Dioso tajuitatsibeje Nadab, Abiúbeje
10
Itsamatacabi Aarón pexënatobeje, Nadab, Abiúbeje, pibisiacuene exanabeje Jehová pitabarata. ¡Bajaraponëbeje caenë canacujitsia pita pijajawa incienso petajuitabiabiwaxiyonexa, iso-ita-ire yajawa, petajuitsinexa inciensopërë Jehová pitabarata! Nexata, bajarapa-ita-irejumawereca përëca inciensopërë, petotajuitsinexa Jehová pitabarata. Itsiata, bajaraponëbeje apo-exanaebeje Jehová petonajumecopatsicueniatsi sacerdotewi. Piaitothiacueniaa saya exanabeje. 2 Nexata, Jehová pecotiajawawetsica pitsapaica isoto bajaraponëbejejawabereca. Pa-isoto baja tajuatsibeje. Nexata, bajaraponëbeje tëpabeje Jehová pitabarata petajuecueniatsibeje jonenejewa abaxë Jehová pijacarpabojawabelia. 3 Bajaraxuacujinae, Moisés jumaitsi Aarón-jawabelia:—Bajaraxuayaniwa cajena nacatsipaeba Jehová pacujinae nacajumaitsi mapacueniaje:
‘Pasacerdotenë necujitsiana xanëjawaberena, bajaraponëjawabelia nexata xanë tsitajëtsianajë daxita piabejecuene tanawecua-itoyanë, tsipaji aneconijibia taponaponaenë daxitawecua.
’Nexata, daxita israelitawi pitabarata, tsitanaitajëtsianajë tajapinijicotia yajawa,b daxita xaniawaetsia taneyaiyataenexa,’ nacajai Jehová —jai Moisés.
Bajarapacuenia pejumaitsijawata, Aarón moya nuca, pejamatabëcuene-anaepanaejawami Jehovájawabelia penajamatabëcuenecataitsixae.
4 Bajaraxuacujinae, Moisés junata Misael, Elzafán-beje, pexënatobeje Uziel, Aarón paxuanë. Jumaitsi bajaraponëbejejawabelia:
—¡Naxatsia, paxamëbeje pajutsianamebeje maponëbeje, panijamonaenëmibeje, Jehová pijacarpabopanabowecua! Pacaponaenamebeje wajataxunaebonëpënëjawabelia —jai Moisés.
5 Nexata, bajaraponëbeje jejai. Siwaponabeje Jehová pijacarpabopanabojawabelia, pejutsinexa petëpaenëmibeje. Bajarapapetëpaenëbeje pejumaxatatsinawa cobewaetabiaya caponatsibeje pijataxunaebonëwecua tajëwecua, pemëthëtsinexatsi pacuenia baja Moisés itorobatsibeje. 6-20 […]
C11—C15 […]