Jehová rajutsiapaeba Israel-pijinë pemomoxijawabelia pewi pexaenexa
11
Itsamatacabi nexata, israelitamonae anaeya cuenecarapuaba Jehová, petaeponaexae pibisiacuene petocopiapataponaejawatsi. Nexata, Jehová pejumetaejawata bajarapamonae pejumaitsijawa, bitso anaepana bajarapamonaejawabelia. Nexata, isoto tsi-itoroba petajuenexatsi matatoyorotsia pijataxunaebonëjawa. Itsamonae pijinia pijabonë yatajuatsi. 2 Nexata, bajarapamonae wawajai Moisés-jawabelia, pewajëcaewi pejamatabëcueneyawenonaenexatsi. Moisés nexata towajëta Jehovájawabelia bajarapamonae yabara. Nexata, bajarapa-isotojawanë itacaëna baja. 3 Bajaraxuata, bajarapataxunae wënëruba Tabera,a tsipaji bajarajota Jehová pija-isoto tsi-itoroba anaeya pebaracuaicuaijaiwitsijawabelia, penajamatabëcuene-itajëtsinexa pianaepanaejawa bajarapamonaejawabelia.4 Israelitamonaetuatuajëta penanajetarubenaewi itsawiriawi, apoIsrael-pijinë pemomoxiyajuwënëwi, nexata bajarapamonae saya najamatabëxainabiaba ëpexaecuene. Belia israelitamonae-ata bajarapamonae najamatabëcuenejëpapona. Nexata, daxitabitsaëto siwajamatabëcuene-anaepanaeya ayaijumeta aëjaiya najuajumaitsi tsaponae:
—Jema xania apoxainaetsi ajenaconoxae pewi wajaxaenexa. ¿Jipatsa meta pewi wajanacarajutsi tsane? —najai tsaponae. 5 Nexata, najamatabëxainaeya najumaitsi tsaponae:
—¡Najamatabënapire papexaniapexaejawa xaewanapatsi Egipto nacuata! Bajarajota, xaeyabiabatsi dujuai amoneyacuenia, bajarapacuenia pepinobëanë, melón-bëanë,b bajarapacuenia cebollabëanë, ajobëanë, wayafopiji-ajobëanë-ata. Daxita bajarapapexaniajawanë xaewanapatsi picani bajarapanacuata. 6 Itsiata, saya majotaje ajenaconoxae wajani bitso. Belia baja yatëpaejitsiatsi wajani. Itsacuenejawa pematatsënëa apoxaetsi. Ajanijitsibitsi baja picani belia ëmanájawa —najuajai tsaponae daxita bajarapamonae ëmaná piajanijitsibixae.
7 Bajarapamanájawa jëpa pacuenia cilantroxutoxiwajëto. Bajarapamanápërëtoxi tsëcënaeya wayajai tsenae. 8-9 Merawi pijinia bajaraxuanë othopabiaba bajarapamonae pijacarpabonëmuxunenia, paepatota othopa donojawanë. Nexata, bajayacunua bajarapamonae nacayajatsiaya notabiaba bajarapamanájawaxi pexaenexa. Penotsicujinae, caquiatabiaba pebeno pejucaenexa. Bajarapabeno itsamonae setabiaba petsapato pexanaenexa. Itsamonae pijinia pan-cuenia exanabiaba, pesebinexa. Bajarapabeno pexaejawata bitso xaica. Baitsi nayapëtane pacuenia itsa xane olivocuaipiji-aceiterata pematajërëabijawa pexanaepan.
10 Daxita Israel-pijinë pemomoxi pijacarpabonë baupajawata aëaëjai tsanubenae, piajanijitsibixae pexaejawa manájawa. Bajaraxua yabara Jehová bitso anaepana ayaicuenia bajarapamonaejawabelia. Bajarapacuenia Moisés-ata apotsitaxanepanaetsi xua jumetane Israel-pijinë pemomoxi pejumaitsitsaponaejawa. 11 Nexata, Moisés Jehovájawabelia jumaitsi pewajëcaejawata:
—Xanë raja nijajiwitonënë tsaponaponae, nexata xanepana tane-itaxutotsoniataenexamë. Caranata tsaena, pibisiacuenia xanë nenaëcotame. ¿Detsa pitsijamatabëcuene xainame xanëjawaberena, tanecacopatsimë tacato-ewetsijawata bajarapa-ajamatabëbejewijawabelia? ¿Detsa xuajitsia nexata tajanitapetsimë bajarapamonae tamatacaponaenënexa? 12 ¿Xanë tsaja nexata netaneme be-axanë, be-ena-atanë tanecaitorobimë tamatacaponaenexa bajarapamonae asiwaya bepejewaxijiwiyocuenia panacuajawabelia najumecapanepaeya rajutsiapaebame bajarapamonae pijasalinaiwimijawabelia? 13 ¿Detsa nexata xanë werena topitsianajë pewi bajarapamonae tarajutsinexa pexaenexa? Tsipaji bajarapamonae aëaëjaiya nejumaitsi tsaponae: «¡Panerajure pataxaenexa pewi!», nejai tsaponae. 14 Xanë raja taja-epato aponecuenecaëjëpae tajamatabëcuenesaënexa bajarapamonae tanejamatabë-itonotsijawa. Nejamatabëcuenematatoxeneta cajena tacato-ewetsijawa bajarapamonae. 15 Nexata, itsa jitsipame orijibia bajarapacuenia tanetaejawamë, juya netoxanepana tanebeyaxuabijawamë caecuenia. Itsa pijinia pepacuene nitaxutotsoniataneme tane-asiwaxaemë, nexata apobenetocopatsimë mapitsijamatabëcuene tanetocopiapataponaenexa, tsipaji apo-ajamatabëcuenesaënë bajarapitsicuenejawalia —jai Moisés Jehovájawabelia pewajëtsijawata.
16 Nexata, Jehová jumecanawiatatsi mapacueniaje:
—¡Netocaetuare setenta ponëbeje ancianowi, israelitawi penamatacaitorobiyajuwënëwi, pamonae xamë yapëtaneme penajamatabëcueneyapëtaewi jiwi pewetsicuene! Nexata, bajarapamonae barëpatsianame tajacarpabo panaboyacaranatsipana baupajawaberena, panenubenaenexa. Bajarajota, panewajënae-ewetsianame. 17 Nexata, xanë bajarajota runaerecajë, tacabarëcuaicuaijainexa xamëjawabelia bajarapamonae pitabëta. Nexata, xanë rajutsianajë bajarapamonaejawabelia tacajamatabëcuenecaëjëpaeya-exanaeyajuwënëjawa taja-Espíritu Santota.c Nexata, pacuenia xamë xaniawaetsia ewetaponaponame israelitawi, Espíritu Santo pecajamatabëcuenecaëjëpaeya-exanaexae, bajarapijinia pacuenia bajarapasetenta ponëbeje xaniawaetsia barë-ewetsianame bajarapamonae Espíritu Santo pejamatabëcuenecaëjëpaeya-exanaexaetsi. Nexata, bajarapacuenia xamë caenëmë baja apo-ewetsimë tsane —jai Jehová Moisés-jawabelia peyawenonaewinexatsi yabara.
18 Bajaraxuacujinae, Jehová jumaitsi Moisés-jawabelia:
—Daxita bajarapamonae jumaitsimë tsane: «¡Pa-exanare Jehová wajanacatonajumecopatsicuenia bewajanacuenexuirabiwicuenia wajanacataeyaniwa!d ¡Panajamatabëcuenexaniawaerenua Jehovájawabelia pibisiacuene pane-exanaeyaniwa, tsipaji merawia pitsijawata paca-abatsijitsia pewi! Panajamatabëcuenexaniawaetsianame bajaraPonëjawabelia, tsipaji pacajumetane anaeya panejumaitsitsaponaejawa: ‘¿Jipatsa meta wajanacarajutsi tsane pewi wajaxaenexa? Bitso picani pexaniacuene cajena wajajinawanapaecuenemi Egipto nacuatalia,’ panejaitsaponaejawa. Jehová nexata nawitsia pacarajutsiana pewi panexaenexa. 19 Apopacarajutsi tsane saya caematacabipijipexaejawanexa, apo-anijamatacabibejenexa, apo-ëcincopamatacabibejenexa, bajarapacuenia apo-ëdiez-pamatacabibejenexa, bajarapacuenia-ata apo-ëveintepamatacabibejenexa. ¡Jume! 20 BajaraPonë pacarajutsiana pewi caejuametocuenia panexaewanapaenexa. Nawitsia panexaewanapaexae tsane, belia pacatsipumupitsapaena bajarapawi paneyacabijawata, pane-ajanijitsibicobexae. Belia, pa-ataejitsibimë tsane bajarapawi. Bajarapacuenia pa-itsimë tsane, tsipaji beweliajamatabëcuenia pataeyabiabame Jehová, panetuatuajëta peponaponaenë. Papecajumetaexaenua panecuenecarapuabijawa ya-itaxutuanueya bajaraponëjawabelia: ‘¿Detsa xuajitsia patajanecapitsapaemë Egipto nacuajawawerena?’ panejaitsaponaejawa», jamë tsane Israel-pijinë pemomoxijawabelia —jai Jehová Moisés-jawabelia.
21 Nexata, Moisés jumecanawiata Jehovájawabelia:
—Pamonaetuatuajëta najetarucajë, tabarëponaewi yajawanajetarucajë seiscientos mil ponëbeje ëpenawajabitsaëtsiwi, namata-ëjëtsinejewanë pejewaxi, petiriawi-ata. Itsiata, xamë nejumaitsimë mapabitsaëto yabaraje: «Rajutsianajë bajarapamonae pewi pexaewanapaenexa caejuametocuenia», nejamë picani. 22 ¿Detsa jota nexata nawita oveja, vaca-ata tabarëbenexa, tanetoyacaëjëpaenexatsi daxita bajarapamonae? ¿Xamë meta mitsacaetuatsianame daxita padujuai jinawanapa manuamenejawata, niabatsinexa bajarapamonae? Itsiata, apoyacaëjëpaetsi tsipae bajarapamonae, tsipaji bitso pinijibitsaëtoxaneto ayaicuenia —jai Moisés.
23 Itsiata baitsi jane, Jehová jumecanawiata mapacueniaje:
—¿Xamë netaneme bewelianëcuenia tacuenesaëjawa? Nexata, aeconoxae taename pacuenia cajumaitsitsi xua copiapatsijitsia tacajumaitsicowëya —jai Jehová.
Espíritu Santo jamatabëcuenecaëjëpaeya-exana itsamonae pewetsiwinexa
24 Moisés nexata pitsaparena Dioso pijacarpabowecua. Bajaraxuacujinae, tsipaeba Israel-pijinë pemomoxijawabelia pitorobicueniatsi Jehová. Nexata, caetuata setenta ponëbeje ancianowi, israelitawi pewetsiyajuwënëwi. Nexata, barëpata bajarapamonae Dioso pijacarpabo matatoyorotsia peyacaranatsijawapijibaupajawata penubenaenexa. 25 Nexata, Jehová jane baja, bajarapaepatota runaica piapiapajubota benaesiturutocuenia. Nexata, barëcuaicuaijaitsi Moisés. Xuacujinae jane baja, Moisés wecuapitatsi pejamatabëcuenecaëjëpaeya-exanaeyajuwënëjawatsi Jehová pija-Espíritu Santota. Nexata jane baja, rajuta bajarapajamatabëcuenecaëjëpaeya-exanaeyajuwënëjawatsi bajarapasetenta ponëbeje ancianowijawabelia. Nexata, bajarapamonae taxuxuaba jane baja pecuaicuaijaijawa Diosojumepaebiwicuenia Jehová pija-Espíritu Santo pecaëjëpaeya-exanaexaetsi. Bajaraxuacujinae, pematatsënëa apocuaicuaijai icatsia bajarapacuenia.
26 Bajarapacuenia-ata pijinia exanabeje anijanëbeje, israelitawi pijataxunaebotuatuajëta penacopatanucaenëbeje. Picani ponëbeje nawënëjutatsi penaponaenexabeje Dioso pijacarpabojawabelia, itsiata aponaponaebeje. Bajaraponëbeje-ata Diosojumepaebiwicuenia cuaicuaijai Jehová pija-Espíritu Santo pecaëjëpaeya-exanaexaetsi aponaponae-atabeje. Caenë pewënë Eldad. Itsanë pijinia pewënë Medad. 27 Bajaraxua itsa cuenetane pewëjëato, cujinaetabijirawa petsipaebinexa Moisés-jawabelia. Jumaitsi:
—Eldad-beje raja, Medad-beje cuaicuaijaibeje Diosojumepaebiwicuenia pijabojawata —jai Moisés-jawabelia.
28 Nexata, Josué, pexënato Nun, Moisés peyawenonaponaponaenëtsi pewëjëatojawaweliacujinae, Eldad, Medad-beje pecuenecopatsiyaniwa bajaraponë jumaitsi Moisés-jawabelia:
—¡Tajatuxanenë Moisés, bajarapajiwibeje jume-itawere bajarapacuenia pexanaeyaniwabeje! —jai.
29 Itsiata baitsi jane, Moisés jumecanawiata mapacueniaje:
—¿Xamë nexata bajaraxua netosiwabëjamë, xanë bewelia jiwi tanetaeyaniwa? Xanë biji tojitsipajë daxitajiwi Jehová pijajiwi pejumepaebiwi penaexanaenexa. Bajarapacuenia tojitsipajë daxitajiwi Jehová pejamatabëcuenecaëjëpaeya-exanaenexatsi Espíritu Santota —jai Josuéjawabelia.
30 Xuacujinae Moisés, ancianowi yajawa nawiata pijacarpaboxijawaberena israelitawi pijataxunaebojawabelia.
Dioso to-itorobatsi Israel-pijinë pemomoxi tsacanibitsaëtonë
31 Bajaraxuacujinae, Jehová copata pebubujainexa manuamenejawawerena, pecapatsinexa tsacanimonae ayaibitsaëtoxanetonë. Bajarapamonae othopa Israel-pijinë pemomoxi daxita pijataxunaebonëjawa pijacarpabonë-itapaya. Bajarapamonae pijataxunaebonë matatoyorotsia imoxoyo ya-othopa. Yacopianuca bajarapatsacani namuto peponaejawa caematacabicuenia. Itsa punanajetarubena, piaitayaëjawa bejamatabëcuijiru caemetrocuenia athëbëyo. 32 Nexata, bajarapamonae daxitamatacabijebi, daxitamerawijebi yajawa beyejebapona tsacanimonae anijamatacabibejecuenia. Pajiwiyo bewelia nota, bajarapajiwiyo pitapona diez pacaetuatsibitsaëtobeje penajumajebijawanë tsacanimonae, bejamatabë cincuenta pamapirebejecuenia pejejawanë. Nexata, bajarapamonae penotsiwi pijabonë pënëya ejebapona petsewinexa icotiata, penatoxaniawaetsinexa. 33 Nexata, bajarapamonae ajena itsa taxuxuaba pexaejawa bajarapawi, itsajota abaxë ucubaxaepona bajarapawi, bajarapaepatota Jehová bitso anaepana bajarapamonaejawabelia. Nexata, bajarapawi quijonenejewa, bajarapaepatota Jehová naneconitsia-exanaeya tocopatapona piawitanejawa petëpaenexa ayaibitsaëto. 34 Bajaraxuata, bajarapataxunaebo wënëruba Kibrot-hataavawënëyo, tsipaji bajarajota mëthëcatsi pamonae saya siwanajamatabëxaina ëpexaejawa.
35 Bajaraxuacujinae, israelitawi pitsapa Kibrot-hataavataxunaebowecua, pepatsinexa Hazerot nacuajawabelia. Bajarajota, icatsia pata-othopa cae-epatoyo pejinawanapaenexa.