Israel-pijinë pemomoxi cuene-amoneyaba Arad tomarata pejinawanapaewimi
21
Pamatacabijawa cananeomonae pepopeyanacua-ewetsinë, Arad tomarapijinë, ponapona Neguev-tusatota, bajarajota bajaraponë wënëtane israelitamonae penajetarubenaejawa panamutoruca Atarim-jawa. Nexata, bajaraponë barëpitsapa pijajiwi pebarënawajabitsaëtsinexa israelitawi. Pebarënabejawata taica itsamonae israelitawiyajuwënëwi. 2 Nexata, israelitawi najumecapanepaeya jumaitsi Jehovájawabelia: «Itsa xamë panejamatabëcujiruyawenonaename patacuene-amoneyabijawanexa mapamonaeje patajawajabitsaëwi, nexata pepocuene pawerebiabianajë daxita pijatomaranë yajawa», jai naliwaisicajoneya israelitawi. 3 Jehová jumetane xua najumecapanepaeya jumaitsitsi pewajëtsijawata israelitawi. Tocopata nexata pecuene-amoneyabinexa cananeomonae. Nexata, israelitawi yajawawerebiaba bajarapamonae, daxita pijatomaranë yajawa. Bajaraxuata, bajarapataxunaeyo wënëruba Horma.Dioso tonajumecopata Moisés-jawabelia jomojumapecataeya pexanaenexa broncenanitota
4 Pecuene-amoneyabicujinae cananeowi, israelitawi nexata pitsapa Hor-tsutojawawerena peponaenexa Canaán nacuajawabelia. Bajarapamonae najetarubena panamuto najetaruca Mar Rojo manuamenejawa, matawaquetsia peponaenexaa Edóm nacua, peponaeyaniwa bajarapanacuapijiwi pijanacuajawa. Bajarapaepatota bajarapamonae jamatabëcuenecueranaeya najetarubena. 5 Nexata, taxuxuaba icatsia siwajamatabëcuene-anaepanaeya pebaracuaicuaijaijawa Diosojawabelia, Moisés-jawabelia-ata. Anaeya jumaitsi tsaponae:
—¿Detsa xuajitsia paxamëbeje, Diosobeje patajanejutsimë Egipto nacuawecua, mapatusatonacuanëjawata patatëpaenexaje? Ajibi majotaje mera pata-apaejawabelia. Bajarapacuenia ajibinua pataxaejawa-ata. Belia baja bitso paxanë pajanijitsibinë mapapibisiamanájawaje orijibia pataxaeponaejawa —jai tsaponae anaeya.
6 Bajarapacuenia pejumaitsitsaponaexae, nexata Jehová tsi-itoroba bajarapamonaejawabelia jomo, pesineponaenexatsi pijataxunaebonëjawa. Nexata, itsa sineponatsi, bajarapacuenia israelitawiyajuwënëwi tëpa ayaibitsaëto. 7 Nexata, bajarapamonae itsa taepona bajarapacuenia, Moisés-jawabelia pona pejumaitsinexa:
—¡Paxanë panatotaniji pata-exanaejawa pibisiacuene patacuenecarapuabijawata Jehovájawabelia, bajarapacuenia xamëjawabelia-ata! ¡Jehovájawabelia paneyajiwiwajëre, patanewecuaponaenexa bajarapajomomonaenë! —jai bajarapamonae.
Moisés nexata towajëta Jehovájawabelia israelitawi pitaxutobejiobiataenexatsi. 8 Nexata, Jehová jumaitsi:
—Exanaename jomojumapecataeya broncenanitonë. Nexata, jomojumapecataeya nexanaenë rutsianame piapianaebo-upiyota. Bajaraxuacujinae, athëbëyo yayotanutsianame jiwi petaenexa. Nexata, pajiwiyo jomo sinianatsi, bajarapajumapecataenë itsa naëcotsiana petaenexa, nexata pesinijiwitsi jamatejema tsane. Bajarapajiwi asaë tsaponaponae tsane —jai Jehová.