Pitsicuenejawanë tsitatsi Dioso bitso pibisiacuene jiwi pexanaejawa
—¡Pamatacabi paxamë pajonename panacuayabelia Jehová Dioso pacarajutsiapaeba, pëtsa panacuenejëpame bajarapanacuapijiwi pitsipibisiacuene exanawanapa, tsipaji Dioso bajaraxua bitso tsitapibisiacuenetsi! 10 ¡Pëtsa caejiwi-ata panexijiwi paxamëyajuwënëwi panicabia-exanaename isototuatuajëalia! ¡Pëtsa panexijiwi patajuitame jumapecataenëjawabelia, papecayawenonaenexa panewajëtsicuenia! ¡Bajarapacuenia pëtsa caejiwi-ata nanaexana petsiyapëtaewi peyapëtaeya-exanaenënexa pijacujirucuenia pe-ëjëbijawata xua copiapatabiabijitsia! ¡Bajarapacuenia pëtsa nanaexana caejiwi-ata wajitaenënexa, jiwi pitoyanë pematacaetsinënexa, pecaxueyatsinënexa-ata!a ¡Pëtsa pajumexaniataneme bolecuene! 11 ¡Bajarapacuenia pëtsa nanaexana caejiwi-ata pematawajibinënexa, penajorobinënexa-ata, bajarapacuenia peyathicarunaenënexa, itsa jume, itsawiriajumapianëjawabelia-ata peyanijobabiabinënexa! 12 ¡Bajarapitsicuene pëtsa pana-exaname, tsipaji raja Jehová Dioso bajaraxua bitso pepopitoyacuene! Pajiwi exanaena bajaraxua naneconitsiana Jehová Diosojawabelia. Bajaraxuata, Jehová Dioso capitsapaejitsia pamonae picani jinawanapa bajarapanacuata, papecarajutsinacuajawatanexa. Jehová Dioso wecuapita bajarapa-irami, petsita-abejexaetsi bajarapamonae pecuene. 13 Paxamë juya bajarapitsicuene apopa-exanaemë tsane. Bepajinawanapame xaniawaetsia aneconijibia Jehová Dioso pitabarata. 14 Pamonae jinawanapa maparucaeje panacua pacarajutsiapaeba Jehová Dioso, bajarapamonae jumecowënëtabiaba pe-ëjëbiwi petsipaebiliwaisitsi petocopiapatsijawanexatsi yabara. Tsitaxaniajaitsi tsabiabi bajarapaliwaisi. Itsiata baitsi jane, paxamë apobepajumecowënëtsimë bajarapaliwaisianë, tsipaji Jehová Dioso paca-itaweta bajarapitsicuenejawa pane-exanaeyaniwa —jai Moisés.
Dioso itorobiapaeba itsaprofetanë, Moisés pecuenejëpaenë
15 Icatsia, Moisés jumaitsi Israel-pijinë pemomoxijawabelia:
—Itsamatacabijawabelia Jehová Dioso pacatonutsiana paxamëtuatuajëta Diosojumepaebinënexa paxamëyajuwënënë. Pacuenia xanë cuene-itsinë, bajarapecuene-itsinë tsane. Nexata, paxamë bajaraponë pajumecowënëtabiabianame. 16 Xua paxamë pawajëcame imata Jehová panijaDiosojawabelia papecarajutsinexa pamatacabi panacaetuatame Horeb-tsutojawatalia, pajumaitsimë mapacueniaje: «Apopajitsipaenë matawëjëa Jehová Dioso patajumetaejawa pecuaicuaijaijawa. Apopajitsipaenënua patataejawa matawëjëa petajuecotia. Matawëjëa, icatsia itsa pataejitsipajë bajaraxuanë, patëpaejitsipajë», pajamë Jehová Diosojawabelia. 17 Nexata, bajarajotalia Jehová nejumaitsi: «Xanepana bajarapamonae xua nejumaitsi. 18 Xanë nexata bajarapamonaejawabelia to-itorobianajë itsanë tanejumepaebinë, xamë pecacuenejëpaenë.b Bajarapamonaejawawerena bajaraponë naitajëtsiana. Bajaraponë-ata tanejumeliwaisipaebinënexa pacuenia tonajumecopatajë petsipaebinënexa tajajiwijawabelia. Daxitaxua tonajumecopatsianajë, tajumaitsicowëya pepaebinënexa. 19 Nexata, daxita pamonae apojumecowënëtsi tsane paliwaisi tsipaebaponaena tawënëta. Nexata, bajarapajiwi xanë naneconitsia-exanaenajë. 20 Itsiata baitsi, paDiosojumepaebinë paebaponaponaena itsaliwaisi xanë tawënëta, beta-itorobicuenia itajara, nexata xanë bajaraponë-ata naneconitsia-exanaenajë. Bajarapijinia pacuenia ponë petsipaebaponaponaenë pecopiapatsijawanexa itsadiosowi pewënëta xanëwecua, bajaraponë-ata naneconitsia-exanaenajë. Bajarapamonae penaneconitsixae tsane xanëjawaberena, pacatocopatsianatsi panebeyaxuabinexa. 21 Itsiata, paxamë belia pajamatabë-itsimë tsipae mapacueniaje: ‘¿Detsa pacuenia meta waxaitsi yapëtaejitsipatsi paliwaisi pepitsapaeliwaisi Jehovájawawerena, wajajumecowënëtsinexa pexaniajailiwaisi?’ pajamatabëjamë meta tsipae. Itsiata baitsi jane, bepaxainawanapame panejamatabëcueneta mapacueneje. 22 Ponë paeba xanë Jehovánë tawënëta, panayajiwicuenetaename pexaniajaicuene. Nexata, xua wajunupaeba pecopiapatsijawanexa, itsa apocopiapatsi pejumaitsicowëya, nexata bajaraxua apotanajumecopatsiliwaisi Jehovánë bajaraponëjawabelia. Nexata, bajarapaprofetanë saya cuaicuaijai tsaponaponae tsane pejamatabëcueneliwaisi, be-ayaijamatabëcuenenë penataexae. ¡Itsiata baitsi jane, pëtsa pajunawame bajaraponë papecatsipaebiliwaisita pejamatabëcuene!», nejai Jehová —jai Moisés Israel-pijinë pemomoxijawabelia.
C19—C33 […]