Ibotojawawerena cotocaewi mera pepitsapaeya-exanaejawa yabara peliwaisi
20
Penamataxainaejuameto waita,a israelitamonae pata Zin nacuatusatojawata. Bajarajota, bajarapamonae pata-othopa cae-epatoyonexa Cades-tsutojawata. Bajarapanacuata tëpa María, Moisés pematapijiwa. Bajarajota, mëthëtatsi bajarapowami.2 Bajarapanacuajawata, ajibi mera piapaenexa. Nexata, daxita israelitawi nacaetuata, siwajamatabëcuene-anaepanaeya pejumaitsinexatsi Moisés, Aarón-bejejawabelia, apotsitaxanepanaetsi pewetsicuenebejejawalia. 3 Nexata, bajarapamonae bara-anaepanaeya jumaitsi Moisés-jawabelia:
—Panetoxanepana patayajawatëpaejawa picani patajamonaemi pacujinae Jehová tëpaeya-exana bajarapamonaemi. 4 ¿Detsa xuajitsia nexata panecaponame Jehová papijajiwinë mapatsewitusatonacuajawaberenaje? ¿Tsipaji tsaena pajitsipamebeje patacawecuatëpaejawa paxanë, patajadajubi yajawa? 5 ¿Detsa xuajitsia patajanejutsimë Egipto nacuawecua mapapiabejenacuajawaberenaje? Pibisianacua saya, tsipaji apoxanepanae waja-ubinexa. Ajibi pecuai pecapitsapaenaenë pacuenia higueranaenë, uvabacabonë, granadanaenë-ata. Bajarapacuenianua ajibi mera waja-apaenexa —jai bajarapamonae siwajamatabëcuene-anaepanaeya bajaraponëbejejawabelia.
6 Nexata, Moisés, Aarón-beje, wecuanatsata bajarapamonae. Bajaraponëbeje pona Dioso pijacarpabo baupa imoxoyojawabelia pewajëcaenexa Diosojawabelia. Bajarajota, bajaraponëbeje yaiyataecuenia nucabeje nabëxëtsutsiaya pitapapatsijawaberecabeje irabelia. Nexata, bajarapaepatota tsitanaitajëtatsibeje Jehová pijapeniweniwenaecotia. 7 Nexata, Jehová jumaitsi Moisés-jawabelia:
8 —¡Pire necanacuenebabiabinaebo! Bajaraxuacujinae, paxamëbeje, nematapijinë Aarón-beje, pacaetuatsianamebeje daxita Israel-pijinë pemomoxi, penubenaenexa ibotoxaneto canacujitsita. ¡Bajaraxuacujinae, bajarapamonae pitabarata itorobare nijumeta bajarapa-ibotojawabelia mera pepitsaparucaenexa, bajarapamonae petaenexa ibotojawawerena mera pepitsapaejawa, bajarapacuenia piapaenexa bajarapa-ibotopijimera, pijadajubi yajawa! —jai Jehová Moisés-jawabelia.
9 Nexata, Moisés pita pecanacuenebabiabinaebo, Jehová pitabarata pebocaenaebo, pecaponaenexa Jehová pitorobicueniatsi. 10 Bajaraxuacujinae, Moisés, Aarón-beje, nacaetuatsia-exana Israel-pijinë pemomoxi bajarapa-ibotoxaneto canacujitsita. Nexata, bajarapamonaecuene yabara Moisés jumaitsi: —¿Nexata tsaja, paxanëbeje pacatojutsianatsibeje mera mapa-ibotoxanetojawawerenaje patacarajutsinexabeje mera pane-apaenexa? —jai anaeya israelitawijawabelia.
11 Bajarapacuenia pejumaitsicujinae, Moisés nexata cobenanamaxëyotaba pijanaebo. Conitaxuabeta anijatobeje bajarapa-ibotoxanetojawabelia. Nexata jane baja, ibotoxanetojawawerena meraxaneto pitsaparuca. Nexata, bajarapacuenia matapania mera apa bajarapamonae, pijadajubi yajawa. 12 Itsiata baitsi jane, Jehová muxujiobiaya jumaitsi Moisés, Aarón-bejejawabelia:
—Paxamëbeje apopatanejumecowënëtsixaemëbeje, panecuene-aebamebeje nijumeta mera nepitsapaeya-exanaenexa pataca-itorobicueniabeje. Nexata, apopatanesiwanajamatabëcuenecopatsixaemëbeje xanëjawaberena, panajamatabëcuene-itajëtamebeje apopataneyaiyataejawamëbeje bajarapamonae pitabarata. Panecuene-aebamebeje patacato-exanaenexabeje patacajumaitsicowëyabeje. Bajaraxuata, apopajonemëbeje tsane mapamonae yajawa Canaán nacuajawabelia, pa-ira picani pacarajutsiapaebatsi —jai Jehová Moisés, Aarón-bejejawabelia.
13 Bajarapamera pepitsaparucaejawa wënëruba Meriba,b tsipaji bajarajota israelitamonae cuenecarapuabiaya jumaitsi tsaponae Jehovájawabelia. Bajaraxuata, bajaraPonë tsitanajamatabëcuene-itajëta penawecua-itoyajamatabëcuenec daxita pibisiacuene pexanaejawa.
Edom nacuapijiwi apocopatsi pijanacuajawa Israel-pijinë pemomoxi penajetarubenaenexa
14 Cades nacuajawawelia, Moisés itoroba pejumeliwaisicaponaewinexatsi Edom nacua pepopeyanacua-ewetsinëjawabelia, pejumaitsinexa mapacueniaje: «‘Paxanë Israel-pijinë papemomoxinë, paxamë rabaja patajamonaemë, tsipaji wajasalinainëmibejed nacaebananëbeje. Paxamë rabaja payapëtaneme papiayapëbejecuenejawanë panetocopiapatapona patanajetarubenaejawata. 15 Payapëtanemenua pacuenia patajasalinaiwimi pona Egipto nacuajawabelia. Bajarajotalia bajayajebi jinawanapa. Bajarapanacuapijiwi bitso ayaicuenia bejiobia-exanabiabatsi patajasalinaiwimi, bajarapacuenia paxanë-ata. 16 Patanebejiobia-exanaponaexae, paxanë belia pawajëcaponajë Jehovájawabelia, pataneyawenonaenexa. Nexata bajaraPonë panejumetane. Paneto-itoroba pija-ángelnë, patanejutsinexa Egipto nacuawecua. Nexata ajenaconoxae, pajinawanapajë Cades-jawata, panacuajawa panija-ira copiarucanajetaruca. 17 Pexaniacuene pacawajëtatsi pataneto-exanaenexamë, patanajetarubenaenexa panija-irajawa, bepijiayocuenia patapatsinexa panacuajawabelia Jehová panenamatacapona. Itsiata raja, patanajetarubenaejawata apopajoneponaenë tsane itsaxuayo pane-ubijawanë paxainame. Bajarapacuenia-ata apopa-apaeponaenë tsane panijamëthëanë pijimeranë. Saya panajetarubenaenajë rowia panamuto ruca, patoquebinejewanë, bajarapacuenia patanicabinexa itsabelia panajetarubenajë’, jai raja Moisés pecatonajume-itorobiliwaisi», jai pejumeliwaisicaponaewi Edom nacua pepopeyanacua-ewetsinëjawabelia.
18 Itsiata baitsi jane, bajarapacuenia petsipaebicujinae, Edom nacua pepopeyanacua-ewetsinë jumaitsi:
—¡Jume! ¡Pëtsa paxamë pataja-irajawa panajetarubename! Itsa bajaraxuayo paponaename, xanë, tajajiwi wajabitsaë yajawa, pacatsimaxëpitsapaenatsi patacabarënatseconaenexa —jai bajaraponë.
19 Itsiata, israelitawi icatsia jumaitsi:
—Paxanë raja apopacajamatabë-itonotsi tsanetsi. Panajetarubenaenajë saya peporowianamutojawa. Itsa paxanëyajuwënënë, patajadajubiyajuwënënë-ata pacato-apaejitsipa panijamëthë pijimeranë, nexata pacamatamotsianatsi patacato-apaejamatabëcuene. Saya caejawa pajitsipajë paxanë, patanetocopatsijawamë nija-irajawa patanajetarubenaenexa —jai.
20 Itsiata baitsi jane, Edom nacua pepopeyanacua-ewetsinë jumaitsi:
—¡Jume cajena! Apojitsipaenë paxamë bajaraxuayo paneponaejawa —jai.
Orijibia, bajaraponë barëpitspa pijajiwi wajabitsaë ayaibitsaëtoxaneto Cades nacuajawabelia, peyacaranatsinexa Israel-pijinë pemomoxi bajaraxuayo peponaeyaniwa. 21 Nexata itsa tane bajarapamonae apopetocopatsijawatsi peponaejawanexa bajarapa-irajawa, nexata Israel-pijinë pemomoxi matawaquetsiaya pona panamuto ruca bajarapamonae pija-iranë pënënenia.
Aarón tëpa Hor-tsutojumata
22 Nexata, daxita israelitawi pitsapa Cades nacuawecua, peponaenexa Hor-tsutojawabelia, itsajota Edóm nacua ira copianajetaruca. 23 Pepatsicujinae, Jehová bajarajota barëcuaicuaijai Moisés, Aarón-bejejawabelia, Hor-tsutojumata. Jumaitsi:
24 —Aarón raja tëpaena. Bajaraponë aponajone tsane panacuajawabelia rajutsiapaebajë israelitamonae, tsipaji raja paxamëbeje apopanejumecowënëtsimëbeje, pacuenia paca-itorobatsi pane-exanaenexabeje mera pepitsaparucaenexa ibotoxanetojawawerena. 25 Nexata, junatsianame Aarón, pexënato Eleazar yajawa, nebarëponaenexabeje Hor-tsutojumabetsia. 26 Nexata, bajarajotatsia wejumajonotsianame Aarón penaxatatsinawa, panawa naxatatabiaba sacerdotewi pepopenamatacaitorobinëxae. Nexata juya, jumaxatatsianame bajarapanaxatatsijawa Eleazar, tsipaji rabaja bajarajotatsia tëpaena Aarón —jai Jehová.
27 Moisés nexata jejai. Exana pacuenia Dioso tonajumecopatatsi. Nexata, daxitajiwi pitabarata, israelitawi, bajarapamonae pona bajarapatsutojumabetsia. 28 Bajaraxuacujinae, bajarajotatsia Moisés wejumajonota Aarón penaxatatsinawami sacerdotewi pepopenamatacaitorobinëxae. Juya jumaxatata pexënato Eleazar, penajamatabëcuene-itajëtsinexa bajaraponë pecanacopatsijawa sacerdotewi pepopenamatacaitorobinëcuene paxa pewënamuto. Nexata jane baja, Aarón tëpa bajarapatsutojumatatsia. Bajaraxuacujinae, Moisés, Eleazar-beje, runaicabeje bajarapatsutojumawetsica.
29 Nexata, itsa baja yapëtane israelitawi Aarón petëpaejawa bajarapatsutojumatatsia, nexata wënuatsi caejuametocuenia.