Israel-pijinë pemomoxiyajuwënëwi asiwaya barënawajëcabiaba Moab nacuapijiwi, Baal-peor jumapecataeya pexanaenëjawabelia
25
Israel-pijinë pemomoxi nacuenebanuba pijataxunaebo Sitim-tusatota, Moab nacuata pebocaetusato. Nexata belia, itsamonae pebijiwi israelitawiyajuwënëwi taxuxuaba Diosowecua penajamatabëcuenebijianaejawaa Moab nacuapijipetiriawijawabelia. 2 Bajarapowaxi junatabiaba israelitawi, pebijiwi, pebarëtajuitsinexa dajubi Baal-peor jumapecataenëjawabelia. Nexata bajarapapebijiwi penapatsicujinae, itsajota Moabitamonae dajubi tajuitsiaya rajutabiaba pijadiosowijawabelia, bajarapamonae najuaxaeyabiaba bajaraperajutsiyajuwënëwi. Pematabacabëtanua barënawajëcabiabatsi bajarapajumapecataenëjawabelia. 3 Bajarapacuenia pejamatabëcuenejëpaexae, belia nacajunua pejumecowënëtawanapaenexa Baal-peor pitorobiliwaisi. Nexata, siwanajamatabëcuenecopatabiaba bajaraponëjawabelia, peyawenonaenexatsi Jehováwecua. Bajaraxuata, Jehová bajarapacuenia itsa tane, bitso ayaicuenia bara-anaepana israelitawijawabelia. 4 Nexata Jehová jumaitsi Moisés-jawabelia:—Taicaename Israel-pijinë pemomoxituatuajëta pamonae pewetsiwi, pebarënajamatabëcuenejëpaewi Baal-peor-jawabelia. Nexata naejawata athëbëyo wësicëbarubia-exanaename matacabita, petëparubenaenexa xanë, Jehovánë, taitabarata. Bajarapacuenia itsa exanaename, jamatabëcuenecaewianajë bitso ayaicuenia tabara-anaepanaejamatabëcuenemi Israel-pijinë pemomoxijawabelia —jai Jehová.
5 Nexata, Moisés jumaitsi itsamonae Israel-pijinë pemomoxi pewetsiwijawabelia:
—Pabeyaxuabaponaename panijamonaeyajuwënëjiwi, pebarënajamatabëcuenejëpaewi Baal-peor-jawabelia —jai Moisés. Nexata, bajarapamonae Moisés pitorobicueniatsi exana.
6 Bajaraxuacujinae, Moisés barënacaetuata tabernáculobobaupa canacujitsita, itsajota itsamonae yajawa ayaibitsaëto natsinueyena pijamonae pijaneconijamatabëcuene. Bajarapaepatota, bajarapamonaeyajuwënënë itsanë tane tabernáculobo imoxoyo canacujitsialia pebarënajetarucaejawa madianitawab pijataxunaebojawaberena, pebarëpatsinexa. 7 Nexata Finees, pexënato Eleazar, Aarón-pijinë pemomo, nonotabapuna penatsinueyenaewituatuajëta. Pitaba pijacuererebo. 8 Bajaraponë pëbaralia ponë barënajetaruca madianitawa pijacarpabojawabelia. Penaimoxoyobijawatabeje, bajaraponë asaëyata najumacacuatabeje, daxitajiwibeje. Yasipitsatabatsibeje cuererebo. Finees, bajarapajiwibeje pebeyaxuabixae, Jehová matapania jamatabëcuenecaewa pebara-anaepanaejawa. Copata baja jiwi petëpaponaejawa Dioso pejamatabëcueneta. 9 Pamonae tëpa bajarapawixaeta, namata-ëjëta veinticuatro mil pajiwibeje.
10 Nexata Jehová jumaitsi Moisés-jawabelia:
11 —Finees, pexënato Eleazar, sacerdotenë Aarón-pijinë pemomo, bajaraponë pebeyaxuabijawata bajarapajiwibeje, nejamatabëcuenecaewia-exana tabara-anaepanaejamatabëcuenemi israelitawijawabelia. Bajarapacuenia exana tanejamatabëcuenejëpaexae pitoyajawa jiwi pesiwanajamatabëcuenecopabijawa jumapecataeya pexanaenëjawabelia xanëwecua. Bajaraxuata, apowerebiabinë daxita Israel-pijinë pemomoxi, bajaraponë pejamatabëcueneta. 12-13 Nexata yapëtaeya-exanaename Finees pacuenia xanë, Jehovánë, najumeliwaisicajunuajë bajaraponëjawabelia, pemomoxijawabelia-ata, bajarapamonae pecanacopataponaenexa tajasacerdotewi daxitamatacabijawabelia —jai Jehová.
14 Ponë Finees beyaxuaba pewënë Zimri, pexënato Salu. Bajaraponë pewetsinë Simeón-pijinë pemomoxi. 15 Pamadianitawa pijinia beyaxuaba, pewënë Cozbi, pexënatoyo Zur. Bajaraponë penamatacaitorobinë pijamonae madíanitawituatuajëta.
16 Nexata icatsia Jehová jumaitsi Moisés-jawabelia:
17-18 —Tsimaxëponaename madianitawijawabelia, newerebiabinexa, tsipaji bajarapamonae pacatsimaxëpata papecayamaxë-itojorobiliwaisita, xanë juya patacawerebiabinexa panijaneconijamatabëcuene. Papecayamaxë-itojorobixae Baal-peor peliwaisita, Cozbi, madianitawi pewetsinë pexënatoyo, papecayamaxë-itorojobixaenua, pacawerebiabanajetarucatsi wixaeta panijaneconijamatabëcueneta. Bajaraxuata pawerebiabianame bajarapamonae —jai Jehová.