Samuel tsimata-epana David aceiterata
16
Nexata Jehová jumaitsi Samuel-jawabelia:—¿Abaxë maje apocopatsimë newënajamatabëxainaejawa Saúl yabara? Xanë picani wecua-ajibia-exanajë pepopeyanacua-ewetsinëcuene Israel-pijinë pemomoxi. Itsiata, tsitecaeya siwajamatabëcuenebëjamë bajaraponë. Xanë baja apojitsipaenë bajaraponë pepopeyanacua-ewetsinëcuenia peponaponaejawa Israel-pijinë pemomoxituatuajëta. ¡Naxatsia! ¡Pire nijanetsimata-epacabiabi-aceitebëyo, newënëtsinexa, neponaenexa Isaí pijaboyabelia, Belén tomarata peponaponaenë, tsipaji raja xanë nato-itapetajë bajaraponë pexënatoyajuwënënë, Israel-pijinë pemomoxi pepopeyanacua-ewetsinënexa itsamatacabi! —jai Jehová.
2 Nexata Samuel yanijoba:
—¿Depacuenia xanë exanaejitsipajë taponaenexa, Saúl peyapëtaeyaniwa xua yabara ponajë? Itsa Saúl yapëtaejitsipa bajaraxua, nexata bajaraponë nebeyaxuabijitsipa —jai Samuel.
Nexata itsiata, Jehová jumecanawiatatsi:
—¡Caponare pejanavaca pesorowatoyo! Nexata, jumaitsimë tsane: «Xanë raja ponajë bajarapamonae tayapijiwitajuitsinexa Jehovájawabelia», jamë tsane. 3 Itsa baja xamë patsianame bajarajota, nexata junatsianame Isaí pexi pebijiwi yajawa pecayanabinexa netajuitsijawata bajarapavaca. Nexata, bajarajota xanë cajumaitsi tsanetsi xua be-exaname. Bajarajota nexata, ponë catsitajëtsianatsi tsimata-epanaename aceiterata, nejamatabëcuene-itajëtsinexa ta-itapetsijawa pejanapepopeyanacua-ewetsinënexa Israel-pijinë pemomoxituatuajëta —jai Jehová.
4 Nexata, Samuel exana pacuenia Jehová itorobatsi. Bajaraponë itsa patajopa Belén tomarayota, bajarapaepatota ancianowi, bajarapanacuata pewetsiwi, pitsapeca junawiaya pecopiapitsinexatsi. Nexata, bajarapamonae yanijobatsi:
—¿Xamë pexaniacuene yabara patajopame? —jai bajarapamonae.
5 Nexata Samuel jumecanawiata:
—Jãjã. Xanë patajopajë majotaje tatajuitsinexa dajubi Jehovájawabelia —jai.
—¡Panawaema, panenacuenexaniawaetsinexaa pacuenia Jehová nacatonajumecopata waja-exanaenexa wajawajëcaewajënaeya bajaraPonëjawabelia! Bajarapacuenia pane-exanaecujinae, paneyanabianame tatajuitsijawata dajubi Jehovájawabelia —jai Samuel.
Bajaraxuacujinae, Samuel itorobanua Isaí, pexi yajawa, penacuenexaniawaetsinexa Jehová pitabarata. Bajaraxuacujinae, bajarapamonae-ata junata peyanabinexatsi dajubi petajuitsijawata Jehovájawabelia. 6 Itsa jane baja bajarapamonae patanajetarubena itsabelia junatatsi, nexata Samuel itsa tane Isaí pexënato pepomatapijinë Eliab, bajaraponë jamatabëcuenejumaitsi: «Matsaena ponëje Jehová pitapetsinëtsi pepopeyanacua-ewetsinënexa», jamatabëcuenejai.
7 Itsiata baitsi jane, Jehová jumaitsitsi mapacueniaje:
—¡Pëtsa itaxutuajiname bajaraponë bepecuenexanepanaenë yabara, piapianëcuene yabara-ata! Xanë raja cuene-atsobajë bajaraponë. Jiwi ba-itapeta petsitaxanepanaexaetsi naniapijicuene. Xanë juya ba-itapetajë jiwitonë, pejamatabëcueneliwaisi tayapëtaecujinae —jai Jehová.
8 Nexata xuacujinae, Isaí junata pexënato Abinadab, petsitajëtsinexa Samuel-jawabelia. Itsiata, Samuel jumaitsi:
—Bajaraponë-ata Jehová apo-itapetsitsi pijajiwitonënexa —jai icatsia.
9 Xuacujinae, icatsia Isaí capata Sama Samuel-jawabelia. Icatsia, Samuel jumaitsi:
—Bajaraponë-ata apo-itapetsi Jehová pijajiwitonënexa —jai.
10 Nexata bajarapacuenia Isaí tsitajëtapona siete ponëbeje pexi pebijiwi Samuel-jawabelia peyapëtaenexa ponë Jehová itapeta pepopeyanacua-ewetsinënexa israelitawi. Itsiata baitsi jane, Samuel daxita bajarapamonae yabara jumaitsi:
—Jehová apo-itapetsi caenë-ata bajarapamonaeyajuwënënë —jai. 11 Nexata xuacujinae baja, itsa bajaraxua wereta, nexata Samuel yanijoba:
—¿Baja tsaja pematatsënëa apoxainaemë itsanë nexënato? —jai Samuel.
Nexata, Isaí jumecanawiata:
—Jãjã. Sajina raja pepojuyapijinëyo, pewëjëato. Ponëyo ewetaponapona taja-ovejabitsaëto —jai.
Nexata Samuel jumaitsi:
—¡Itorobare itsajiwiyo pesiwaponaenexa, tsipaji itsa abaxë ajibi tsane bajaraponëyo, acuenebi wajataxuxuabinexa, pacuenia Jehová nacatonajumecopata waja-exanaenexa! —jai.
12 Nexata Isaí jejai. Itoroba pejunatsia-exanaenexa. Xuacujinae, barëpatatsi. Bajarapapewëjëato pitabarawitsobianë, pexania-itaxutonë, pexanianënua.
Pacujinae Samuel tane bajaraponë, bajarapaepatota Jehová jumaitsi Samuel-jawabelia:
—Mara ponëje itapetajë. ¡Nexata nonotapunare netsimata-epanaenexa aceiterata, nejamatabëcuene-itajëtsinexa ta-itapetsijawa bajaraponë pepopeyanacua-ewetsinënexa! —jai Jehová.
13 Samuel nexata jane baja pita pija-aceitebëyo. Xuacujinae, tsimata-epana. Bajaraxua exana daxita pematapijiwi pitabarata. Petsimata-epanaenëtsi pewënë David. Bajarapamatacabijawawerenacujinae nexata Jehová Espíritu Santota bajaraponë jamatabëcuenecaëjëpaeya-exanatsi, pepopeyanacua-ewetsinë penaexanaenexa. Nexata daxita bajaraxuanë pexanaecujinae, Samuel baja napëjioba bajarapamonae. Nawiata baja Ramá tomarajawabelia.
David taxuxuaba petonacuenebijawa Saúl
14 Bajarapamatacabijawa Jehová pija-Espíritu Santo Saúl baja wecuaponatsi. Copata baja pejamatabëcuenecaëjëpaeya-exanaejawamitsi peyanacua-ewetsicuenemi. Bajaraxuacujinae juya, dowathiwiyajuwënënë jamatabëcuene-itonotatsi, jamatabëbëjaiya peponaponaenexa, petsi-itorobicueniatsi Jehová. 15 Bajarapacuenia najamatabëxainaeya peponaponaexae, nexata Saúl pijajiwi peyajawanacuenebiwi jumaitsitsi mapacueniaje:
—Xamë tsaena cajamatabë-itonotabiaba dowathiwiyajuwënënë Jehová pejamatabëcuene, najamatabëxainaeya neponaponaenexa. Bajaraxua baja xamë yapëtaneme. 16 ¡Bajaraxuata, ajenaconoxae pane-itorobare patacatonacuenebiwi patacatojaitsinexa ponë pexaniaracatsinë arpa, pecajamatabëcueneyawenonaenënexa! Nexata paepatota dowathinë cajamatabë-itonota, bajaraponë pecatsimuxuracatabiabinexa arpa pexaniacuenia, bajarapacuenia nejumetaejawata nejamatabëcuenexanepanabiabinexareca —jai bajarapamonae.
17 Saúl nexata jumaitsi:
—¡Panetojaire aeconoxae ponë pexaniaracatsinë arpa! Panetocapatsianame maberenaje —jai.
18 Saúl pijajiwiyajuwënënë nexata jumaitsi:
—Xanë taniji Isaí pexënatoyajuwënënë peracatsijawa, Belén-jawata peponaponaenë. Bajaraponë pexaniaracatsinë cajena. Bajaraponë pexanianë, pecuene-aitatsacanë, penawajabitsaëtsicuene pexainaenë, xaniawaetsia jiwi pebarëcuaicuaijainë-ata, Jehová peyawenonaenëxaetsi —jai.
19 Nexata, Saúl tonajume-itoroba pijumeliwaisicaponaewitatsi Isaíjawabelia mapacueniaje: «¡Neto-itorobare nexënato David, ponë pewetsinë oveja!», pejaicuenia. 20 Nexata bajarapacuenia Isaí itsa jumetane, itoroba pexënato David Saúl-jawabelia. Nexata bajaraponë yajawa-itoroba pexënato Saúl-jawabelia pan ayaijawa, bajarapacuenia vinora pewënëtsidoro yajawa, bajarapacuenia chivo pejananë-ata. Bajaraxuanë David capona burroyota Saúl-nexa. 21 Nexata David itsa patajopa, tsitanaitajëtajopa Saúl-jawata. Nexata bajaraponë nacopata petonacuenebaponaponaenënexa. Belia Saúl bitso asiwa ayaicuenia bajaraponë. Nexata tocopata petocaponabiabinënexatsi penayajiwicaranatsipana pijawajabitsaëwecua, escudowënëjawa.b 22 Bajaraxuacujinae, Saúl icatsia tonajume-itoroba Isaíjawabelia pejumaitsicuenia: «David orijibia abaxë netocopatsianame tayajawaponaponaenexa, tsipaji bajaraponë bitso netsita yacueniaxanepanaponapona taneyawenonaejawalia», pejaicuenia. 23 Itsa nexata pamatacabi dowathinë bitso jamatabë-itonotabiabatsi Saúl, bajarapacuenia Jehová petocopatsixaetsi, nexata David bajarapaepatota arpa tsimuxuracatabiaba. Nexata, bajarapacuenia Saúl jamatabëcuenewainae-ecabiaba pejumetaejawata. Bajarapacuenianua bewelia tsabiabi. Bajarapadowathinë-ata wecuaponabiabatsi.
Saúl petëpaejawa yabara peliwaisi
(2Sa 1:1-4; 1Cró. 10:1-12)
1 Itsamatacabi filisteomonae nacaetuata daxita wajabitsaëwi pijataxunaebojawata, Afec-jawata. Bajarapacuenia pijinia Israel-pijinë pemomoxi pijajiwi wajabitsaë jinawanapa pijataxunaebo petusatojawata, Jezreel mene imoxoyojawata. 2-11 […]
C17—C28 […]