Aarón, pexi yajawa, matapania taxuxuaba sacerdotewicuenia penacuenebawanapaenexa
9
Ocho pamatacabibejecujinae, Aarón, pexi yajawa, sacerdotewi penaexanaecujinae, Moisés junata Aarón, pexi yajawa, ancianomonae, Israel-pijinë pemomoxiyajuwënëwi pewetsiwi-ata, penubenaenexa bajaraponë pitabarata. 2 Nexata, Moisés jumaitsi Aarón-jawabelia:—¡Pire becerro pebito, daxitanë peperabëxanepanaenë, nebeyaxuabinexa xamë nijaneconi yabara! Bajarapijinia pacuenia pitsianame pejananë oveja pebito, daxitanë peperabëxanepanaenë, netajuitsinexa Jehovájawabelia. Nexata, bajaraponëbeje daxitanëbeje tajuitsianame altar-jumata Jehová pitabarata. 3 Bajaraxua nexanaecujinae, nexata israelitamonaejawabelia itorobianame bajarapamonae pijinia pecapatsinexa chivo pebito, pexanianë, netotajuitsinexa pejamatabëcuenecaewia-exanaenexa Jehová bajarapamonae pijaneconimi. Bajarapacuenia capatsiananua becerro pebito, bajarapacuenia oveja pejananë pebito, caewai pexainaenëbeje, daxita peperabëxanepanaenëbeje, bajaraponëbeje netotajuitsinexa daxitanë altar-jumata. 4 Bajarapacuenia itorobianame pecapatsinexa itsanë vaca pebito, oveja pebito yajawa, bajaraponëbeje netotajuitsinexa Jehovájawabelia, penajamatabëcuene-itajëtsinexa caejamatabëcuene penajuaxainaexae namata-enetsia, pesiwajamatabëcuenecaewixaetsi pijaneconimi. Capatsiananua trigobeno pematajërëabijawa aceiterata, bajaraxua netotajuitsinexanua ofrendacuenia altar-jumata. Bajarapacuenia pa-exanaename, tsipaji raja Jehová nacatsitanaitajëtsiana ajena —jai Moisés, Aarón-jawabelia.
5 Jejai nexata israelitamonae. Nexata, capona Jehová pijacarpabojawabelia, daxita bajarapacuenia Moisés, Aarón-beje, pexanaenexa. Nexata, daxita bajarapamonae israelitawi pata Jehová pijacarpabo imoxoyojawata, bajarajotalia penubenaenexa Jehová pitabarata. 6 Nexata, Moisés jumaitsi bajarapamonaejawabelia:
—Jehová raja naca-itoroba waja-exanaenexa maxuaje. ¡Nexata, wajanaca-itorobicuenia pa-exanare! Bajarapacuenia itsa pa-exanaename, nexata Jehová pacatsitanaitajëtsiana paxamë pijapeniweniwenaecotia yajawa —jai Moisés.
7 Bajaraxuacujinae, Moisés jumaitsi Aarón-jawabelia:
—Cujiremena baja altar-jawaberena. Bajarajane tajuitsianame Jehová pewënëta pabecerro pebito capatame nijaneconi yabara. Bajaraxuacujinae, tajuitsianame pachivo capatame daxitanë netajuitsinexa Jehovájawabelia. Bajaraxuacujinae jane baja, totajuitsianame padajubi israelitamonae capata pijaneconi yabara, padajubinua capata petajuitsinexa daxitanë. Daxita bajarapacuenia exanaename Jehová wajanacatonajumecopatsicuenia —jai Moisés.
8 Nexata, Aarón jejai. Cujilia altar-jawabelia pebeyaxuabinexa dajubi. Nexata, becerro pebito wësinepecaucutsiaya natobeyaxuaba pijaneconi yabara. 9 Bajarapaepatota pijinia, Aarón pexi capona paxajawabelia bajarapabecerro pejana. Nexata, Aarón pecobesitota tsauta bajarapajanata daxita altar-jawa pemata-etobejecuenia pexanaejawanë. Xuacujinae, penacopatsijana waxiyota, bajaraponë daxita epabajaraba bajarapa-altar-jawa petabujawata. 10 Bajaraxuacujinae, ponë beyaxuaba petajuitsinënexa pijaneconi yabara, bajaraponëjawanë tajuita altar-jumawereca penasitsijawanë, bajarapacuenia pemara-ëthëtobeje penasitsijawanë yajawa, bajarapacuenia epatuajapato penasitsijawanë yajawa. Pacuenia baja Jehová itoroba Moisés pexanaenexa becerrojawabelia, bajarapacuenia exana. 11 Itsiata baitsi jane, pewi, pebocoto-ata tajuita israelitawi pijataxunaebowecua wayafuabelia tajëyojawabelia.
12 Bajaraxuacujinae, Aarón wësinepecaucutsiaya beyaxuaba pa-ovejayo capata petajuitsinexa daxitanëyo altar-jumawereca. Aarón pijinia pexi tocaponatsi pejana, bajarapajanata altar-jumawereca petsicabinexa, bajarapacuenia daxitayenepanabeje yajawa. 13 Bajaraxuacujinae, bajarapathabiwimi tocapataponatsi caejawa canacujitsia pematabocoto yajawa. Nexata, xuacujinae tajuita bajarapadajubiwijawami Jehovájawabelia altar-jumawereca Jehová pitorobicowëyatsi. 14 Bajaraxuacujinae, piënëjawanë, petopajawabeje, pemaxëbeje-ata pequiatsicujinae, nexata bajaraxuanë-ata tajuita altar-jumata, pacuenia tajuitabiaba daxitanë.
Aarón totajuita padajubi israelitawi capata petotajuitsinexatsi
15 Bajaraxuacujinae, Aarón totajuita chivo pebito Jehovájawabelia, pejamatabëcuenecaewia-exanaenexa daxita israelitawi pijaneconimi. Bajarapacuenia pexanaenexa, bajaraponë pita pachivo capata israelitawi pijaneconi yabara, bajarapamonae petotajuitsinexatsi. Nexata, bajaraponë wësinepecaucutsiaya beyaxuaba. Bajaraxuacujinae, totajuita israelitawi pijaneconimi pejamatabëcuenecaewia-exanaenexa Jehová. Pacuenia nato-exana copiayapijidajubinëjawabelia, bajarapacuenia-ata exana. 16 Bajaraxuacujinae, totajuita daxitanëbejea altar-jumawereca, pabecerro, pa-oveja-ata israelitawi capata bajaraxuanexa. Jehová petonajumecopatsicuenia, bajarapacuenia exana. 17 Bajaraxuacujinae, Aarón pita trigobeno aceiterata pematajërëabijawa, ofrendacuenia petotajuitsinexa altar-jawata. Pita bajarapatrigoyajuwënëjawa caecobejapatocuenia peyajawatajuitsinexa dajubi.b Bajaraponëbeje tajuita pematatsënëa pa-ovejabeje batajuitabiaba daxitanëbeje caebajayacunua canacujitsia, caecaniwiyo canacujitsianua.
18 Nexata, Aarón wësinepecaucutsiaya beyaxuaba vaca pebito, bajarapacuenia oveja pebito, ponëbeje israelitamonae capata petotajuitsinexatsi Jehovájawabelia, caejamatabëcuene penajuaxainaexae namata-enetsia, pesiwajamatabëcuenecaewixaetsi pijaneconimi. Nexata, Aarón pexi tocaliatsi bajarapadajubijana altar-jumawereca, daxitayenepanabeje petsicabinexa bajarapajanata. 19 Bajarapacuenia-ata tocaliatsi toronasitsijawanë, ovejanasitsijawanë-ata; panasitsijawanë xaina pebosotojawata, bajarapacuenia piënëpijijawa, pemara-ëthëtobeje yajawa, bajarapacuenia epatuajapato penasitsijawa yajawa. 20-21 Nexata, bajarapanasitsijawanë yajawajeba ovejabeje, vacabeje pemipabëbejejumata. Bajaraxuacujinae, Aarón totajuita bajarapanasitsijawanë altar-jumata. Itsiata, pemipabëjawabeje apotajuitsi. Bajaraxua pecujuatopabeje-ata, yobajarabiaya athëbëabetsia rajuta Jehovájawabelia, pacuenia Jehová baja tonajumecopatatsic pexanaenexa Moisés. 22 Nexata, Aarón namaxëyotabeje athëbëabetsia, israelitamonae pematatsënëwajëtsinexa, pexaniacuenia pecuene-itajëtsinexa Jehová pewënëta petowajëtsijawata. Bajaraxua exana petotajuitsicujinae chivo Israel-pijinë pemomoxi Jehová pejamatabëcuenecaewia-exanaenexa pijaneconimi, bajarapacuenia padajubibeje totajuita daxitanëbeje, bajarapacuenia padajubibeje totajuita penasitsijawanë caejamatabëcuene penajuaxainaexae namata-enetsia pesiwajamatabëcuenecaewixaetsi pijaneconimi. Daxita bajaraxua pexanaecujinae, Aarón namaxëyotsiaya matatsënëwajëta Israel-pijinë pemomoxi Jehová pexaniacuenia peyawenonaenexatsi. Xuacujinae baja, altar-jawa wecuanatixita. 23 Bajaraxuacujinae, Moisés, Aarón-beje junuabeje Jehová pijacarpabo-ënëabelia. Nexata, bajaraponëbeje pepitsapaecujinaerena bajarapabowecua, Aarón-beje tsiwajënaecuenewajunupaeba Jehová pexaniacuenia peyawenonaejawanexatsi israelitawi. Nexata, bajarapaepatota Jehová jane baja naitajëta pijapeniweniwenaecotia yajawa daxita bajarapamonae pitabarata. 24 Nexata, Jehová pijaniweniwenaecotiajawawetsica, copatsica isoto pejopaenexatsica altar-jumabetsica. Nexata, padajubiwi, penasitsijawanë yajawa, abaxë bobena altar-jumata tajuitsinejewa, daxita bajaraxuanëmi weriajawa bajarapa-isotota. Nexata, bajarapacuene itsa tane israelitawi, ayaijumeta cuenewënëxaniata Jehová pinijicuene pexanaenëcuene yabara, pebarëyajamatabëcuenejawata. Bajarapamonae irataeya bobenajunua yaiyataeya Jehová pitabarata.