Xua Jehová exanaejitsia jiwi pijaneconi penaneconitsia-exanaematacabita
4
Icatsia, profeta Malaquías jumaitsi Judá nacuapijiwijawabelia:—Jehová pepopiacuenesaënë pacayapëtaeya-exana pacuenia exanaejitsia jiwi penaneconitsia-exanaematacabita. Jumaitsi: «Imoxoyo rabaja tsaponae pecopiapatsinexa pamatacabi xanë naneconitsiaya tajuitsia-exanaejitsianë pepopitatsajawi-isotocotiata pamonae ayaijamatabëcuene penataewi xanëwecua, pamonaenua pibisiacuene pexanawanapaewi. Bajarapatajuenajetarucaejawata bajarapamonae jëpaena po̱na bepijiayo peweriajawinexatsi, nacopatsinejewa itsacuenejawa xua yabara jiwi cuenenajamatabënapitsijitsiatsi. 2 Itsiata, paxamë asiwaya, yaiyataeya-ata, patanejumecowënëtawanapaewimë, bajarapitsinaneconitsia-exanaecuene apopataemë tsane. Biji rajane, pacuenia matacabipijijuameto pecotiataa daxita napebeta, bajarapacuenia yapëtaeya-exanaenajë jiwijawabelia, paxamë pexaniacuenia panejinawanapaewi taitabarata. Pacuenianua matacabipijijuameto pecotia pejamatabëcuene piawitanewi bajamatejema tsaponae, bajarapacuenia paca-ajamatabëcuenesaëya-exanaenatsi, pexaniacuene patacato-exanabiabiajawata. Nexata, pacuenia becerromonae pecapitsapaecujinaetsi corral-ënëwecua barëyaya jirejirewaruta, bajarapajamatabëcuene-itsimë tsane, patacacapanepaejawa yabara. 3 Nexata, pamatacabijawa xanë naneconitsia-exanaenajë pibisiacuene pexanawanapaewi, paxamë, pataneyaiyataewimë, beweliajamatabëcuenewi pataename bajarapamonae. Nexata pacuenia atsapërë pataxunanonobijitsipame pasiwabëjamënejewa, bajarapacuenia pa-itsimë tsane bajarapamonaejawabelia tabarënawajabitsaëtsijawata. Nexata apopacacuenecaranatsi tsane, patacayawenonaexae», pacajai Jehová pepopiacuenesaënë.
4 »Orijibia, pacajumaitsi bajaraPonë: «Panajamatabënapire paliwaisianë tonajumecopatajë tajajiwitonë Moisés-pijinëjawabelia Horeb-wënëtsutojawata. Daxita patacacujarubiliwaisianë, pataca-itorobiliwaisianë-ata, pacatonajumecopatatsi padaxitamë pa-Israel-nacuapijimë panejumecowënëtawanapaenexa.
5 »Orijibia, icatsia panejumetaema pacuenia pacajumaitsijitsiatsi: ‘Pamatacabi Jehovánë tajamatacabi, jiwi ayaicuenia tananeconitsia-exanaematacabinexa, pecopiapatsiwajënaeya xanë raja pacato-itorobianatsi tajumepaebinë, profeta Elías. 6 Nexata Elías bajarapamatacabita, paxajiwi pexijawabelia penaitoyajawami nasiwajamatabëcuenexanepanaeya-exanaena. Bajarapijinia pacuenia, pexi-ata paxajiwijawabelia. Nexata bajarapacuenia, daxita paxajiwi, pexi yajawa najuanajamatabëcuenepënëyorotsiana xanëjawaberena, tajitsipaecuenia pejinawanapaenexa. Bajarapacuenia itsa apo-exanae tsipae tapatsimatacabiwajënaeya, belia tapatsijawata werebiabijitsipajë daxita panijanacuapijiwi, panejinawanapaenacuanë yajawa, pacajaitsi’», jai raja Jehová —jai Malaquías Judá nacuapijiwijawabelia.