Israel-pijinë pemomoxi apojone Canaán nacuajawabelia
14
Bajarapaliwaisi pejumetaejawata, daxita israelitamonae bitso jamatabëcuenebëjaiya taxuxuaba jane baja pe-aëaëjaijawa daxitamerawijebi. 2 Bajarapamonae daxita najuacuenebaracuaicuaijai pibisiacuenia Moisés, Aarón-bejejawabelia. Najumaitsi tsaponae bajaraponëbeje yabara: «Nacatoxanepana picani waxaitsi wajatëpaejawa Egipto nacuatalia, itsa jume, wajanajetarubenaejawata petusatonacuajawa, bajarapamonae wajanacabeyejebijawawecua. 3 ¿Detsa xuajitsia Jehová wajanacacaponae mapanacuajawaberenaje? Nacacapona tsaena maberenaje wajatëpaenexa bajarapamonae wajanacabeyejebicuenia wajanacabarënawajabitsaëtsijawata. Nexata, bajarapacuenia taicaenatsi wajawaxi, wajaxijiwixi-ata, bajarapamonae penaxainaeyabinexatsi wajanacabeyejebicujinae, petonacuenebawanapaewinexa. Nacatoxanepana saya wajanawiabijawa Egipto nacuajawabelia», najai tsaponae. 4 Bajarapacuenia penajumaitsitsaponaexae, belia bajarapamonae najumaitsi mapacueniaje: «Itsanë nexata juya nato-itapetsianatsi wajanacanamatacaitorobinënexa, ponë wajanacabarënawiatsinënexalia Egipto nacuayabelia», najai tsaponae.5 Nexata, Moisés, Aarón-beje, bitso penajamatabëxainaejawata, yaiyataecuenia nabëxëtsutsiaya irataeya nucabeje pewajëcaenexa Diosojawabelia daxitabitsaëto Israel-pijinë pemomoxi pitabarata. 6 Bajarapacuenianua Josué, Caleb-beje pebarëya-enebaponaponaenëmibeje Canaán nacua, bejamatabëcuenejiobi tsanajetsirecabeje pejumetaejawata israelitawi pejumaitsitsaponaejawa. Nexata, najuma-esetitinaxuababeje, penajamatabëcuene-itajëtsinexabeje bitso petsi-atanejawatsibeje bajarapamonae pecuene. 7 Nexata, jumaitsibeje israelitamonaejawabelia:
—Pa-ira pabarëya-enebaponaliajë bitso cajena pexania-ira. 8 Pepacuene nawitsia capitsapabiaba daxitaxuanë pexaecuene. Itsa exanaenatsi pacuenia Jehová jitsipa wajanacasiwabarëyanexa, nexata nacayawenonaena bajarapa-ira wajanacarajutsinexa wajanawajabitsaëtsijawata bajarapanacuapijiwijawabelia. 9 ¡Pëtsa baitsi jane, Jehovájawabelia pabara-anaepaname! ¡Pëtsanua pacujunawame bajarapanacuapijiwi! Bajarapamonae saya waxaitsi jamatejema werebiabianatsi. Nacatoyapëxanepanaena wajacuene-amoneyabijawa bajarapamonae. Baitsi, nacatocuenejëpaena bewaxaejawa pan, tsipaji Jehová nacayajawa tsane. Bajarapamonae pijadiosowi, jumapecataeya pexanaenëanëjawabelia, siwanajamatabëcuenecopatabiaba peyawenonaenexatsi. Jehová bajarapadiosowi pecuene-amoneyabinë tsaponaponae. Nexata, bajarapamonae apoxainae tsane peyacaranatsinënexatsi. Biji rajane, waxaitsi tsuxainatsi wajanacayawenonaenënexa, Jehová. ¡Pëtsa pacujunawame! —jaibeje Israel-pijinë pemomoxijawabelia.
10 Bajarapacuenia pejumetaejawata, bajarapamonae orijibia jamatabëbeyaxuabatsibeje, petseconaecueniatsi piniji-ibotonëta. Nexata, petsimaxëpatsijawatatsibeje, bajarapaepatota Jehová itacarajeta pijapeniweniwenaecotia yajawa naitajëta pijacarpabojawata daxita israelitamonae pitabëta. 11 Nexata, Jehová jumaitsi Moisés-jawabelia:
—¿Detsa xuajitsia bajarapamonae beweliajamatabëcuenenëcuenia tajanetaeyabiabi? ¿Detsa paepatota copatsiana tanecuene-aebabiabijawa, tsita-exanabiabi-atanë pinijicuenejawanë bajarapamonae pitabarata? 12 Nexata, xanë tsi-itorobianajë pinijiwitanecuene bajarapamonae petëpaenexa, tarajutsiapaebi-iramijawabelia pejoneyaniwa. Itsiata baitsi jane, xamëjawawerena capitsapaenajë itsabitsaëto tajajiwinexa, bitso pinijibitsaëto bajarapamonaewecua. Bajarapacuenianua pecuene-aitatsacawi tsane —jai Jehová Moisés-jawabelia.
13 Itsiata baitsi jane, Moisés jumecanawiata Jehovájawabelia mapacueniaje:
—Apoxanepanae bajaraxua ne-exanaejawa. Xamë tsipaji necuenesaëta bajarapamonae jutame Egipto nacuajawawerena, bajarapanacuapijiwimi necuene-amoneyabicujinae. Nexata, pacujinae Egipto nacuapijiwi cawënëliwaisitaena xua jamatabë-exaname mapamonaejawabelia, nexata juya cacuene-aebiana. 14 Nexata, cacuenewajunupaebiana Canaán nacuapijiwijawabelia apopecacuenecaëjëpaenëcuenia. Bajarapamonae picani itsacuenia cawënëliwaisitane xamë yabara. Cawënëliwaisitane pacuenia paneyajawamë tsaponaponae, pacuenianua naitajëtabiabame padaxitanë pata-itabëta piapiapajubojawata, pacuenia matacabita pijinia panematacaponabiabame piapiapajubota benaesiturutocuenia, pacuenianua merawi penaitayotsicotiapajubo bepetajuenajetarucaenaesiturutocuenia panematacaponabiabame. Daxita bajaraxua cawënëliwaisitane picani. 15 Itsa nexata xamë beyaxuabianame caecuenia bajarapamonae, nexata pamonae pecawënëliwaisitaewi xamë yabara, cawënëliwaisijumaitsi tsipae: 16 «Yerajane, capatsinejewa najumecapanepaeya perajutsiapaebinacuajawabelia Jehová nayajiwibeyaxuaba bajarapamonaemi petusatonacuata. Bajaraponë apocuenecaëjëpaetsi bajarapabitsaëto pecapatsinexa bajarapa-irajawabelia», bajarapamonae cayabarajai tsipae.
17 »Nexata bajaraxuata, ayaicuenia cawajëtatsi xamë Jehová, nitajëtsinexa pepacuene niacuenesaënëcuene, daxitanacuapijiwi pecawënëliwaisixaniatsinexa. Najumeliwaisicowënëtsianame pacuenia bajayatami nejumaitsimë: 18 «Xanë, Jehovánë, bepijiacuenia apota-anaepanaenë. Bitso ta-asiwanë jiwi. Tasiwajamatabëcuenecaewinë pajiwiyo pibisiacuene exana, pajiwiyonua aponejumecowënëtsi piajamatabëcuenebejexae. Itsiata baitsi jane, xanë apocopatsinë tsane naneconitsia-exanaenejewanë pajiwiyo naneconita xanëjawaberena. Bajarapajiwi aponaneconitsia-exanaenë tsane caejiwi. Itsa pexi pexainaenë, yajawananeconitsia-exanaenajë pexi, pemomoxijawabelia-ata. Baitsi, pexi pemomoxijawabelia, itsa jume, pemomoxi pexijawabelia matapania copatsianajë tananeconitsia-exanaejawa bajarapamonae», nejamë picani. 19 Nexata bajaraxuata, cawajëtatsi nesiwajamatabëcuenecaewinexa bajarapamonae pijaneconi pexanaejawa xamëjawabelia, xamë tsipaji ayaicuenia jiwi nitaxutotsoniataeyabiabinë. Pacuenia Egipto nacuajawawerena pepitsapaecujinae xamë siwajamatabëcaewabiabame, bajarapacuenia icatsia nesiwajamatabëcuenecaewinexa —jai Moisés Jehovájawabelia pewajëtsijawata.
Dioso naneconitsia-exana Israel-pijinë pemomoxi
20 Nexata, Jehová jumecanawiata Moisés-jawabelia mapacueniaje:
—Je, xanepana. Nexata, xanë bajarapamonae siwajamatabëcuenecaewianajë pacuenia xamë newajëtame. 21 Itsiata baitsi jane, catsipaebatsi maje: «Xanë raja ta-asaëtsaponaponaenë, bajarapacuenianua ayaijamatabëcuene taxainaenëcuene tsitajëtajë daxita-irajawa, jiwi tanewënëliwaisitaenexa. Bajarata-itsinëxae, najumecapanepaeya catsipaebatsi: 22-23 ‘Caejiwi-ata tanecuene-aebiwi apojone tsane pa-irajawabelia picani najumecapanepaeya rajutsiapaebajë pijasalinaiwimijawabelia. ¡Jume cajena! Bajarapacuenia bajarapamonae apojone tsane, tsipaji xanë necueneyapëtae-ata bajarata-itsinëcuene tatsita-exanaejawata bitso pinijicuenejawanë Egiptojawatalia, bajarapacuenia-ata petusatonacuata, bajaraxuanë tae-ata, aponejumecowënëtabiabi. Caranata, nejamatabëcuene-ëjëbiaya najetarubena petusatonacuajawa. Diez xuabeje baja nejamatabëcuene-ëjëba. Nexata, pamonae netane bewelianëcuenianë, bajarapamonaeyajuwënëwi apotae tsane Canaán nacua caenë-ata, siwajamatabëcuenecaewi-atanë picani tanewajëcaecueniamë’», cajaitsi —jai Jehová Moisés-jawabelia pecuene-aebiwitsi yabara.
24 Icatsia, Jehová jumaitsi Moisés-jawabelia.
—Itsiata, tajajiwitonë Caleb bajarapamonaewecua jonena bajarapanacuajawabelia, baja tsipaji xaina itsajamatabëcuene tanecuene-aebiwiwecua. Bajaraponë xaniajaiya najamatabëcuenewereta pejamatabë-ëthëtowetsina tanejumecowënëtaponaponaenexa. Nexata, tanejumecowënëtsixae, bajaraponë xanë tocopatsianajë pejonenexa Canaán nacuajawabelia pepitsinexa bajarapanacuayajuwënë-ira, peya-enebinacuami. Nexata, pemomoxi canacopataponaena bajarapa-ira. 25 Itsiata, daxita israelitawi xamë Moisés caewëarena barëponaename icatsia petsewitusatonacuajawaberena, patusatonacua boca petsutonacua pewajënaeya itsajota jinawanapa amalecitamonae, cananeomonae-ata. Nexata, merawia bajayacunua panaropobianame panepatsinexa patusato boca Mar Rojo manuamene imoxoyojawaberena, bajarapamonae papecabarënawajabitsaëtsiyaniwa —jai Jehová.
26 Jehová xuacujinae icatsia jumaitsi Moisés, Aarón-bejejawabelia:
27 —Acuenejitsibinë bajarapa-ajamatabëcuenebejewi tanejamatabëcuene-ëjëbabiabijawa baja. Amuxujitsibinënua tanecuenebaracuaicuaijaijawa pibisiacuenia nesiwajamatabëcuene-anaepanaeya israelitawi. ¿Detsa paepatota copabiana bajarapacuene? 28 Nexata, pajumaitsimëbeje tsane bajarapamonaejawabelia: «Jehová raja pacajumaitsi: ‘Xanë raja daxitamatacabi tayamatacabiatsitecaenë. Pacuenia pajumaitsimë panetëpaejawa yabara patanebaracuaicuaijaijawatamë, nexata bajarapajumecowëya pacato-exanaenatsi. 29 Nexata, patëpaename mapatsewitusatonacuataje. Baitsi, daxita pamonae pibisiacuenia tanenajuacuenebaracuaicuaijaiwi, pexainaewi veinte pawaibeje pematatsënëa pewënëjucaewitsi censojawata, bajarapamonae tëpaena. Bajarapamonae nacayajatsiaya namëthëcaponaena bajarapatusatonacuajawata. 30 Caenë-ata paxamëyajuwënënë apojone tsane pa-irajawabelia najumecapanepaeya pacarajutsiapaebatsi picani panejinawanapaenexa. Itsiata baitsi jane, tajajiwitonëbeje Caleb, Josuébeje jonena bajarapa-irajawabelia peponaponaenexabeje. 31 Itsiata baitsi jane, paxamë panexi, pamonae pacacujunawame panijawajabitsaëwi papecatotaicaeyaniwatsi, bajarapamonae juya pacatsujonena panewënamuto. Pa-ira paxamë beweliacuenia panaëcotame panejoneyaniwa, bajarapa-ira panexi juya pacatsucabarëya tsane. 32 Paxamë juya panetëpaewi pacamëthëcaena bajarapatusatonacuata. 33 Nexata, patanejume-aebixaemë ajena, panexi pacayajawajinawanapaena petsewitusatonacuata cuarenta pawaibeje panijaneconijamatabëcuene, matapania panetëpaejawabelia patanecuene-aebiwimë. Nexata, bajarapamonae pacayajawawarapaponaena oveja pewetsiwicuenia. Bajarapacuenia panexi bejiobicueneta jinawanapaena apopatanejumecowënëtsijamatabëcuenemë. 34 Paxamë pamatacabibeje pajinawanapame paneya-enebiwicuenia Canaán nacuatalia, bajarapacuarenta pamatacabibeje pejamatabëcuene pajinawanapame cuarenta pawaibeje petsewitusatonacuata panijaneconijamatabëcuene. Baitsi caematacabijamatabëcuene pacatocaewai tsane. Bajarapacuarenta pawairenabeje matapania payapëtaename patacananeconitsia-exanaejawa,’ pacajai Jehová», pajamëbeje tsane tawënëta israelitawijawabelia. 35 Pacuenia xanë, Jehovánë, najumecapanepaeya pacajumaitsitsibeje, bajarapajumecowëya to-exanaenajë bajarapa-ajamatabëcuenebejewijawabelia, tsipaji bajarapamonae xaina caejamatabëcuene tane-itoyanexa. Nexata, daxita bajarapamonae tëpaena petusatonacuata. Bajarajota, jinarutsiana pitsapaenejewa petëpaejawabelia —jai Jehová Moisés, Aarón-bejejawabelia.
36-37 Moisés pamonae itoroba pebarëya-enebiwinexa Canaán nacuajawabelia, bajarapamonae Jehová tocopata diez ponëbeje petëpaejawa caecuenia daxitajiwi pitabëta, tsipaji bajarapamonae nacua peya-enebicujinae, capata pibisiawënëliwaisi. Nexata, bajarapaliwaisita muxubijiapeneta Israel-pijinë pemomoxi, pejoneyaniwa Canaán nacuajawabelia. Bajarapamonae peliwaisi pejamatabëcueneta, daxita israelitawi siwajamatabëcuenebara-anaepana Jehová, nexata Jehová tocopata bajarapadiez ponëbeje petëpaenexa. 38 Itsiata baitsi jane, Josué, pexënato Nun, Caleb-beje pexënato Jefone, bajaraponëbeje apoyajawatëpae bajarapamonae. Bajaraponëbeje jamatejema asaë tsaponaponaebeje peya-enebiwiyajuwënënëbeje.
Itawetsi-atatsi picani, israelitawi tsimaxëpata itsiata Hormapijiwijawabelia
39 Moisés baja itsa tsipaeba israelitamonaejawabelia xua Dioso jumaitsitsi, nexata bajarapamonae daxita bitso najamatabëxainaeya jinawanapa. 40 Nexata, itsamatacabijawabelia, pepobajayacunua, bajarapamonae namatacoba peponaenexa petsutonënacuajawabetsia, itsajota jinawanapa amalecitawi, cananeowi-ata, pebarënawajabitsaëtsinexa bajarapamonaejawabelia. Bajarapamonae pepitsapaewajënaeya najumaitsi:
—Bajaramajotaje nubenatsi Canaán nacua imoxoyojawata wajajonenexalia. Xaniajai, bitso pibisiacuene exanatsi picani Jehovájawabelia. Itsiata, aeconoxae ponaenatsi panacuajawabelia bajaraPonë nacarajutsiapaeba, tsipaji baja copatatsi apowajajumecowënëtsicuenemi —najai.
41 Itsiata Moisés jumaitsi bajarapamonaejawabelia:
—¡Itonopae! ¿Dexuajitsia orijibia apopajumecowënëtsimë Jehová papeca-itawetsijawa? Maxua pa-exanae-atamë tsane, apopacatopitsapae tsane pexaniacuenia. Payacueniabejemë tsane. 42 ¡Pëtsa paponame panewajënaeyabelia, tsipaji raja Jehová apopacayajawa tsane! ¡Pëtsa paponame, panijawajabitsaëwi papecabeyejebinexa papecacuene-amoneyabijawata, 43 tsipaji raja panewajënaetalia pacawajënae-ewetanubena amalecitamonae, cananeomonae-ata papecabarënabenexa paxamë! Itsa paponaeremelia, pacabeyejebiana pija-espadanëta, tsipaji Jehová apopacayajawa tsaponaponae, imata apopanesiwanajamatabëcuenecopatsixae bajaraPonëjawabelia —jai Moisés bajarapamonaejawabelia, pebeyejebiyaniwatsi picani pijawajabitsaëwi.
44 Itsiata baitsi jane, bajarapamonae ajamatabëcuenetaja orijibia. Itsiata, jumetae-ata, wecuaponaliatsi bajarapatsutonëjumabelia itsajotalia wajënae-ewetatsi bajarapanacuapijiwi. Bajarapamonae ponae-ata, itsiata Dioso penajumeliwaisixaniawaetsibaula nacopata Dioso pijacarpabota israelitawi pijataxunaebotuatuajëta. Bajarapacuenia Moisés-ata nacopata. 45 Nexata jane baja, amalecitamonae, cananeomonae, pejinawanapaewi bajarapanacuata, petsutonacuawetsica patsica pebarënawajabitsaëtsinexatsi israelitawi. Cuene-amoneyabatsi bitso ayaicuenia. Nexata, tëpa ayaibitsaëto. Nexata, israelitamonaemi pëbarajinatsi Horma tomarajawabelia.
C15—C19 […]