Pacuenia jiwi na-urataejitsia nacaemonae, penaquenetsiataeyaniwa, penapitsiyaniwanua
18
Jehová itsaliwaisianë juya tonajumecopata Moisés petsipaebinexa Israel-pijinë pemomoxijawabelia. Nexata jumaitsi:2 —Mapacueniaje jumaitsi Israel papemomoximëjawabelia: «Xanë raja Jehová panijaDiosonë. 3 ¡PanijaDiosoxaenë pëtsa nexata pacuenejëpame Egipto nacuapijiwi pexanaecuenejawanëmi panejinawanapaenacuamijawata! ¡Bajarapijinia pacuenia pëtsa pacuenejëpame Canaán nacuapijiwi, panacuajawabelia pacamatacaponatsi panejinawanapaenacuatanexa! ¡Pëtsa bajarapamonae pexanaecuene pacuenejëpame! ¡Pëtsa pajumecowënëtamenua bajarapamonae pitorobiliwaisianëjawalia, bajarapacuenia panena-ewetsinexa patacatonajumecopatsiliwaisianëwecua! 4 ¡Biji rajane, xaniawaetsia panejumecowënëre patacatonajumecopatsiliwaisinë! Pa-exanawanapaenamenua patacatocaëjëtsicuenia. Bajarapacuenia bepa-exanawanapame, tsipaji xanë raja Jehová panijaDiosonë. 5 ¡Nexata, pajumecowënëre patacatonajumecopatsiliwaisianë, patacatocaëjëtsicuenia pane-exanawanapaenexa, tsipaji pajiwi jumecowënëtaponaponaena bajaraxuanë asaë tsaponaponae tsane! Xanë raja Jehovánë.
6 ¡»Bajaraxuata, pëtsa paxamëyajuwënënë quenetsiatane bitso imoxoyo pijamonaewa! Xanë Jehovánë paca-itawetatsi. 7 ¡Pëtsanua itsajiwi-ata nacuene-itajëta paxa apopeyaiyataejawa,a pena pequenetsiataejawata! Penaxae, apobe-exanae bajarapacuenia. 8 ¡Bajarapacuenianua pëtsa quenetsiatane penawa! Paxa pijawaxae apobetoquenetsiatae, bajarapacuenia apopeyaiyataejawatsi penacuene-itajëtsiyaniwa.
9 »¡Pëtsa paxamëyajuwënënë quenetsiatane pematapijiwa, pejuyapijiwa-ata, tsipaji bajarapowa pepopijamonaewa! ¡Bajarapacuenia pëtsa exana caepaxa apo-exanae-ata, caepena apo-exanae-atabeje, tsipaji tsiteca pepopijamonaewa! Bajarapacuenia pebi pexi pexainaenë itsa pita petiriwa pijinia pexi pexainaewa, nexata apobequenetsiatae penawa pexënatoyo, naexanae-ata tsipae saicayajawabelia bajaraponë peponaponaenacuawecua.
10 »¡Pëtsa paxamëyajuwënënë quenetsiatane pemomoyo, pexënatota powa penaitajëtsiwa, powa-ata naitajëta pexënatoyota! Bajarapacuenia itsa exanaejitsipa, bitso acuene-ura tsipae daxitajiwi pitabarata, pepopiauracuene pexanaexae pemomoyojawabelia.
11 »¡Pëtsa paxamëyajuwënënë quenetsiatane paxa pexënatoyo, powayo xaina penawajawabelia, tsipaji bajaraponënexa bajarapowayo pematapijiwa, itsa jume, pejuyapijiwa!
12 »¡Pëtsanua paxamëyajuwënënë quenetsiatane pame, powa paxa pematapijiwa, pejuyapijiwa-ata, tsipaji bajarapowa paxa pijamonaewa imoxoyo! 13 ¡Bajarapacuenianua pëtsa quenetsiatane penawa, powa pena pematapijiwa, pejuyapijiwa-ata, tsipaji pena pijamonaewa imoxoyo! 14 ¡Bajarapacuenia pëtsa quenetsiatane paxuanë pijawa, paxa pijamonaenë pijawa, tsipaji bajarapowa penawa!
15 »¡Pëtsa paxamëyajuwënënë quenetsiatane pecopenayo, tsipaji raja bajarapowa pexënato pijawa!
16 »¡Pëtsanua quenetsiatane pematapijinë pijawa, bajarapacuenia pejuyapijinë pijawa-ata! Pijamonaenë pijawaxae apobetoquenetsiatae bajarapacuenia pe-urabinexa.
17 »¡Paxamëyajuwënënë pepitsiwa pëtsa coxiquenetsiatane, pepitsiwa pemomoyo-ata! ¡Bajarapacuenia pëtsa pita pexënatota penaitajëtsiwa, itsa jume, pexënatoyota-ata penaitajëtsiwa! Bajarapowa pepitsixae, nexata bajarapowa pexi, pemomoxi-ata bitso imoxoyo pijamonae bajaraponë. Itsa aponajipanabi tsipae bitso piabejecuene exanaejitsipa bajaraponë.
18 »¡Itsa pitame petiriwa nijawanexa, pëtsa yajawapitame bajarapowa pejuyapijiwa, pematapijiwa-ata! Matapania itsa cawecuatëpaejitsipa nijawa, catoxanepanaejitsipa nepitsinexa nijawami pijamonaewa.
19 »Pebi apobequenetsiatae papetiriwa naboxonabaponapona, pamatacabibeje abaxë janabaponaponatsi, tsipaji bajarapowa bepenaxuirabiwacuenia ponapona taitabarata.
20 ¡Pëtsa quenetsiataneme itsanë pijawa! Bajarapacuenia itsa exanaejitsipame benenaxuirabinëcueniab taitabarata nacopatsipame.
21 »¡Pëtsa paxamëyajuwënënë coxitajuita jumapecataeya pexanaenë Moloc-wënënëjawabelia, peyawenonaenexatsi pewajëtsicuenia! Bajarapacuenia pexanaejawata, najamatabëcuene-itajëta tanewënëquenetsiataejawa panijaDiosonënë jiwi pitabarata. Xanë raja Jehovánë.
22 »¡Pëtsa pebijiwi pewënapebijawabelia pewitota pibisiacuene exana! Bajarapitsicuene bitso pepota-itoyacuene. 23 ¡Bajarapacuenia pëtsa pebijiwi, petiriawi-ata pewitota pibisiacuene exana dajubinëjawabelia, unupijinëjawabelia-ata! Bajarapacuenia itsa exana, Jehovánë taitabarata acuenebeje bitso.
24 »¡Pëtsa bajarapitsipibisiacuenejawanë pa-exaname bepanenaxuirabiwicuenia panenacopatsiyaniwa taitabarata! Bajarapitsipibisiacuene pexanawanapaexae pamonae jinawanapa maparucaeje patacarajutsinacuatanexa, bajarapitsicuene tacuene-itoyaxae, bepenaxuirabiwicuenia jinawanapa taitabarata, pijanacua-ata bepiaxuiranacua naexana. Bajaraxuata, jutsianajë bajarapamonae bajarapanacuawecua, pijanacuami juya patacarajutsinexa. 25-26 […] 27 Daxita bajarapitsicuenejawanë exanawanapa Canaán nacuapijiwi, pamonae pacatsiwajënaejinawanapa bajarapanacuata. Nexata, bajarapanacua netsita piaxuiranacua. 28 […] 29 Paxamëyajuwënënë bajarapitsicuene itsa exana, bajaraponë panawecuacapitsapaeya-exanaename Israel papemomoximëwecua, saicayajawabelia apotajajiwiyajuwënënëcuenia-ata panetaenexa», jamë tsane —jai Jehová Moisés-jawabelia israelitawi yabara. 30 […]
C19 […]