pejitsipaecuenia pejinawanapaenexa. Nexata bajarapamonae Jehová bitso namuxuna-ewetabiabatsi xuanë najumaitsi. Orijibia, Jehová pitabarata itsanë wënëyaquinaruba, pabaxutojawata najamatabënapitabiabijitsia pamonae Jehová yaiyataeya jinawanapa, jumecowënëtawanapanua.
17 Icatsia, profeta Malaquías jumaitsi Dioso pejumecowënëtsiwijawabelia:
—Jehová pepopiacuenesaënë daxitawecua jumaitsi: «Pamatacabi natocaëjëtajë tapatsinexa tacuenecanaëjëtsinexa tajajiwi pijaneconi, bajarapamatacabi yaiyataeya tanejumecowënëtsiwi pepotajajiwicuenia nacopatsiana, asiwaya tataenexa itsamonaewecua. Pacuenia paxajiwi asiwaya taeyabiaba pexënato pejumecowënëtsinëtsi, pexanaexae pitorobicuenia, bajarapijinia pacuenia xanë taenajë bajarapamonae. 18 Bajarapaepatota, matapania icatsia paxamë payapëtaename pacuenia xanë, Jehovanë, saicayacuenia taeyabiabajë pamonae pexaniacuene pexanawanapaewi, pibisiacuene pexanawanapaewiwecua. Saicayacuenia taenajënua pamonae asiwaya, yaiyataeyanua, exanawanapa tajitsipaecuenia, bajarapacuenia apopexanaewiwecua», jai Jehová paxamë yabara —jai Malaquías Dioso pejumecowënëtsiwijawabelia Judá nacuata pejinawanapaewi.