Samuel aceiterata tsimata-epana Saúl-jawabelia
10
Nexata Samuel pita pija-aceitebëyo,a itapetsiaya petsimata-epanaenexa Saúl-jawabelia. Nexata petsimata-epanaejawata, bajaraponë itabaratsutsune. Jumaitsi:—Ajena tacatsimata-epanaejawata Jehová najamatabëcuene-itajëta peca-itapetsijawa pijajiwi peponeyanacua-ewetsinënexa, daxita Israel-pijinë pemomoxi. Nexata, neyanacua-ewetsinë tsane. Bajarapamonae capanepaenamenua pijawajabitsaëwecua, pamonae pepënëya matatoyorotsia pejinawanapaewi. Marapacuenia xamë yapëtaename pepacuene Jehová peca-itapetsijawa pijajiwi newetsinënexa. 2 Ajena tanewecuaponaecujinaemë, camata-enenaena anijanëbeje pecayapëtaenëbeje, Raquel-pijiwami pemëthë imoxoyojawata, Selsa tomara imoxoyojawata pebocaemëthë, Benjamín-pijinë pemomoxi pejinawanapaenacuata pe-ecaetomarayo. Bajaraponëbeje cajumaitsi tsane: «Axa pijaburromonae pesorowabi xamë, nijajiwitonëbeje panejaitsiwibeje, panecowëtabeje caxitajaraba baja. Nexata, axa copata baja pesiwajamatabëcuenebëjaijawa pijadajubi yabara. Ajena juya xamë yabara casiwajamatabëcuenebëjai. Bajaraxuata, jumaitsi: ‘¿Dexua exanaenajë taxënato yabara?’ cayabarajai axa», cajai tsane bajaraponëbeje. 3 Orijibia, webeliayo neponaecujinae, itsa patsianame encinanaejawa Tabor canacujitsita, icatsia camata-enenaena itsamonae acueyabi ponëbeje, Betel tomarajawabelia peponaewi, bajarajota asiwaya yaiyataeya peto-exanaenexa Dioso pejitsipaecuenia. Caenë canajetarucaena acueyabi ponëbeje chivo, itsanë pijinia acueyabi papan-bëbeje, itsanë vinora pewënëtsidoro.b 4 Pecabajacobicujinae, bajarapamonae carajutsiana anijapan-bëbeje. Bajarapapan-bëbeje xamë bajarapamonae wecobepitsianame. 5 Bajaraxuacujinae, patsianame Gabaa tomarajawata,c patomara eca Gabaatsuto imoxoyojawata, patsutojawata filisteomonae xaina pijajiwi wajabitsaëwi pejinawanapaebo, patsutota pijinia jiwi nawajëcabiaba Diosojawabelia. Bajarajota, itsa baja patanajetarucaename, nexata bajarapatomara nejonejawata, caxitajarabianame itsamonae Diosojumepaebiwi perunaewitsica petsutowetsica, itsajotatsia nuca Dioso pija-altar-jawa. Bajarapamonae xua taenajetarubena Dioso petsitajëtsiliwaisianëtsi, wajunupaebanajetarubenaena caecuenia. Bajarapamonae pewajënaeya najetarubenaena itsabitsaëto pijinia pecanaxëanaewi pijajawanë, salteriod peracatsiwi, pandereta pecobeta peracatsiwi, flauta pe-obiwi, arpa peracatsiwi-ata. 6 Nexata, bajarapamonae nemata-enenaejawata, Dioso Espíritu Santota runaenica xamëjawabetsica pecajamatabëcuenematacaponaenexa pejitsipaecuenia. Nexata, pacuenia bajarapajumepaebiwi wajunupaebanajetarubena Dioso petsitajëtsiliwaisianëtsi, bajarapacuenia xamë-ata bajarapamonaetuatuajëta napaebanajetarucaename. Nexata, xamë bajarapaepatota itsajamatabëcueneliwaisi nexainaenë tsane. 7 Nexata, pacujinae catocopiapatsiana bajarapacuenia, bajaraxuacujinae exanaename pacuenia catsicaruca nexanaenexa, tsipaji baja Dioso pesaë cayajawa tsane. 8 Bajaraxuacujinae, xamë ponaename Gilgal tomarajawabereca itsajota nacaxitajarabianatsibeje, wajanajuatajuitsinexabeje dajubi daxitanë wajaneconibeje yabara, itsadajubimonae pijinia totajuitsianatsibeje caejamatabëcuene wajanajuaxainaexae namata-enetsia Diosojawabelia, wajanacasiwajamatabëcuenecaewixae wajaneconimiwecua. Bajarajota, ne-ewetsianame siete pamatacabibeje tapatsijawabelia. Bajaraxuacujinae, cayapëtaeya-exanaenatsi pacuenia exanaejitsiamë —jai Samuel Saúl-jawabelia. Bajaraponë jejai.
9 Bajarapacuenia pejumaitsicujinaetsi, ajena wecuanapënëyorota Samuel pewecuaponaenexa, bajarajota Diosorajutatsi itsajamatabëcueneliwaisi pexainaenexa. Nexata, daxita pacuenia Samuel tsipaebatsi, bajarapacuenia tocopiapatatsi bajarapamatacabi. 10 Itsa Saúl, pijajiwitonëbeje patanajetarucabeje Gabaa tomarata, bajarajane mata-enenatsibeje itsamonae Diosojumepaebiwi. Bajarapamonae xua taenajetarubena Dioso petsitajëtsiliwaisianëtsi, wajunupaebanajetarubena caecuenia. Nexata bajarajota Dioso Espíritu Santota runaica bajaraponëjawabetsica, pesaëta pejamatabëcuenematacaponaenexatsi pejitsipaecuenia. Nexata Saúl-bana najuawajunupaebanajetarubena bajarapamonae Dioso petsitajëtsiliwaisianëtsi. 11 Bajarapacuenia Saúl pexanaejawata, daxita peyapëtaewitsi nayanijoba bajaraponë yabara mapacueniaje:
—¿Detsa xua meta tocopiapatatsi Saúl, Cis pexënato? ¿Bajaraponë-ata tsaja nanaexana Dioso pejumepaebinë? —jai tsaponae Saúl yabara.
12 Nexata bajarapanacuapijinë jumecanawiata mapacueniaje:
—¿Detsa ponë jiwi pejamatabëcuenecaëjëpaeya-exanaenë Diosojumepaebiwi penaexanaenexa? ¿Paxa tsaja? ¡Jume, Dioso cajena! —jai. Bajaraxuata, belia jiwi capitsapa mapaliwaisiyoje: «¿Saúl-ata tsaja cajena Diosojumepaebinë?»,e pejaijumeyo pejamatabëcuenenabenajacaejawata pejaitsabiabinexa itsajiwiyo pecuenecaëjëpaecuenetsi yabara.
13 Saúl pecopatsicujinae pewajunupaebanajetarucaejawa Dioso petsitajëtsiliwaisitsi, bajaraponë pona petsutojumabetsia, patsutojumawetsica runaica picani Diosojumepaebiwi. 14 Nexata Saúl paxuanë jumaitsitsi, pijajiwitonëjawabelia-ata:
—¿Detsa belia paponaponamebeje? —jai.
Saúl jumecanawiata:
—Paponajëbeje picani patajaitsinexabeje taxa pijaburro pesorowabi. Apopacaxitajarabinëbeje itsiata. Nexata bajaraxuata, paponajëbeje Samuel-jawabelia patayanijobinexabeje —jai.
15 Nexata paxuanë jumaitsi:
—Pexaniacuenia cawajëtatsi tanetsipaebinexamë. ¿Decajumaitsi nexata Samuel? —jai.
16 Saúl jumecanawiata paxuanë:
—Paneyapëtaeya-exanabeje pacuenia taxa pijaburromonae caxitajaraba baja —jai. Itsiata, apotsipaebi paxuanëjawabelia pacuenia Samuel tsimata-epanatsi aceiterata, pejamatabëcuene-itajëtsinexatsi Jehová pitapetsijawatsi pepopeyanacua-ewetsinënexa Israel-pijinë pemomoxi.
Samuel yapëtaeya-exana Israel-pijinë pemomoxi Saúl pepopeyanacua-ewetsinënexa
17 Bajaraxuacujinae, Samuel junata daxita israelitawi penacaetuatsinexa Mizpa tomarajawata, bajarajota penajua-exanaenexa Jehová pejitsipaecuenia, pebarënajamatabëcuene-itajëtsinexa bajaraPonëjawabelia asiwaya peyaiyataejawa. 18 Bajarajota, penacaetuatsijawata, Samuel jumaitsi bajarapamonaejawabelia:
—Jehová, israelitawitsi wajaDioso, nacajumaitsi: «Xanë raja jutajë panijasalinaiwimi Egipto nacuajawawerena. Capanepajë bajarapamonaemi Egipto nacuapijiwi penamatacaitorobisaëtsiwecua, bajarapamonae pitorobabiabijawamitsiwecua. Bajarapacuenia capanepajënua itsamonae peyanacua-ewetsiwitsi pebejiobia-exanaejawamitsiwecua», nacajai wajaDioso. 19 Itsiata baitsi jane, ajenaconoxae paxamë panijaDioso beweliacuenia panaëcotame, Ponë pacacapanepa picani daxita panejamatabëcuenebëjaijawamiwecua, papecabejiobia-exanaejawamiwecuanua. Ajenaconoxae bewelia bajaraPonë panaëcotame, tsipaji patanewajëcaejawatamë panejumaitsimë: «¡Jume, paneto-itapere pepopataneyanacua-ewetsinënexa!», panejamë tsaponae. Bajaraxuata, ajenaconoxae pacajunatatsi panepatsinexa majotaje Jehová pitabarata padaxitamë pacaepemomoxibitsaëtomë canacujitsia, bajarapijinia pacuenia pacaewiriamaëtowimë canacujitsia —jai Samuel.
20 Nexata, petoxaniajainexatsi pitapetsijawa bajarapamonae pepopeyanacua-ewetsinënexatsi, Samuel itoroba caenë pemomoxibitsaëto canacujitsia pimoxoyotsinexatsi. Nexata pijacuenecuenia bajarapamonae exana, peyapëtaenexa ponë pemomoxibitsaëtojawata pitsapaejitsia pepopeyanacua-ewetsinënexatsi. Bajarapaepatota, Benjamín-pijinë pemomoxibitsaëto tsijumajopatsi. 21 Bajaraxuacujinae, icatsia bajaraponë itoroba pimoxoyotsinexatsi daxita Benjamín pemomoxibitsaëto pijaclan canacujitsia. Bajarajota nexata, Matri pijaclan-jawata bajarapacuene icatsia tsijopatsi. Bajaraxuacujinae, Matri pijaclan-jawata tsijumajopatsi Saúl, Cis pexënato. Bajarapamonaetuatuajëta aponanucae bajaraponë. Nexata jaitaruta. Itsiata, apocaxitajarabi. 22 Nexata, peyapëtaenexa itsa bajaraponë napatajopa Mizpajawata, bajarapamonae yanijoba Jehovájawabelia. Nexata, Jehová yapëtaeya-exana: «Bajaraponë raja napatajopa picani. Saya namatayaba itsajota pepatsiwi xaniawaetejeba pecobecowëjawanë», jai. 23 Nexata bajarapamonae bepijiayo pitsapeca, pejaitsinexa penamatayabijawata. Paepatota baja, caxitajarabatsi Saúl, nexata daxitajiwi pitabarata nutatsi. Nexata penucaejawata, bajarapamonae tane matatoxenetsia piapianëcuene daxitajiwiwecua. Itsajiwi-ata apobarënamatajëpae. Daxita saya pecofiajawalia torubena pewecua-apiajawatsi bajaraponë. 24 Samuel jumaitsi daxita bajarapamonaejawabelia:
—¡Pataema, ponë Jehová pitapetsinë pepopapecayanacua-ewetsinënexa! Majotaje ajibi itsanë israelitanë bajaraponë pecuenejëpaenëtsi —jai Samuel. Bajarapamonae nexata bajarapaepatota barëyaya ayaijumeta jumaitsi:
—¡Pepowajanacayanacua-ewetsinë baja xainatsi! Dioso nacato-ewetsi bajaraponë, bajayajebi wajanaca-ewetsinënexa —jai.
25 Bajaraxuacujinae, icatsia Samuel yapëtaeya-exana bajarapamonaejawabelia daxitaxuanë pepopeyanacua-ewetsinë be-exana, xuanë benacueneba, pacuenia-ata beponapona. Yapëtaeya-exananua daxitaxuanë jiwi beto-exana pepopeyanacua-ewetsinëtsijawabelia. Nexata daxita bajarapaliwaisianë yaquinaruba pebaxutota. Bajaraxuacujinae, buata bajarapabaxuto Jehová pijacarpabojawata. Bajaraxuacujinae, Samuel itoroba daxita bajarapamonae penawiabinexa baja pijanacuanëjawa. 26 Bajarapacuenia Saúl-ata nawiata baja pijabojawabelia, Gabaa tomarajawabelia. Bajaraponë barëpona itsamonae pijajiwi wajabitsaëwi penaexanaenexa. Pamonae piaitatsacawi Dioso jitsipaeya-exana penaexanaenexa wajabitsaëwi, bajarapamonae barëpona Saúl. 27 Itsiata, bajarapacujinae itsamonae apojamatabëcuenejëpae Saúl pepopeyanacua-ewetsinënexatsi. Bajaraponë yabara jumaitsi: «¿Yee, matsaponë waxaitsi wajawajabitsaëwecua wajanacacapanepaenënexaje?», jai bajarapamonae bijiaya penaëcotsixae bajaraponë, beweliajamatabëcuenenëcuene petaexae. Nexata, aporajutsitsi pexaniacuenejawanë, pacuenia jiwi ba-exana penajamatabëcuene-itajëtsinexa peyaiyataejawa pejananacua-ewetsinë. Bajarapitsipibisiacuene exanae-ata, Saúl itsiata apobijatae bajarapamonae. Moya saya tane.