24
Balaam baja, peyapëtaexae Jehová pesiwanajamatabëcueneweretsijawa ëpexaniacuene peto-exanabiabinexa Israel-pijinë pemomoxi, nexata apo-exanae pe-ëjëbicuenia Jehová petsitanaitajëtsinexatsi, pacuenia exana copiayami anijatobeje. Saya petsutojumawetsica taenuca petusatonacuajawabelia. 2 Nexata, itsa naëcolia, tane israelitawi penatsanaecuenia pejinawanapaejawa pijataxunaebonëta, caenë pemomoxibitsaëto canacujitsia. Bajarajota, Balaam jamatabëcuenecaëjëpaeya-exanatsi Dioso pija-Éspiritu Santo, pejumaitsinexa Jehová pejitsipaecuenia. 3 Nexata, peyapëtaeya-exanaecueniatsi Balaam jumaitsi:«Mapacueniaje pacatsipaebatsi xanë, Balaam, pexënatonë Beor, ponënë tatsiwajënaetaenë xaniawaetsia, tamatabacabëta tanucaenë-ata Dioso pitabarata.
4 »Pacatsipaebatsi paliwaisi Dioso, ponë ayaijamatabëcuenenë daxitawecua, neyapëtaeya-exana. Dioso jumaitsi israelitawi yabara mapacueniaje: 5 Jacob-pijinë papemomoximë, bitso pexaniacarpaboxi paxainame. Paxamë pa-israelitawimë bitso peyaxaniawaetsitaxunaebo paxainame.
6 »Panijataxunaebojawata, panijacarpabonë nacorobotsiaya paxainame, pacuenia itsi pe-ubijawanë mene-itapajawata penacuenebipabi. Pacuenia aloébotonë, betsananabotonë, naxaniabiaba Jehová pejamatabëcueneta, pacuenianua cedro naejawanë pexaniacuenia naxaniabiaba, penubenaexae mera imoxoyojawata, bajarapacuenia Israel-pijinë pemomoxi ayaibitsaëto tsaponae Jehová pejamatabëcuene.
7 »Pacuenia jiwitonë merata petsimata-epacaecujinae pe-ubijawa petsewi-irata naxaniaba, bajarapacuenia Israel-pijinë pemomoxi ayaibitsaëto tsane, Dioso pexaniacuenia peyawenonabiabixaetsi. Bajarapamonae pepopeyanacua-ewetsinëtsi bitso ayaijamatabëcuenenë tsane Agag-wecua. Bajarapacuenia pijanacua-ata jiwi bitso peyaiyataenacua tsane.
8 »Bajarapamonae Dioso jutatsi Egipto nacuajawawerena, Ponë piacuenesaënë bitso, pacuenia vaca pebito pianaepanaenë. Pacuenia vaca pebito pecueyanë nawecuatorotabiaba pemata-etota, bajarapacuenia Israel-pijinë pemomoxi Dioso wecuatorotsianatsi pijawajabitsaë.
Pacuenia unupijinë pianaepanaenë pebeyaxuabinë basitsicabaxane, bajarapacuenia Israel-pijinë pemomoxi werebiaba pijawajabitsaë Dioso pejamatabëcueneta. Pebarënawajabitsaëtsijawatanua yenejorobajarababiabiananua pijacuererebonëta.
9 »Pacuenia newëthë pebeyaxuabicujinae pexaenënexa wemaxënacuera-ewetanuca, bajarapacuenia Israel-pijinë pemomoxi pewerebiabicujinae pijawajabitsaë wemaxënacuera-ewetsiana.
Pacuenia jiwitonë junawitsipa peya-itawabinexa newëthë pemajitanucanë, bajarapacuenia itsanacuapijiwi junawiana pejamatabë-itonotsijawa Israel-pijinë pemomoxi, penacuera-ewetsimatacabianë pewerebiabicujinae pijawajabitsaë.
Pamonae pexaniacuene tojitsipabiaba Israel-pijinë pemomoxi petaewanapaenexa, bajarapamonae juya tojitsipajë Dioso pexaniacuenia peyawenonabiabijawatsi. Pamonae pijinia pibisiacuene tojitsipa Israel-pijinë pemomoxi petocopiapatsinexatsi, bajarapamonae tojitsipajë juya Dioso petocopiapatsia-exanaenexatsi pibisiacuene»,a jai Balaam, pexaniacuene pecuenewajunupaebijawata Israel-pijinë pemomoxijawabelia.
Pecopiarutsijawa Balaam cuenewajunupaeba, Dioso peyawenonaejawanexa Israel-pijinë pemomoxi
10 Nexata, Balac anaepana bitso Balaam-jawabelia, bajarapacuenia pejumetaejawata. Pianaepanaexae, nacobepacababeya jumaitsi:
—Xanë picani cajunatatsi pibisiacuenia tanewecuacuenewajunupaebinexamë tajawajabitsaëwi. Itsiata baitsi jane, xamë acueyabi xuabeje bitso pexaniacuenia cuenewajunupaebame bajarapamonae. 11 Aeconoxae baja, caecuenia ponare nijanacuayabelia. Xanë picani camatamotsiapaebatsi pexaniamatamo itsa newecuacuenewajunupaebijitsipame pibisiacuenia. Itsiata baitsi jane, Jehová bajarapajamatabëcuene cawecuanaxuabia-exana, tacato-exanaejawaminexa —jai Balac.
12 Balaam nexata jumaitsi Balac-jawabelia:
—¿Aponajamatabënapitsimë meta pacuenia jumaitsinë tanesiwaponaewijawabelia? Xanë baja cajena picani yapëtaeya-exanajë bajarapamonae mapacueniaje: 13 «Balac nerajutsi-ata tsipae palatananijawanë, oronanijawanënua pewënëtsibo, xanë itsiata aponecuenecaëjëpae Jehová tanejumaitsijawawecua, saicayacuenia tajumaitsinexa pexaniacuene, pibisiacuene-ata. Pacuenia Jehová nejumaitsi, bajara-ëpacuenia xanë tajumaitsinexa tacuenewajunupaebijawata», janë baja cajena tanesiwaponaewijawabelia. 14 Xanë nexata baja ponaenajë ajenaconoxae tajanacuayabelia. Itsiata, taponaewajënaeya cayapëtaeya-exanaenatsi xua bajarapamonae exanaejitsia itsamatacabijawabelia panijanacuapijiwijawabelia, Moab nacua —jai Balaam.
15 Nexata, cuenewajunupaebiaya Balaam jumaitsi:
«Mapacuenia pacatsipaebatsije. xanë, Balaam, Beor pexënatonë, tatsiwajënaetaenë xaniawaetsia. 16 Tamatabacabëta tanucaejawata, bemajitsinaebocuenia taniji Dioso, ayaijamatabëcuenenë daxitawecua. Nexata, xanë xua pacatsipaebatsi, Jehová tanejumaitsijawanë, Dioso, ayaijamatabëcuenenë daxitawecua, taneyapëtaeya-exanaejawa-ata.
17 »Xua tsiwajënaetaniji pecopiapatsijawanexa, apo-ajenaconoxaetanexa. Bajaraxuanë ayaibexëa itsamatacabijawabelia copiapatsiana. Taniji Ponë naitajëtsijitsia Jacob-pijinë pemomoxituatuajëta pepopeyanacua-ewetsinënexatsi, penamatacaponaenënexanua pijajiwi pacuenia tulupu matacapona merawi namuto peponaewi. BajaraPonë werebiabiana Moab nacuapijiwi, Set-pijinë pemomoxi-ata, pejinawanapaewi petsewinacuajawa.
18 »BajaraPonë cuene-amoneyabiabiana Edom-pijinëb pemomoxi. Wecuanaxainaeyababiabiananua pijanacua, Seir, Israel-pijinë pemomoxi pijawajabitsaëxae. BajaraPonë pejamatabëcuene, Israel-pijinë pemomoxi juya pijawajabitsaëwecua xainaponaena bitso pinijicuenesaë.
19 »Jacob-pijinë pemomoxijawawerena pitsapaena ponë pecuene-amoneyabiabinënexa daxita Israel-pijinë pemomoxi pijawajabitsaë. Nexata, bajaraponë werebiabanajetarucaenac penacopabiwi bitso penamatamotsitomarata, Edom nacuata», jai Balaam Dioso peyapëtaeya-exanaecuenetsi Balac-jawabelia.
20 Bajarapacuenia pejumaitsicujinae, Balaam icatsia naëcolia Amalec nacuajawabelia. Nexata, cuenewajunupaeba pacuenia amalecitawi pijawajabitsaë cuene-amoneyabijitsiatsi itsamatacabijawabelia. Jumaitsi:
«Amalec nacuapijiwi pecuenenamataxainaewi-atad itsanacuanëpijiwiwecua, itsiata baitsi jane, pecopiarucaejawatalia bajarapamonae daxitami werebiabianatsi daxitamatacabijawabelianexa», jai Balaam.
21 Xuacujinae, Balaam icatsia naëcolia ceneowi pejinawanapaenacuajawabelia. Jumaitsi Dioso peyapëtaeya-exanaecuenetsi:
«Paxamë, paceneowimë,e panejinawanapaewi-ata panenayajiwinacuenebanutsitomaranëta, bitso piacuenesaëtomaranëta, panenacuenebiwi-ata panijatomaranë ibotsutonëjumata, itsajota ayapëbeje panijawajabitsaë papecatsimaxëpatsinexa, 22 itsiata baitsi jane, Asiria nacuapijiwi panijatomaranëmi pacatotajutsiana isotota, pamatacabita pacacaponaena papecataicaewicuenia pijanacuajawabelia», jai Balaam ceneowi yabara.
23 Bajaraxuacujinae, Balaam icatsia jumaitsi Dioso pexanaejawanexa yabara:
«Ayai baja tsane pamatacabi Dioso exanaena bajarapacuenia, tsipaji apopanepae tsane cajena caejiwi-ata. 24 Bajarapamatacabita, Quitimf nacuajawawerena wajabitsaë najetarubenaena barcoxanetonëta. Nexata, bajarapamonëta peyaponaewi cuene-amoneyabiana Asiria nacuapijiwimi, Heber-pijinë pemomoxi-ata.g Daxita bajarapamonaemi Dioso werebiabianatsi»,h jai.
25 Nexata, Balaam bajarapacuenia pejumaitsicujinae, nonotapuna, peponaenexai pijanacuayabelia. Balac pijinia pona pijanamutuabelia penawecuanatsatsicueniabeje.