Moisés pematapijiwibeje pibisiacuenia cuenecarapuabatsi
12
Israel-pijinë pemomoxi pejinawanapaejawata Hazerot nacuata, Moisés pematapijiwibeje, María, Aarón-beje, cuenecarapuabiaya baracuaicuaijaitsibeje, pepitsixae pijawanexa cusitawiriawa.a 2 Nexata, jumaitsibeje: «¿Jehová tsaja cuaicuaijai tsabiabi caenë Moisés-jawabelia? ¿Jehová tsaja waxaitsi-atabeje aponacabarëcuaicuaijai tsabiabi?», jaibeje Moisés cueneca-ëbiaya. Itsiata, jumetanetsibeje Jehová bajarapacuenia pejumaitsijawabeje.3 Moisés raja bitso beweliajamatabëcuene penataenë daxitajiwiwecua. Apopecuenecanawiatsinë bepijiayo. 4 Bajaraxuata, Jehová jumaitsi Moisés, Aarón, Maríajawabelia-ata:
—Paponaename paxamë acueyabi papajiwimëbeje tajacarpabojawabelia. —jai.
Nexata, bajarapa-acueyabi pajiwibeje pona bajarabelia. 5 Pepatsicujinaelia bajarapamonae, Jehová runaica pepopitayaëpajubota, caranatsiaya perucajopaenexa pijacarpabo baupajawata.b Bajarapapajubojawawerena, junata, Aarón, Maríabeje, pimoxoyotsinexabeje. Nexata, bajarapajiwibeje cujiliabeje. 6 Jehová nexata jumaitsi bajarapajiwibejejawabelia:
—Panejumetaemabeje, xua pacatsipaebijitsiatsibeje. Paxamëtuatuajëta itsa ponapona profetanë, xanë ta-itorobinë, bajaraponëjawabelia bemaitsinaebocuenia tsitanaitajëtabiabajë, tayapëtaeya-exanaenexa paliwaisi tsipaebijitsia itsamonaejawabelia tawënëta. 7 Itsiata baitsi jane, bajarapacuenia apo-exanaenë tajajiwitonë Moisés-jawabelia. Daxita tanetonacuenebiwituatuajëta, bajaraponë xaniawaetsia tanetonacuenebaponaponaenë itsamonaewecua. 8 Nexata, bajaraponëjawabelia xanë tajacuata naitabarataeya barëcuaicuaijainë tsabiabi jumenapebetsiaya. Bajarapacuenia nitabarataeya itsa nebarëcuaicuaijai tsabiabi, ¿depacuenia nexata paxamëbeje pacatoxanepanabeje panecuenebaracuaicuaijainexabeje pibisiacuenia tajajiwitonë Moisés? Apoxanepanae cajena bajaraxua —jai Jehová.
9 Nexata, Jehová bitso pebara-anaepanaexae bajarapajiwibejejawabelia, wecuapona pona baja, pajubo penayotsijawata. 10 Bajarapapajubo pewecuanayotatsijawata Dioso pijacarpabowecua, bajarapaepatota María lepratsabanaejawa perabëwënëcareca. Daxita perabëniopanareca. Nexata, Aarón itsa napënëyorota Maríajawabelia, tane pexainaejawa lepratsabanaejawa. 11 Nexata, Aarón jumaitsi pejuyapijinë Moisés-jawabelia:
—¡Tajatuxanenë, pane-itaxutotsoniataemabeje! Pëtsa panenaneconitsia-exanamebeje bajarapitsineconita. Paxanëbeje saya itsajawata panacuenecanaëjëtsinejewanëbeje pibisiacuene panatsi-exanajëbeje, apopatacayaiyataejamatabëcuenebeje. 12 Pexaniacuene cawajëtatsi, nematapijiwa necopatsiyaniwa peperabëniojaicuenia, pacuenia perabë-itsi petsabanaenacuetoyo, itsa naexana caematacabibeje petëpaecujinae pena pecototota —jai Aarón.
13 Nexata, ayaicuenia Moisés towajëta pematapijiwa yabara Jehovájawabelia. Jumaitsi:
—Pexaniacuenia cawajëtatsi, Diosomë, tanetojamatejemaya-exanaenexamë ajenaconoxae tamatapijiwa —jai.
14 Nexata, Jehová jumecanawiata Moisés-jawabelia:
—Bajarapowa paxa pecuene-itoyaxaetsi, itsa itabarasuabijitsipatsi, ¿apo-aura tsipae tsaja daxitajiwi pitabëta siete pamatacabibejecuenia? Jãjã, bajarapacuenia itsi tsipae. Pacuenia bajarapowa ca-uraba, abeje bitso. Nexata, bajarapowa pacapitsapaename panijataxunaebowecua, tsipaji raja bajarapowa naneconitsiaya-exanajë petsabanaejawata, peponaponaenexa bepenaxuirabiwacuenia taitabarata siete pamatacabibeje. Bajaraxuacujinae, itsa caewiana petsabanaejawa, icatsia caewëarena patsiana paneyajawajinawanapaenexa —jai Jehová.
15 Bajarapacuenia nexata, María capitsapatsi pijataxunaebowecua siete pamatacabibejecuenia. Nexata, daxita israelitawi bajarajota tsitecaeya jinawanapa warapaenejewa, icatsia pepatsijawabelia María. 16 Bajarapowa pepatsicujinae, bajarapamonae pitsapa Hazerot nacuawecua. Icatsia pata-othopa Parán nacuajawabelia.