Balaam pexaniacuenia cuenewajunupaeba Israel-pijinë pemomoxi
23
Bamot-baal-tsutojumawerena petaenucaejawatabeje israelitawi pijataxunaebojawabereca, Balaam nexata jumaitsi Balac-jawabelia:—Majotaje nacuenebia-exanare siete pa-altar-jawabeje. Bajarapacuenia capatsia-exanare siete ponëbeje becerro, siete ponëbeje oveja pebitonë, wajarajutsinexa Diosojawabelia —jai Balaam.
2 Balac nexata exana pacuenia wajëtatsi pexanaenexa. Nexata, Balac, Balaam-beje, tajuitaponabeje bajarapadajubi altar-jawanëjumata, Dioso pewënëta. Cae-altar-jumata canacujitsia tajuitapona caenë becerro, caenë oveja pebito-ata.
3 Bajaraxuacujinae, Balaam jumaitsi Balac-jawabelia:
—Xamë nacopare majotaje, dajubi netajuitanajetarucae-altar-muxuneneta. Xanë abaxë cawecuaponaenatsi itsajawabelia. Jehová belia netsitanaitajëtsipa, tanetsipaebinexa pacuenia exanaejitsianë. Bajaraxuacujinae, xanë cayapëtaeya-exanaenatsi xua netsitajëta ta-exanaenexa —jai.
Nexata, Balaam pona petsutojumabetsia, caenë penucaenexa. 4 Bajarajota, Dioso tsitanaitajëta Balaam. Nexata, Balaam jumaitsi Diosojawabelia:
—Siete pa-altar-jawabeje nacuenebanutajë newënëta. Cae-altar canacujitsia pejumata catotajuitatsi caenë becerro, caenë oveja-ata —jai bajaraponë.
5 Jehová nexata yapëtaeya-exana bajaraponëjawabelia pajumenë jumaitsijitsia, pecuenewajunupaebijawata Israel-pijinë pemomoxijawabelia. Icatsia xuacujinae, jumaitsitsi:
—Nawiaremeca Balac-jawabereca, netsipaebinexa daxita pacuenia cajumaitsitsi —jai Jehová.
6 Balaam nexata nawiareca Balac-jawabereca. Caxitajarabanuta penucaenë altar-muxuneneta, Moab nacua penajua-ewetsiwi yajawa. 7 Nexata, Balaam taxuxuaba pexaniacuenia pecuenewajunupaebijawa Israel-pijinë pemomoxijawabelia, Balac pitabarata. Naxëanaeya jumaitsi:
«Balac, pepopeyanacua-ewetsinë Moab nacuapijiwi, pijumesaëta necapatsia-exana maberenaje, Aram nacuajawawerena, taponaponaenë pemutowetsina patsutonë nubena.
Nejumaitsi: ‘¡Naxatsia! Paponaremena, pibisiacuene necuenewajunupaebinexa petocopiapatsinexatsi Jacob-pijinë pemomoxi, Dioso tanewecua-ajibia-exanaenexa bajarapamonae’, nejai picani.
8 »Itsiata baitsi jane, ¿Depacuenia xanë cuenewajunupaebijitsipajë pibisiacuenia pamonaejawabelia Dioso apocuenewajunupaebi pibisiacuene petocopiapatsinexatsi? ¿Depacuenia xanë cuenewajunupaebijitsipajë piajibia-exanaenexatsi, pamonaejawabelia Jehová bajarapacuenia apotojitsipaetsi?
9 »Aponecuenecaëjëpae cajena, tsipaji ibotsutonëjumawetsica apotaenë Dioso pebara-anaepanaejawa bajarapamonaejawabelia. Biji rajane, petsutonëjumawetsica cuenetaniji Israel-pijinë pemomoxi, Dioso pitapetsiwitsicuene daxitanacuanëpijiwiwecua. Bajarapamonae Dioso saicayacuenia taena itsanacuanëpijiwiwecua.
10 »Ajibi baja cajena itsajiwi-ata pecuenecaëjëpaewitsi penamata-ëjëtsijawa Jacob-pijinë pemomoxi. Jitsipae-ata penamata-ëjëtsijawa picani, apocuenecaëjëpaetsi tsane caematabëxëyo-ata penamata-ëjëtsijawa. Bitso jitsipajë Dioso pexaniacuenia taneyawenonaejawa, pacuenia bajarapamonae yawenonatsi, jitsipajënua tatëpaejawa Dioso peyawenonaejiwiyotsicuenia», jai Balaam, cuenewajunupaebiaya penaxëanaejawata Israel-pijinë pemomoxi.
11 Balac nexata, bajarapacuenia itsa jumetane pejumaitsijawa, jumaitsi Balaam-jawabelia:
—¿Detsa pitsijawa xamë neto-exaname pija? Xanë raja cajunatatsi picani maberenaje tajawajabitsaëwi tanewecuacuenewajunupaebinexamë pibisiacuenia. Itsiata, xamë caranata aithotiacuenia neto-exaname. Juya pexaniacuenia cuenewajunupaebame —jai Balac anaeya.
12 Nexata, Balaam jumecanawiata:
—Pacatsipaebatsi picani pacuenia xanë saya netsicaruca tajumaitsitsabiabinexa pacuenia Jehová nejumaitsi. ¿Aponajamatabënapitsimë tsaja? —jai.
13 Nexata, Balac jumaitsi:
—Je, xanepana. Pexaniacuene cawajëtatsi, icatsia neponaenexa xanë tapëta itsajawabelia, itsajotalia cacuenecaëjëpaena netaejawa ayaibitsaëtojawa bajarapamonae. Daxitabitsaëto apotae-atamë, itsiata bajarapamonaeyajuwënëwi cacuenecaëjëpa netaejawa. Nexata, bajarawerena netaejawata, cuenewajunupaebianame pibisiacuene petocopiapatsijawanexatsi —jai.
14 Nexata, Balac barëpona Balaam Zofim-iranamatajëpaejawabetsia, Pisgatsutojumata. Bajarawetsica taenucabeje Israel-pijinë pemomoxi pijataxunaebo. Bajarapanamatajëpaetsutojumata, nacuenebanutabeje siete pa-altar-jawabeje. Capatsia-exananua siete ponëbeje becerro, siete ponëbeje oveja pebitonë. Cae-altar canacujitsia tajuitsia-exanapona,a Jehová pewënëta, anijadajubibeje tsaponae.
15 Nexata, Balaam icatsia jumaitsi Balac-jawabelia:
—Bajarajota, xamë nacopare, netajuitanucae-altar-muxuneneta. Abaxë pijinia xanë cae-epatoyo ponaenajë Jehová tanecaxitajarabinexa, taneyapëtaeya-exanaenexa pacuenia jumaitsinëjitsia —jai.
16 Nexata, bajarapaepato Jehová tsitanaitajëta Balaam-jawabelia. Nexata, bajaraPonë rajutatsi pajumenë jumaitsijitsia pecuenewajunupaebijawata Israel-pijinë pemomoxi. Jumaitsi:
—Icatsia nawiaremeca itsajotareca nuca Balac, neyapëtaeya-exanaenexa pacuenia cayapëtaeya-exanatsi baja —jai Jehová Balaam-jawabelia.
17 Balaam nexata nawiataponareca itsajota nucareca Balac altar-muxuneneta, Moab nacua penajua-ewetsiwi yajawa. Balac nexata yanijoba Balaam-jawabelia:
—¿Detsa cajumaitsi Jehová? —jai.
18 Nexata, Balaam towajunupaeba mapacueniaje:
«Nejumetaema Balac. Xaniawaetsia nenamuxuna-ewere, Zipor pexënatomë.
19 »Dioso raja apobejiwitonë, penajumetsënëtsinexa. Dioso epatua apopenaliwaisixanetsinë, penajamatabëcuenepënëyorotsinexa pesiwanajamatabëcueneweretsijawamiwecua. Xua Dioso jumaitsi, bajarapacuenia exanabiaba. Xua Dioso jumaitsi najumecapanepaeya, exanabiaba.
20 »Nejumetaema. Dioso nitoroba pexaniacuenia Israel-pijinë pemomoxi tacuenewajunupaebinexa. Dioso baja tocaëjëta pexaniacuenia peyawenonaenexa bajarapamonae. Nexata, acuenebi xanë tacuene-itothianaejawa pejitsipaecuenewecua.
21 »Jehová apocuenetaetsi paneconi yabara naneconitsia-exanaejitsiatsi Israel-pijinë pemomoxi. Bajaraxuata, apocuenewajunupaebitsi pibisiacuene petocopiapatsinexatsi. Orijibia, Jehová pija Dioso yajawa tsabiabitsi. Bajarapamonae Jehová natotane pepopeyanacua-ewetabiabinëtsi.
22 »Bajarapamonae Dioso jutatsi Egipto nacuajawawerena, Ponë piacuenesaënë bitso. Pacuenia vaca pebito pecueyanë nawecuatorotabiaba pemata-etota, bajarapacuenia Israel-pijinë pemomoxi Dioso wecuatorotabiabianatsi pijawajabitsaë.
23 »Bajaraxuata, Jacob-pijinëb pemomoxijawabelia pibisiacuenia cuenewajunupaebi-atatsi, apotocopiapatsitsi itsacuenejawac bajarapamonaenexa. Bajaraxua yabara, aeconoxae jiwi toxanepanatsi pejumaitsitsabiabinexa Israel-pijinë pemomoxi yabara: ‘Dioso bitso pexaniacuenia pinijicuenejawanë pacato-exanabiaba’ pejaitsabiabinexa.
24 »Pacuenia nëwëthë, pebocaenë, nonotapuna penayaibinëcuenia pecueyanë pitabarata, bajarapacuenia Israel-pijinë pemomoxi cuene-itsi tsane pijawajabitsaë pitabarata. Pacuenia newëthë pebeyaxuabinë xaeyaxuaba daxitanë, janaraebanucanua, bajarapacuenia Israel-pijinë pemomoxi werebiabiana pijawajabitsaë», jai Balaam, Jehová peyapëtaeya-exanaecueniatsi, Balac-jawabelia.
25 Nexata, itsa jumetane bajarapacuenia Balaam pecuenewajunupaebijawa Israel-pijinë pemomoxijawabelia, Balac jamatabëcuenebëjaiya jumaitsi:
—Itsa xamë apocacuenecaëjëpae necuenewajunupaebijawa pibisiacuenia petocopiapatsinexatsi, nexata pëtsa cuenewajunupaebame pexaniacuenia-ata —jai Balac.
26 Bajaraxuacujinae, Balaam jumaitsi Balac-jawabelia:
—Pewajënaeya baja cajena catsipaebatsi bajaraxua yabara. Pacuenia xanë Jehová nejumaitsi, netsicaruca saya tajumaitsinexa tacuenewajunupaebijawata —jai Balaam.
27 Itsiata baitsi jane, icatsia Balac jumaitsi:
—¡Naxatsia! Icatsia cacaponaenatsi itsajawabelia, itsajota belia Dioso apocawecua-asiwa tsipaed necuenewajunupaebijawa pibisiacuene petocopiapatsijawa Israel-pijinë pemomoxijawabelia —jai Balaam-jawabelia.
28 Nexata, Balac capona Balaam Peor-tsutojumabetsia, petaeya-exanaenexa patusatonacuajawabelia Israel-pijinë pemomoxi xaina pijataxunaebonë.
29 Nexata, Balaam jumaitsi Balac-jawabelia:
—Bajarajota, icatsia nacuenebare siete pa-altar-jawabeje. Icatsia yajawacapare siete pabecerrobeje, siete ponëbeje oveja pebitonë-ata —jai Balaam.
30 Balaam pejumaitsicowëya Balac exana. Nexata, icatsia cae-altar canacujitsia pejumata tajuitsia-exana caenë becerro, caenë oveja pebito-ata.