Balac, pepopeyanacua-ewetsinë Moab nacuapijiwi, junata Balaam pibisiacuene pecuenewajunupaebinexatsi Israel-pijinë pemomoxijawabelia
22
Israel-pijinë pemomoxi pecuene-amoneyabicujinae Basán nacuapijiwi, wecuapitsapa peponaenexa Moab nacuajawabelia. Bajarajota, exananuba pijataxunaebo, Jericó tomara itsapanawetsica, Jordán-mene imoxoyojawata.2-3 Moab nacua pepopeyanacua-ewetsinë, Balac, Zipor pexënato, itsa wënëtane xua israelitawi exana amorreowijawabelia, bajaraponë ayaicuenia junawa, pijajiwi yajawa, tsipaji tane israelitawi bitso ayaibitsaëtojawa. 4 Nexata, Balac junata Madián nacuapijiwi pewetsiwi, penajumejaitsinexa pacuenia cuenecaranatsijitsia israelitawi. Bajaraponë jumaitsi: «Mapabitsaëtoxaneto daxitacuene werebiabanajetarubena wajajinawanapaenacuajawa. Pacuenia bueyu po̱na bawerenapona itsaxuayo xaenajetaruca wayafojawa, bajaracuene-itsi tsanajetarubenae bajarapamonae», jai Madián nacuapijiwi pewetsiwijawabelia.
5 Nexata, Balac penajumejaitsicujinae Madián nacuapijiwi pewetsiwijawabelia, itoroba itsamonae petojunatsinexatsi Balaam, Beor pexënato, Petor tomarata peponaponaenë, Éufrates mene imoxoyojawata pe-ecaetomara. Balaam ponapona pijamonae pijanacuata. Balac itoroba pejumaitsinexa Balaam-jawabelia mapacueniaje: «Pexaniacuene cawajëtatsi taneyawenonaenexamë. Egipto nacuajawawerena pepitsapaewi yacaëjëpapona daxitanacuanëjawa. Nexata, aeconoxae jinawanapa imoxoyo patajanacuata. 6 Bajarapamonae raja paxanëwecua panewecua-acuenesaë bitso. Naxatsia, bepijiayo paremena xanëjawaberena, necuenewajunupaebinexa bajarapamonae pibisiacuene petocopiapatsinexatsi. Bajarapacuenia itsa neyapijiwicuenewajunupaebijitsipame, nexata necuenecaëjëpaejitsipa tabarëwerebiabijawa bajarapamonaemi, tacapitsapaeya-exanaenexanua tajanacuawecua. Xanë yapëtaniji pacuenia necuenewajunupaebiwi tocopiapatabiabatsi. Nexata, pamonae cuenewajunupaebame pexaniacuene, bajarapamonae pexaniacuene taewanapabiaba. Pamonae pijinia pibisiacuenia cuenewajunupaebame, pibisiacuene taewanapabiaba. Bajaraxuata, cawajëtatsi bepijiayo nepatsinexa xanëjawaberena», jai Balac pejumeliwaisicaponaewitsijawabelia.
7 Nexata, itsamonae Moab nacua pewetsiwi, itsamonae yajawa Madián nacua pewetsiwi, naropoba peponaenexa Balaam-jawabelia. Yajawacapona palata, pematamotsinexa pibisiacuenia pecuenewajunupaebijamatabëcuene. Nexata, bajarapamonae itsa pata Balaam-jawata, tsipaeba paliwaisi tonajumerutatsi Balac.
8 Balaam nexata jumecanawiatsiaya jumaitsi bajarapamonaejawabelia:
—Ajena pamerawi panacuera-ewetsianame abaxë, tayanijobinexa Jehová xua exanaejitsianë. Nexata, merawia pacajumecanawiatsianatsi xua Jehová neyapëtaeya-exana —jai.
Bajarapamonae jejai. Nexata, bajarapacuenia bajarapapewetsiwi nacopaba Balaam-jawata pemajitsinexa. 9 Nexata, bajarapamerawi Balaam tsitanaitajëtatsi Dioso. Yanijobatsi:
—¿Detsa mapamonaeje, pamonae yajawamajitanucame? —jaitsi.
10 Nexata, Balaam jumecanawiata Diosojawabelia:
—Balac raja, pexënato Zipor, Moab nacua pepopeyanacua-ewetsinë, itoroba bajarapamonae tanejumaitsinexa: 11 «¡Taema! Pamonae pitsapa Egipto nacuawecua, bajarapamonae yacaëjëpapona daxitanacuanëjawa. ¡Naxatsia! Patsianame, bajarapamonae pibisiacuenia necuenewajunupaebinexa. Belia, bajarapacuenia itsa neto-exanaejitsipame, necuenecaëjëpaejitsipa tabarëwerebiabijawa bajarapamonaemi, tacapitsapaeya-exanaenexanua tajanacuawecua», tanejainexa —jai Balaam Diosojawabelia.
12 Nexata, Dioso jumaitsi Balaam-jawabelia:
—Pëtsa poname bajarapamonae pepëta, pibisiacuenia necuenewajunupaebinexa, tsipaji raja bajarapamonae xanë ta-itapetsiwi, pexaniacuenia tayawenonabiabinexa —jai.
13 Balaam nexata bajayacunua, namatacota. Jumaitsi Moab nacua, Madián nacuabeje pewetsiwijawabelia, pamonae Balac pitorobiwi:
—Panawiabare baja paxamë panija-irajawabelia, tsipaji raja Jehová aponetocopatsi paxamë yajawa taponaenexa —jai Balaam.
14 Nexata, bajarapamonae nawiabaponalia baja, petsipaebinexa Balac-jawabelia pacuenia Balaam jumaitsi. Bajarapamonae jumaitsi:
—Balaam apojitsipae penarenajawa paxanë patapëta —jai.
15 Icatsia Balac itoroba pecunuabitsaëto penamatacaitorobiwi, copiaya pitorobibitsaëtowecua. Orijibia, bajarapamonae matatoxenetsia ayaijamatabëcuenewi. 16 Bajarapamonae pona nexata Balaam-jawabelia. Jumaitsi:
—Marapacuenia catonajume-itoroba Balac, pexënato Zipor: «Pexaniacuene cawajëtatsi. Apojejamë pëtsa nepatsinexarena xanëjawaberena. 17 Pepacuene bitso cayaiyataenatsi. Carajutsianatsinua ayaijawa tacobecowëyajuwënëjawanë. Daxita pacuenia newajëtame, cato-exanaenatsi. Bepijiayo paremena, tanewecuacuenewajunupaebinexamë bajarapamonae pibisiacuene petocopiapatsinexatsi», cajai raja Balac —jai bajarapamonae.
18 Nexata, Balaam jumecanawiata Balac pijajiwijawabelia:
—Balac nerajutsijitsia-ata tsipae palatananijawanë, oronanijawanë-ata, pewënëtsibo, xanë aponecuenecaëjëpae Jehová, tajaDioso nejumaitsinejewa itsacuenejawayo-ata patacato-exanaenexa, tsiquiricuenejawayo, pinijicuenejawa-ata. 19 Itsiata, pacawajëtatsi paxamë panenacopatsinexa ajena pamerawi xanëjawata. Nexata, belia Jehová itsacuenia nejumecanawiatsipa ta-exanaenexa, xua yabara panewajëtame patacato-exanaenexa —jai Balaam. Bajarapamonae jejai. Nacopaba baja Balaam-jawata.
20 Nexata, icatsia bajarapamerawi Dioso majitsinaebota tsitanaitajëta Balaam. Jumaitsi:
—Itsa bajarapamonae icatsia casiwapata pecajunatsinexa, naponaename pepëta. Itsiata baitsi jane, saya exanaename pacuenia xanë cajumaitsitsi tsane —jai Dioso.
Dioso tsi-itoroba ángelnë peyacaranatsinexa burro, Balaam pejumaponaenëtsi
21 Balaam nexata pepobajayacunua namatacota. Pijaburro pesorowato jumaxaniawaeta peponaewajënaeya. Nexata, pamonae pepatsiwi, Moab nacua penamatacaitorobiwi, bajaraponë yajawapona. 22 Balaam nexata najetaruca pijaburrojumata. Yajawapona pijajiwitonëbeje. Itsiata baitsi jane, Dioso bitso ayaicuenia bara-anaepana bajaraponëjawabelia, penaponaexaea Moab nacua pewetsiwi pepëta. Nexata, Jehová pija-ángelnë tonutatsi namutotuatuajëta peyacaranatsinexatsi. 23 Balaam apotae picani ángelnë. Itsiata, paburrota yanajetaruca tane Jehová pija-ángelnë penawemarajutsi-espada pecobenanucaenë namutotuatuajëta. Nexata, burro matawaquetsia natsatajopa namutowecua, pexenetsinexa ángelnë. Itsiata baitsi jane, Balaam pijaburro conita, icatsia caewëarena penawiatsinexa namutuaberena. 24 Itsiata baitsi jane, Jehová pija-ángelnë xuacujinae, pewajënaeyabelia pona, icatsia yacaranatsiaya penucaenexa. Bajaraponë nuca namuto pepapetsojojocaejawata, tsipaji namuto najetaruca uvabacabonëtuatuajëjawa. Namutomuxubërëabeje xaina peyacaranatsijawa, ibotonëta pexanaejawa, uvabacabobeje peyacaranatsijawanë. 25 Nexata icatsia, bajarapaburro itsa tane Jehová pija-ángelnë, matawaqueta pexenetsinexa, iboyenepanajawa peyacaranatsijawa nacaliratsiaya penajetabarucaenexa. Bajarapacuenia pexenetsijawata, asaëyata Balaam taxucatobinatsi. Icatsia nexata, Balaam conita bajaraponë. 26 Nexata, Jehová pija-ángelnë xuacujinae, icatsia natixitsiawebetsiayo, penucaenexa itsajota iboyenepanajawabeje bitso tsiquirinamutoyo. Bitso epatsojojoca bajarajota. Nexata, burro apocuenecaëjëpaetsi pematawaquetsijawa pecujuajawabelia, petsawenojawabelia-ata. 27 Balaam pijaburro itsa tane Jehová pija-ángelnë, nexata irabereca bocanajereca. Bajarajota, pijaburro Balaam bara-anaepana. Icatsia, conita naebota. 28 Nexata, bajarapaepatota Jehová bajarapaburro cuaicuaijaiya-exana. Nexata, burro jumaitsi Balaam-jawabelia:
—¿Detsa xua xanë cato-exanatsi tanecaconitsimë baja acueyabi xuabeje? —jai burro.
29 —Bajarapacuenia caconitatsi, tsipaji aponecueneyaiyataemë, taneto-exanaenexamë taca-itorobicuenia. Itsa ajenaconoxae xanë canucaejitsipajë taja-espada, nexata cabeyaxuabijitsipatsi baja —jai Balaam pijaburrojawabelia.
30 Icatsia, burro jumaitsi Balaam-jawabelia yanijobiaya:
—¿Xanë tsaja aponijaburronë tsaponaponae? ¿Xamë tsaja aponexainaemë tanecomuatsijawaweliacujinaemë tacajumaponaponabiabinexa? ¿Itsajawata tsaja bajarapacuenia xanë cato-exanabiabatsi tacajumaponaponabiabijawata? —jai burro.
Nexata, Balaam jumecanawiata:
—¡Jume cajena! —jai
31 Nexata, bajarapaepatota Jehová tocopata Balaam petaenexa pija-ángelnë, pecobenanucaejawa penawemarajutsi-espada namutotuatuajëta. Balaam nexata bajarapaepatota, yaiyataecuenia pematabacabëta nuca irataeya Jehová pitabarata. 32 Nexata, Jehová pija-ángelnë jumaitsi Balaam-jawabelia:
—¿Detsa xuajitsia nijaburro conitame acueyabi xuabeje? Xanë raja nucabiabajë yacaranatsiaya, tsipaji xamë xua yabara poname, xanë netsita bitso pibisiacuene. 33 Nexata, nijaburro itsa netane, nematawaquetabiaba namutowecua acueyabi xuabeje. Itsa aponematawaquetabiabi tsipae, xanë baja xamë cabeyaxuabijitsipatsi. Nexata juya, copatsipajë nijaburro piasaënexa —jai ángelnë.
34 Nexata Balaam jumaitsi Jehová pija-ángel-nëjawabelia:
—Pibisiacuene exanajë. Xanë apoyapëtaenë picani nenucabiabijawa tawajënaeya, namutotuatuajëta. Nexata, ajenaconoxae itsa xamë catsita pibisiacuene tayajawaponaejawa bajarapamonae, xanë baja icatsia nawiatsianajë tajanacuayabelia —jai.
35 Itsiata baitsi jane, Jehová pija-ángelnë jumecanawiata Balaam-jawabelia mapacueniaje:
—Itsiata, naponaename mapamonaeje pepëta. Jane baitsi, xanë pacuenia canajumeliwaisirajutatsi, bajara-ëpacuenia jumaitsimë tsane —jai.
Nexata, bajarapacuenia Balaam icatsia yajawapona pesiwapatsiwitsi, Balac pijajiwi.
Balac copiapita Balaam
36 Itsa Balac jumetane Balaam penajetarucaejawa, nexata bajaraponë pemata-enenaenexa pitsapa, pecopiapitsinexa patomarata eca Moab nacua-ira pecopiarucaejawata, patomara eca imoxoyo Arnón-menewecua. 37 Jumaitsi Balaam-jawabelia:
—¿Xanë tsaja apo-itorobinë pecajunatsia-exanaenexa, bepijiayo nepatsinexarena? ¿Detsa xuajitsia aporenamë bepijia xanëjawaberena? ¿Xamë tsaja netaneme apotanecuenecaëjëpaenëcuenia tacajamatabëcuene-itajëtsinexa tacayaiyataejawa pinijimatamo tacarajutsijawata? —jai Balac.
38 Balaam nexata jumecanawiata Balac-jawabelia:
—Jume. Xanepana. Xanë baja belia patajopajë xamëjawaberena. Itsiata baja, maje cayapëtaeya-exanatsi. Xanë ra saya necuenecaëjëpa tacuenewajunupaebinexa Dioso taneyapëtaeya-exanaecuenia —jai.
39 Bajaraxuacujinae, Balac, Balaam-beje, ponabeje moabitawi pijatomarajawabelia, Quiriat-huzot-wënë tomara. 40 Itsa baja patabeje bajarajota, Balac nexata beya-exana vacamonae, ovejamonae-ata, petajuitsia-exanaenexa altar-jumata, pijadiosob pewënëta. Itsawiyayuwënëjawanë setsia-exana, Balaam, peyajawanajetarucaewi, Balac pijajiwi, penajuaxaenexa.
41 Itsamatacabijawabelia bajayacunua, Balac nexata yajawapona Balaam, Bamot-baal-tsutojawabetsia.c Nexata, bajarapatsutojumawetsica, tanebeje israelitawi pijataxunaebonëyajuwënëjawa.