Pacuenia jiwi naneconitanajetarubena piaurawijawabelia pibisiacuene pexanaexae
20
Icatsia, Jehová jumaitsi Moisés-jawabelia:2 —¡Marapacuenia jumaitsimëre israelitawijawabelia, bajarapamonae tanejumecowënëtabiabinexa: «Paxamë pa-israelitawiyajuwënëjiwiyomë itsa nacoxitajuitsiana jumapecataeya pexanaenë Moloc-wënënëjawabelia, bajarapajiwiyo pepacuene pabeyaxuabianame, panetseconaecuenia ibotonëta. Bajarapijinia pacuenia pa-exanaenamenua saicayanacuapijinëjawabelia, pajiwiyo paxamëtuatuajëta naponapona itsanacuawerena pepatsinë-ata. 3 Pajiwiyo nacoxitajuitsipa Moloc-jawabelia, bajarapajiwiyo pexanaecuene taniji betanetonaxuirabia-exanaejawa tajacarpabo. Bitso pibisiacuenia tanewënëquenetsiataecuenenua itajëta. Bajaraxuata, bajarapajiwiyojawabelia bara-anaepanaenajë tananeconitsia-exanaenexa, tawecuatsatsinexa Israel-pijinë pemomoxiwecua, saicaya peponaponaenexa, apotajajiwicuenia-ata tataenexa. 4-5 Orijibia, pajiwi yawajunuaxaina, apobepetaewicuenia penataenexa ponë penacoxitajuitsinë Moloc-jawabelia, bajarapamonae yajawananeconitsia-exanaenajë penacoxitajuitsinë apopenaneconitsia-exanaexae petëpaecuenia. Nexata, bajarapamonaenua wecuatsatsianajë Israel-pijinë pemomoxiwecua apotajajiwicuenia tataenexa daxita pijamonae yajawa. Baitsi, apopebeyaxuabixae bajarapamonae najamatabëcuene-itajëta caejamatabëcuene pexainaejawa penacoxitajuitsinëjawabelia, peyaiyataenexa Moloc xanëwecua», jamëre penacoxitajuitsiyaniwa israelitawi!
6 »Orijibia jumaitsimëre apotajitsipaecuene pexanaeyaniwa, pacuenia xanë Jehovánë bitso bara-anaepanaenajë pajiwi mapitsipibisiacuene exana: penatojaitsiwi itsanë peyanijobicuenia peyapëtaeya-exanaenexatsi itsacuenejawa pijacujirucuenia pe-ëjëbijawata,a bajarapijinia pacuenia malicaijawabelia peyanijobiwi, jiwijumapianëjawabelia peyanijobiwi-ata. Pamonae natojaitsiana pesiwanajamatabëcuenecopatsixae bajarapitsiwijawabelia peyawenonaenexatsi, xanë acuenetaejitsibinë. Bajaraxuata, naneconitsiaya wecuatsatsianajë Israel-pijinë pemomoxiwecua, apotajajiwicuenia tataenexa. 7 ¡Pëtsa panacofënëtame patajajiwicuenemë, panena-exanaeyaniwa bajarapitsipibisiacuene! ¡Biji rajane, panacuenexaniawaere pibisiacuene pane-exanaeyaniwa, aneconijibia panejinawanapaenexa taitabarata, tsipaji raja xanë Jehovánë panijaDioso ta-aneconijibinë tsaponaponae! 8 Nexata, xaniawaetsia bepanejumecowënëtawanapame patacatonajumecopatsiliwaisianë, tsipaji xanë Jehovánë patacawecuatsatsinë daxita pibisiacuene pane-exanaejawawecua, xaniawaetsia panejinawanapaenexa taitabarata», jamëre israelitawijawabelia! —jai Jehová.
9 »Orijibia jumaitsimë tsane: «Pajiwiyo bitso pibisiacueneta petëpaejanitsicuenia bijatane paxa, pena-ata, bajarapacuenia-ata apo-itaxutobejiobiatae peyawenonaeyaniwa, bajarapajiwiyo pabeyaxuabianame. Bajarapacuenia pexanaexae paxajawabelia, penajawabelia-ata pijacuata naneconita petëpaenexa.
10 »Bajarapacuenia ponë toquenetsiatane itsanë pijawa, bajaraponë pabeyaxuabianamebeje petiriwa-ata yajawa.
11 »Ponë tobarëmajita paxa pijawa, bajaraponë apoyaiyatae paxa. Nexata, bajaraponë pabeyaxuabianame pebarëmajitsiwa yajawa. Bajarapajiwibeje bajarapacuenia pexanaexae pijacuata naneconita petëpaenexa.
12 »Ponë quenetsiatane pecopenawayo, pexënato pijawa, bajarapajiwibeje panajuabeyaxuabianame. Bajarapacuenia bitso piacujirubejecuene bajarapajiwibeje pexanaexae, nexata pijacuata naneconita petëpaenexa.
13 »Ponë pewënapebijiwijawabeliab pewitota pibisiacuene exanaena, bajaraponëbeje panajuabeyaxuabianame, tsipaji bitso Jehová pepopitoyacuene exanabeje. Bajarapacuenia pexanaexaebeje bajaraponëbeje, pijacuata naneconitabeje petëpaenexa.
14 »Ponë pita petiriwa pijawanexa, itsa yajawapita penanua, bitso exana piabejecuene. Nexata, bajarapamonae isotota panetajuitsicuenia pawerebiabianame, bajarapacuene pane-ajibia-exanaenexa paxamëtuatuajëta bajarapitsipibisiacuene.
15-16 »Papebi, papetiriwa-ata, pewitota pibisiacuene exanaejitsipa dajubinëjawabelia, unupijinëjawabelia-ata, daxita saya bajarapamonae panajuabeyaxuabianame. Bajarapamonae bajarapacuenia pexanaexae, pijacuata naneconita petëpaenexa.
17 »Ponë pitsipa pijawanexa pejuyapijiwa, itsa jume, pematapijiwa-ata, powa paxa pexënatoyo, itsa jume, itsa pena pexënatoyo, bajarapajiwibeje panawecuacapitsapaeya-exanaename daxitajiwi pitabarata, saicayajawabelia peponaponaenexabeje Israel papemomoximëwecua, apotajajiwibejecuenia panetaenexa. Bajarapacuenia pato-exanaenamebeje bitso pibisiacuene pexanaexaebeje. Bajarapajiwibeje nacaemonaejiwi-atabeje penaperabëquenetsiataexaebeje, bitso pia-uracuene exanabeje.
18 »Ponë quenetsiataena petiriwa penaboxonabaponaponaejawata, pamatacabibeje abaxë janabatsi, bajarapajiwibeje panajuacapitsapaeya-exanaename saicayajawabelia peponaponaenexabeje Israel papemomoximëwecua, apotajajiwibejecuenia panetaenexa.
19 »Ponë quenetsiataejitsipa pame, paxa pematapijiwa, pejuyapijiwa-ata, bajarapacuenia penawa-ata, pena pematapijiwi-ata, pejuyapijiwa-ata, bajaraponë pewitota pibisiacuene exana imoxoyo pijamonaewajawabelia. Nexata, bajarapajiwiyobeje pananeconitsia-exanaename imoxoyo napijamonaejiwibeje penaquenetsiataejamatabëcuenebeje.
20 »Ponë tobarëmajitsipa paxuanë pijawa, bajarapacuenia paxuyo pijawa-ata, najamatabëcuene-itajëta apopeyaiyataejawa pijamonaenëbeje. Bajarapajiwibeje pexanaeneconi nexata tsijumajopaenatsibeje. Jehová tocopatsiana bajarapajiwibeje apopexainaenexabeje pexi, mawecojiwibejecuenia penacopatsinexabeje petëpaejawabelia, pijawiriamaëto petocopiarucaenexatsibeje.
21 »Ponë pitsipa pematapijinë pijawa, itsa jume, pejuyapijinë pijawa bajaraponë abaxë piasaëtsaponaponaejawata, bajaraponë bitso apopeyaiyataenë pijamonaenë. Bajarapajiwibeje penapitsixaebeje, bitso pibisiacuene exanabeje. Jehová tocopatsiana apopexainaenexabeje pexi, mawecojiwibejecuenia peponaponaenexabeje. 22-26 […]
27 »Papebi, papetiriwa-ata, pijacujirucuenia jiwijumapianëjawabelia, itsa jume, itsawiriajumapianëjawabelia-ata, yanijobiaya ëjëba peyapëtaenexa xua copiapatsijitsia, bajarapamonae pabeyaxuabianame ibotonëta panetseconaejawata. Bajarapitsicuene pexanaexae bajarapamonae pijacuata naneconita petëpaenexa», jamë tsane israelitawijawabelia —jai Jehová Moisés-jawabelia.
C21-C23 […]