Moisés itapeta Aarón, pexi yajawa sacerdotewinexa
8
Jehová jumaitsi Moisés-jawabelia:2 —¡Junare Aarón, pexi pebijiwi-ata, neyajawapatsinexa tajacarpabo peyacaranatsipana baupa imoxoyojawata! ¡Bajarapacuenia caparenua sacerdotewi penaxatabijawanë, aceitera petsimata-epanaeranexa ta-itapetsicuene pitajëtsijawanexa, bajarapacuenianua pabecerro tajuitsijitsiamë bajarapamonae pijaneconi yabara, anijanëbeje oveja pebito, bajarapacuenia-ata peya-etsi-aba levadurata matajërëabinejewa pexanaepan-jawanë! 3 Netocaetuatsianamenua daxita Israel-pijinë pemomoxi tajacarpabo peyacaranatsipanapijibaupa imoxoyojawata —jai Jehová.
4 Moisés nexata exana pacuenia Jehová itorobatsi. Bajaraponë nacaetuatsia-exana daxita Israel-pijinë pemomoxi Jehová pijacarpabopanabo peyacaranatsijawapijibaupa imoxoyojawata.
5 Daxita penacaetuatsicujinae, Moisés jumaitsi bajarapamonaejawabelia:
—Marapacuenia naca-itoroba Jehová waja-exanaenexaje —jai. 6 Nexata, junata Aarón, pexi yajawa, penubenaenexa daxitajiwi pitabarata. Bajaraxuacujinae, bajaraponë nawaeya-exana bajarapamonae merata. 7 Bajaraxuacujinae, jumaxatata pematapijinë Aarón, sacerdotewi pepopenamatacaitorobinë penaxatatsijawa. Copiaya jumaxatata túnicanawa. Xuacujinae, epacëta pecuepana becorreacuenia, bitso pexaniacuenia pecuejawa. Jumaxatatanua mantonawa, bajarapacuenia naniawelia pijinia penajumaxuabicorobë, efod-wënëjawa. Bajarapanajumaxuabicorobë xaniawaetsia ya-epacëta petsiwajënaerutsimaëtoxita. 8 Xuacujinae, penajumaxuabicorobë naniawelia nawëcapata penatsimipabërutsipana. Bajarapapanata jia Urim, Tumim-beje petsi-exanaedoroyota. 9 Bajaraxuacujinae jane baja, Moisés mataxatata Aarón, sacerdotewi pepopenamatacaitorobinë, penamataxatatsijawa. Xuacujinae, tsi-itaparuta oronanitota pexanaepanayo, itsajota yaquinaruta, «Jehová pitapetsinëtsi», pejai-itaneto. Daxita pacuenia Jehová tonajumecopatatsi pejumaxatatsinexa pematapijinë, bajarapacuenia Moisés exana.
10 Bajarapacuenia pexanaecujinae jane baja, Moisés Jehová pijacarpabo ënëtsicaba petuxujuwi-aceiterata, pa-aceitera tsiwajënae-exana petsimata-epacaenexa Jehová pitapetsiwi. Tsicabanua Jehová pijajawanënexa daxitaxua nubena bajarapacarpabo-ënëta. 11 Xaniawaetsia pitajëtsinexa saicaya Jehová pijajawanexa, tsicabanua siete xuabeje dajubi petajuitabiabi-altar-nexa, daxita pecanacuenebijawanënexa bajarapa-altar-jawata, bajarapacuenianua penacobequiatsiwaxixaneto palanganawënëjawa petsiwajënae-exanetsitabu yajawa. 12 Bajarapacuenia tsimata-epananua Aarón, pitajëtsinexa Jehová pitapetsinëtsicuene. 13 Bajaraxuacujinae baja, Moisés junata Aarón pexi pecujibinexatsirena. Nexata, bajaraponë xataba bajarapamonae-ata sacerdotewi penaxatabijawanë. Jumaxataba sacerdotewi pijatúnicanawanë. Bajarapacuenia becorreacuenia epacëbanua pecuepanaxi. Mataxatabanua sacerdotewi penamataxatatsijawanë. Daxita pacuenia Jehová tonajumecopatatsi, bajarapacuenia exana.
14 Bajaraxuacujinae, Moisés capatsia-exana becerro pebito, ponë totajuitsijitsia sacerdotewi pijaneconi yabara. Nexata, Aarón, pexi yajawa, becerro pebito matabocotojumawereca nacobebuatanubena. 15 Nexata, sacerdotewi pijaneconi Jehová pesiwajamatabëcuenecaewinexatsi, Moisés tobeyaxuaba becerro pebito cuaibosicaucutsiaya. Bajarapabecerro pejanayajuwënëjawa pita pecobesitota petsautsinexa pemata-etocuenia pexananutsijawa altar-upijawata, petsicabinexanua matatoyorotsia altar-juma. Bajarapacuenia exana pewecua-ajibia-exanaenexa bepenaxuirabijawamia Jehová pitabarata, pitajëtsinexanua petotsatsijawa ëJehová pijajawanexa. 16 Nexata, xuacujinae totajuita altar-jumata Jehovájawabelia becerro-ënënasitsijawanë, epatuajapato, pemara-ëthëtobeje yajawa. 17 Bajaraxuacujinae, daxitawimi, peboco, petasi-ata tajuita pijataxunaebo pënëyabelia. Daxita pacuenia Jehová tonajumecopatatsi, bajarapacuenia exana.
18 Bajaraxuacujinae, icatsia Moisés capatsia-exana pa-oveja pebito totajuitsijitsia daxitanë altar-jumata. Aarón, pexi yajawa, ovejamatabocotojumawereca nacobebuatanubena.b 19 Nexata, tobeyaxuaba oveja pewësinepecaucutsicuenia. Bajaraponë pejanata tsicaba altar-juma matatoyorotsia. 20 Xuacujinae, xaniawaetsia thaba bajaraponë. Nexata, daxita penasitsi, pemataboco yajawa, totajuita altar-jumata. 21 Itsiata, daxita piënëjawanë, petopabeje yajawa xaniawaetsia quiata merata. Xuacujinae, matapania daxita bajaraxuanë-ata totajuita altar-jumata. Bajarapacuenia daxitanë totajuita bajarapamonae pacuenia Jehová tonajumecopatatsi. Bajarapa-ovejayo rajutsiaya petotajuitsijawa Jehovájawabelia tsitapexaniatuxusijawatsi. Nexata, siwajamatabëcuenebarëya bajarapamonaejawabelia.
22 Bajaraxuacujinae, icatsia Moisés capatsia-exana itsanë oveja pebito, ponë tobeyaxuabijitsia pecuene-itajëtsinexa Jehová pitapetsijawa bajarapamonae saicaya petonacuenebiwinexa. Bajarapadajubinë Aarón, pexi yajawa, tsimatanacobebuatanubena petobeyaxuabijawatanexa. 23 Nexata, paepatota Moisés wësinepecaucutsiaya beyaxuaba. Bajaraponëjanata Aarón pecujuanenia Moisés pematapijinë muxu-upitsauta. Tsautanua pecobematajaranae, petaxumatajaranae-ata. 24 Moisés xuacujinae junata Aarón pexi pecujibinexatsirena. Nexata, bajarapamonaejawabelia-ata bajarapadajubijanata pecujuanenia muxu-upitsauta, bajarapacuenianua pecobematajaranae, petaxumatajaranae-ata. Nexata, pajana nacopata, bajarapajanata Moisés jumatsicaba dajubi petajuitabiabi-altar-jawa. Matatoyorotsianua yenepanatsicaba. 25 Moisés cotocaewi pa-oveja beyaxuaba, bajaraponë pemara-ëthëtobeje pita, epatuajapato penasitsijawa yajawa, daxita panasitsitonë rubena piënëjawata. Pitanua caetopa, pecujuaneniajawa. 26 Moisés pitapona caebëyo caewiria canacujitsia Jehová pewënëta peya-etsi-abawecua, acueyabi pawiriatabeje pexanaepan, daxita levadurata matajërëabinejewa. Baitsi, pitapona caepanbë itsacujiru matajërëabinejewa pexanaepan, itsapan-bënua aceitera pematajërëabijawa pexanaepan, bajarapacuenia itsawiriapan-jawa, pitafacaecarëcarënaejawa. Daxita bajarapitsipan-jawanë Moisés tsijumabuata penasitsijawanë, pecujuanenia patopajawabeje. 27 Xuacujinae, daxita bajaraxuanë rajuta Aarón pecobejawabelia, pexi sacerdotewijawabelia-ata. Bajaraxuanë bajarapamonae yobajarabiaya athëbëabetsia rajuta Jehovájawabelia ofrendacuenia. 28 Bajarapacuenia pexanaecujinae, Moisés wecuanota bajaraxuanë bajarapamonae, peyajawatajuitsinexa altar-jumata copiaya petajuitsi-oveja. Bajarapacotocaewi petajuitsijawa najamatabëcuene-itajëta Jehová sacerdotewi pitapetsijawatsi. Bajarapatuxusi Jehová tsitaxanepanatsi, nexata siwajamatabëcuenecaewa pijaneconimi bajarapamonae. 29 Bajaraxuacujinae, pa-ovejajamatabësibërë tsicarucatsi pepitsinexa petotajuitsinëjamatabëcuene, bajaraxua Moisés pita. Nexata, bajarapajamatabësibërë yobajarabiaya athëbëabetsia rajuta Jehovájawabelia ofrendacuenia, pacuenia Jehová tonajumecopatatsi pexanaenexa. Bajarapacuenia pexanaecujinae, Moisés canacopata bajaraxua pijajawanexa.
30 Bajaraxuacujinae, icatsia Moisés pita petsimata-epacae-aceitera, bajarapacuenia altar-jumata peya-etsipejanara-ata. Bajaraxuanëta tsicaba Aarón, pexijawabelia-ata, penaxatatsijawanëjawabelia-ata. Bajarapacuenia exana penajamatabëcuene-itajëtsinexa Jehová itapetsiaya pecuenetsatsijawatsi saicaya petonacuenebawanapaewinexatsi Israel-pijinë pemomoxituatuajëta, bajarapijinia pacuenia penaxatatsijawanënua. Bajarapacuenia nexata matapania nacopata bajarapamonae Jehová saicaya petonacuenebiwinexa sacerdotewicuenia.
31 Nexata, Moisés jumaitsi Aarón, pexijawabelia-ata:
—Pasetsianame pawijawanë nacopabanubena cotocaewi patacatobeyaxuabi-ovejayajuwënëwi Jehová pijacarpabopijibaupa canacujitsita. Xuacujinae, panajuaxaename bajarapasetsiwi levadurata matajërëabinejewa pexanaepan-jawanë-ata, papan pacapatame abata panetajuitsinexa panenajamatabëcuene-itajëtsijawata Jehová papeca-itapetsiwicuene. Pacuenia bajaraPonë nacatonajumecopata pane-exanaenexa panexaejawata bajarapanacopabiyajuwënëwi, bajarapacuenia xaniawaetsia pa-exanaename. 32 Itsiata, panexaeweretsicujinae, penacopabiwi, penacopabipan-jawanua, patajuitsianame daxita altar-jumata. 33 Bajaraxuacujinae, panacopabianame Jehová pijacarpabopanabota siete pamatacabibejecuenia. Pepanepaecujinae siete pamatacabibeje, matapania pacatoxanepanaena panewecuanatixitsijawa Jehová pijacarpabo, tsipaji Jehová pacatocaëjëta bajarapasiete pamatacabibeje xaniawaetsia panenajamatabëcuene-itajëtsinexa bajaraPonë papeca-itapetsiwicuene panetonacuenebiwinexa sacerdotewicuenia. 34 Daxitaxua pacato-exanatsi ajena, bajaraxua Jehová nitoroba patacato-exanaenexa panijaneconimi matamotsiaya papecasiwajamatabëcuenecaewinexa. 35 Nexata, panacopabianame Jehová pijacarpabopanabota, siete pamatacabibejecuenia panejinawanapaenexa, siete pamerawibeje yajawa. Bajarajota, patonacuenebianame daxita Jehová papecatonajumecopatsicuenia panetëpaeyaniwa. Daxita bajaraPonë wajanacatonajumecopatsicuenia pa-exanawanapaename —jai Moisés sacerdotemonaejawabelia.
36 Jejai bajarapamonae. Daxita pacuenia tonajumecopatatsi Jehová Moisésta, bajarapacuenia exana.