Saúl cuene-amoneyaba amonitawi
11
Nahas, amonitawi pepopeyanacua-ewetsinë, barëpona pijajiwi wajabitsaëwi yajawa Jabes tomarajawabelia, Galaad nacuata pe-ecaetomara. Bajarapatomara matatoyorotsia yacapata, pebarënawajabitsaëtsinexa Jabes tomarapijiwi. Bajarapacuenia petaejawata, Jabes tomarapijiwi jumaitsi Nahas-jawabelia mapacueniaje:—Namata-enetsia saya najumeliwaisicajonenatsi, wajanabarënawajabitsaëtsiyaniwa. Nexata saya paxanë pacatonacuenebabiabianatsi patanetojitsipaecueniamë —jai bajarapamonae.
2 Nexata Nahas, amonitawi pewetsinë, jumecanawiata mapacueniaje:
—Je xanepana. Xanë itsiata pacanajumeliwaisicajonenatsi mapaliwaisijawaliaje, matapania xanë copiaya itsa paca-itaxutocajucaenatsi padaxitamë panecujuanenia. Nexata, bajarapacuenia exanaenajë itsanacuanëpijiwi pewënëcapo̱naenexatsi, daxita israelitawi pecuene-aebicueniatsi paxamë panejamatabëcuene —jai bajaraponë.
3 Nexata bajarajota, Jabes tomarapijiwi pewetsiwi, ancianowi, jumecanawiata mapacueniaje:
—¡Panetocopare abaxë siete pamatacabibeje pata-itorobinexa pataneliwaisiwajunupaebiwi daxita Israel nacuapijiwijawa! Itsa apopatsi tsane patanejamatabëcueneyawenonaewinexa bajarapamonae, nexata paxanë panacaewetsianajë paxamëjawabelia pataneto-exanaenexamë patanejumaitsicueniamë —jai bajarapamonae. Jejai Nahas.
4 Itsa bajarapaliwaisi pecaponaewi pata Gabaa tomarajawata, itsajota ponapona Saúl, nexata bajarapamonae jumewajunupaeba Gabaa tomarapijiwijawabelia pacuenia Jabes tomarapijiwi jumaitsi. Nexata, daxita bajarapamonae najamatabëxaina bitso, petsi-atanexaetsi bajarapaliwaisi bëpënëajawawetsinacujinae. Nexata ayaijumeta aëaëjai. 5 Saúl bajarapaepatota penacuenebinë ajibi tsarucae pabiabelia. Nexata, penawiatanajetarucaenë pabiwerena, pijabueyubeje yajawa, jumetane jiwi pe-aëaëjaicuene. Nexata, bajaraponë yanijoba:
—¿De-itsi mapamonaeje? ¿Detsa xua yabara bitso nua bajarapamonae? —jai bajaraponë.
Nexata itsamonae tsipaebatsi paliwaisi capata Jabes tomarapijiwi. 6 Bajarapacuenia Saúl itsa jumetane, nexata bajarapaepatota Dioso Espíritu Santota runaica bajaraponëjawabetsica. Pesaëta jamatabëcuene-itorobatsi bitso pesiwajamatabëcuene-anaepanaenexa Nahas-jawabelia, bajarapacuenia pejamatabëcueneyawenonaenexa Jabes tomarapijiwi. 7 Nexata, bajarapaepatota Saúl beyaxuaba anijanëbeje bueyubeje. Titibababeje daxitanëbeje. Bajaraxuacujinae, itsamonae ca-itoroba bajarapatitibabejawanë daxita Israel-pijinë pemomoxi pejinawanapaenacuajawa. Nexata bajarapamonae, liwaisi pecaponaewi, jumaitsi tsanajetarubenae: «Pacuenia exana mapabueyubejejawabeliaje, nexata bajarapacuenia exanaena pijabueyumonaejawabelia pajiwi aponajamatabëcueneyanabi tsane Saúl, Samuel-beje penawajabitsaëtsijawata», jai tsanajetarubenae daxita Israel-pijinë pemomoxi pejinawanapaenacuanëjawa.
Nexata, bajarapacuenia itsa paebanajetarubena, bitso daxita pejumetaewi jamatabëcuenenabenajacaeya yaiyatane Jehová. Nexata, bajarapamonae caejamatabëcuene pexainaexae, nacaetuata pebarënawajabitsaëtsinexa. 8 Daxita bajarapamonae Saúl nacaetuatsia-exana Bezec tomarata. Penacaetuatsicujinae, Saúl namata-ëjëta trescientos mil ponëbeje israelitawiyajuwënëwi, bajarapijinia pacuenia treinta mil ponëbeje Judá pemomoxibitsaëtoyajuwënëwi. 9 Bajaraxuacujinae, bajaraponë jumaitsi liwaisi pecapatsiwijawabelia:
—¡Pajumaitsimëre Jabes tomarapijiwijawabelia mapacueniaje: «Merawia matonejejawa paxanë papatsianajë patacayapijiwinawajabitsaëtsinexa, patacacapanepaenexa Nahas pijajiwiwajabitsaëwiwecua», pajamëre!—jai Saúl.
Nexata bajarapamonae, liwaisi pecapatsiwi, nawiaba baja Jabes tomarajawabelia. Bajarapacuenia tsipaeba itsa pata Jabes-jawata. Nexata bajarapamonae bajarapacuenia pejumetaejawata, bitso barëya. 10 Nexata jumaitsi Jabes tomarapijiwi Nahas, amonitawi pewetsinëjawabelia:
—Bajarajane. Merawia paxanë pacatopatsianatsi paxamëjawabelia, pacuenia pajitsipame pataneto-exanaenexamë papecatsitaxanepanaecuenia —jai bajarapamonae yamaxë-itojorobiaya.
11 Itsamatacabijawabelia pepobajayacunua, merawita Saúl jane baja barënaxaniawaeta pijajiwi. Tsatanua pijajiwi acueyabi pabitsaëtobejecuenia. Bajaraxuacujinae, caebitsaëto canacujitsia tsimaxëpata amonitawi pijataxunaebonëjawabelia, Jabes tomara matatoyorotsia peyacapatsiwi. Nexata, bajarapamonae jane baja taxuxuaba bajayacunua pebarënabejawa matonejejawabelia. Beyejeba ayaibitsaëtoxanetonë. Itsamonae amonitawi Saúl apobarëbeyaxuabi, tsipaji bajarapamonae nacayajatsiaya rëcëpeca. Nexata, bajarapacuenia nacopatapona caenë pija-epato nayanabinejewa anijajiwibeje. 12 Bajarapacuenia pecuene-amoneyabicujinae amonitawi, itsamonae israelitawi jumaitsi Samuel-jawabelia:
—¿Detsa jota ena pamonae cuene-aeba Saúl pepopeyanacua-ewetsinëcuene? ¡Nexata, ajenaconoxae panetsitajëre bajarapamonae, patabeyaxuabinexa paxanë! —jai.
13 Itsiata baitsi jane, Saúl jumaitsi:
—¡Jume! Ajena pamatacabi, itsajiwi-ata apobenayawajunubeyaxuabitsi, tsipaji Jehová nacacapanepa Israel-pijinë pemomoxitsi wajawajabitsaëwiwecua —jai.
14 Samuel nexata bajarapaepatota, jumaitsi daxita Israel-pijinë pemomoxijawabelia:
—Ponaenatsi baja Gilgal tomarajawabelia. Bajarajotalia tocopatsianatsi jane baja Saúl petaxuxuabinexa pepopeyanacua-ewetsinëcuene daxita Israel-pijinë pemomoxi —jai Samuel.
15 Nexata jane baja, daxita bajarapamonae pona Gilgal tomarajawabelia penacaetuatsinexa. Bajarajota, Jehová pitabarata, bajarapamonae wënë-itajëta jane baja Saúl pepopeyanacua-ewetsinëtsicuene. Nexata, Saúl nacopata pepopeyanacua-ewetsinënexa Israel-pijinë pemomoxi. Bajaraxuacujinae, tajuita dajubi altar-jumata Jehovájawabelia, bajarapamonae penajamatabëcuene-itajëtsinexa caejamatabëcuene penajuaxainaejawa namata-enetsia bajaraPonëjawabelia, pesiwajamatabëcuenecaewixaetsi pijaneconimiwecua. Nexata Saúl, daxita israelitawi yajawa bajarajota bitso najuabarëya.
C12 […]