Moisés itoroba doce ponëbeje Canaán nacua peya-enebiwinexa
13
Pacujinae Israel-pijinë pemomoxi jinawanapa Parán-wënë petsewitusatonacuata, bajarajota icatsia Jehová jumaitsi Moisés-jawabelia:2 —¡Itsamonae itorobare peponaenexa, petaenexa Canaán nacua, pa-ira xanë rajutsiapaebajë israelitawijawabelia! Nexata, itapetsianame caenë caebitsaëto canacujitsia Israel-pijinë pexi, doce ponëbeje, pemomoxiyajuwënëwi, nitorobinexa peya-enebanajetarubenaewinexa. Itsiata baitsi jane, itapetsianame pamonae pewetsiwiyajuwënëwi pijamonaetuatuajëta —jai Jehová.
3 Nexata, Moisés exana pacuenia Jehová tonajumecopatatsi. Itoroba Parán nacuatusatojawawelia peponaenexa Canaán nacuajawabelia. Bajarapamonae pitapetsiwitsi peponaewinexa, bajarapamonae daxita pena-ewetsiwiyajuwënëwi israelitawi. 4 Marapamonaeje peponaewi pewënëanë: Itsanë Rubén-pijinëmi pemomoxibitsaëto pewetsiwiyajuwënënë pewënë Samúa, pexënato Zacur. 5 Itsanë pijinia Simeón-pijinëmi pemomoxibitsaëto pewetsiwiyajuwënënë, pewënë Safat, pexënato Horí. 6 Itsanë pijinia Judápijinëmi pemomoxibitsaëto pewetsiwiyajuwënënë pewënë Caleb, pexënato Jefone. 7 Itsanë pijinia Isacar-pijinëmi pemomoxibitsaëto pewetsiwiyajuwënënë pewënë Igal, pexënato José. 8 Itsanë pijinia Efraín-pijinëmi pemomoxibitsaëto pewetsiwiyajuwënënë pewënë Oseas,a pexënato Nun. 9 Itsanë pijinia Benjamín-pijinëmi pemomoxibitsaëto pewetsiwiyajuwënënë pewënë Palti, pexënato Rafú. 10 Itsanë pijinia Zabulón-pijinëmi pemomoxibitsaëto pewetsiwiyajuwënënë pewënë Gadiel, pexënato Sodi. 11 Itsanë pijinia Josépijinë pexënato,b Manasés-pijinëmi pemomoxibitsaëto pewetsiwiyajuwënënë pewënë Gadi, pexënato Susi. 12 Itsanë pijinia Dan-pijinëmi pemomoxibitsaëto pewetsiwiyajuwënënë pewënë Amiel, pexënato Gemali. 13 Itsanë pijinia Aser pemomoxibitsaëto pewetsiwiyajuwënënë pewënë Setur, pexënato Micael. 14 Itsanë pijinia Neftalípijinëmi pemomoxibitsaëto pewetsiwiyajuwënënë pewënë Nahbi, pexënato Vapsi. 15 Itsanë pijinia Gad-pijinëmi pemomoxibitsaëto pewetsiwiyajuwënënë pewënë Geuel, pexënato Maqui.
16 Daxita mapamonaeje pewënëanë, Moisés pamonae itoroba peya-enebanajetarubenaewinexa Canaán iranacua. Bajarapaepatota peponaematacabinexa, Oseas-pijinë, pexënato Nun, Moisés wënë-itothiana peponaewajënaeya. Wënëruba Josué.
17 Itsa Moisés itoroba bajarapamonae peya-enebinexa Canaán iranacua, yajawanajumecopata mapacueniaje:
—Paponaename maweliacujinaeje panepatsinexa Neguev nacuajawabelia. Bajaraxuacujinae, paponaename panepatsinexa petsutonënacuajawabetsia. 18 Xaniawaetsia bajarapanacua pana-itaxutocaewetanajetarubenaename, bajarapacuenia-ata pamonae jinawanapa bajarapanacuatalia, itsa pecuene-aitatsacawi, itsa jume, itsa pecuene-aitejepaebiwi. Bajarapacuenia pataenamenua itsa jinawanapa caejiwiyobeje, itsa jume pijinia, itsa bitso ayaibitsaëtoxaneto. 19 Pataenamenua pijatomaranë, itsa bajarapamonae jinawanapa saya carpabonëta; itsa xaina pijatomaranë peyana-itacaranatsijawanë pijawajabitsaëwiwecua. Bajarapacuenia pataename pitsinacuata jinawanapa bajarapamonae; itsa pexania-iranë, itsa jume, pibisia-iranë, 20 itsa pijinia bitso pexanianaxaniabi-iranë, itsa jume pijinia, pe-ubijawanë apopenaxaniabi-iranë. Bajarapacuenia itsa pejinawanapaenacua xaina unuanë, itsa jume, itsa apoxainae. ¡Pëtsa pajunawame paneponaenexa! ¡Panajamatabëcuenesaëre! Pacapatsianame bajarapanacuapijinaecuaijawanë wajataenexa —jai Moisés.
Nexata, bajarapamonae pona pamatacabijawa banota copiayapijinacuaitsi uvacuaijawanë.c 21 Nexata, bajarapamonae pona jane baja, peya-enebinexa bajarapanacua. Ya-enebanajetarubena daxitanacua Zin nacuatusatojawawetsiacujinae, pepatsinexa Rehob nacuajawabelia. Bajarapamonae wecuanawiaba imoxoyo pepuapatsijitsia Hamat tomarajawabelia. 22 Nexata, bajarapamonae ya-enebanajetarubena Neguev nacuajawa, pepatsinexa Hebrón tomarajawabelia. Bajarapamatacabi bajarajota jinawanapa Ahimán-pijinë, Sesaipijinë, Talmaipijinë-ata; Anac-pijinë pemomoxi.d Hebrón tomara bitso perujutomara Soan tomarawecua, Egipto nacuata pe-ecaetomara. Baitsi, Hebrón exaneta siete pawaibeje Soan tomara pexanaewajënaeya. 23 Nexata, bajarapamonae pata Escol nacuajawata. Bajarajota, bajarapamonae yamaxërana ucuta uvacuaimaxërana; xuanë peparuanë xaina. Bajaraparu pinijiruxaneto.e Nexata, anijanëbeje namata-enetsia yawëtacaraponaponabeje naejawayota. Bajarajotanua, ucuba higocuai, granadacuai yajawa pecaponaenexa. 24 Nexata, bajarapamonae bajarajota wënëruba Escol,f piniji-uvaru pe-ucutsijamatabëcuene israelitamonae.
25 Pepuaya-enebiweretsi bajarapa-ira, cuarenta pamatacabibejecujinae, nawiabarena. 26 Pata-othopa icatsia Cades-jawaberena, Parán nacuatusatojawaberena itsajotarena Moisés, Aarón-beje, daxita israelitawi yajawa ponaponabeje. Nexata, bajarapamonae tsipaeba pijamonaejawabelia xua taewanapa Canaán nacuatalia. Bajarapacuenia tsitajëta pacuaijawanë capata, bajarapanacuapijijawa. 27 Nexata, jumaitsi Moisés-jawabelia, daxita pijamonaejawabelia-ata:
—Paxanë paponajë pa-irajawabelia pane-itorobame patataenexa. Pepacuene bajarajotalia nawitsia capitsapa daxitaxuanë pexaecuene. Bitso pexanianacua Jehová wajanacajumaitsicowëya picani. Marapacuaijawanë bajarapanacuapijijawa. 28 Itsiata baitsi jane, bajarapanacuata pejinawapaewi bitso piacujirusaëwi. Pijatomaranë-ata bitso ayaitomaranë. Icatsia, xainanua peyana-itacaranatsijawanë pijawajabitsaëwiwecua. Bajarapanacuata jinawanapa Anac-pijinë piapianëmi pemomoxi. 29 Neguev nacuajawata pijinia, jinawanapa amalecitawi. Petsutonëjawata pijinia, jinawanapa heteomonae, jebuseomonae, amorreomonae-ata. Bajarapijinia pacuenia manuameneyenepanajawa, Jordán-mene imoxoyojawata-ata jinawanapa cananeomonae. Daxita bajarapamonae nacatsi-ayai tsane cajena —jai peya-enebiwiyajuwënëwi diez ponëbeje.
30 Bajaraxua pejumetaejawata, Caleb itoroba pemoyanexa daxita Israel-pijinë pemomoxi, pamonae jamatabëcuenebëjaiya nabarëcuaicuaijai tsaponae, Moisés pitabarata penubenaewi. Pemoyacujinae, jumaitsi bajarapamonaejawabelia:
—Ponaenatsi itsiata baja bajarapamonaejawabelia, wajabarënawajabitsaëtsinexa bajarapa-ira yabara. Waxaitsi cajena nacacuenecaëjëpa wajawecuapitsinexa pija-irami, wajacanacopabinexa wajajinawanapaenacuanexa —jai Caleb.
31 Itsiata baitsi jane, penajuaya-enebiwi diez ponëbeje jumaitsi Caleb-jawabelia:
—¡Jume! Aponacacuenecaëjëpae cajena bajarapamonae wajabarënabenexa, tsipaji raja bajarapamonae bitso piacuenesaëwi waxaitsiwecua —jai bajarapamonae.
32 Nexata, bajarapadiez ponëbeje tsipaebanajetarubena israelitamonaejawa apopexanepanaenacuacuene peya-enebinacua. Jumaitsi:
—Bajarapanacua pibisianacua, itsajota jiwi piajani yatëpabiaba. Nacatsi-ayai tsane tsipaji bajarapanacuapijiwi bitso ayaicuenia ayaibitsaëtoxaneto. Bitso piapiawinua. 33 Patanijinua bajarajotalia pebijiwi ayainëxanetonë, Anac-pijinë pemomoxiyajuwënëwi. Nexata, bajarapamonae pitabarata waxaitsi tsitatsi bebosesetoxitsi. Bajarapijinia pacuenia nacatane bajarapamonae-ata, tsipaji bitso tsiquirijiwitsi bajarapamonae pitabarata —jai bajarapamonae muxubijiapenetsiaya.